Կառավարության ծրագիրը կլինի կարճաժամկետ շեշտադրումներով

ANALYSIS 16 September, 2016 13:34

Հայաստանի Հանրապետության վարչապետի փոփոխությունը իրենից ենթադրում է նաև կառավարության փոփոխություն, որին էլ մշտապես հաջորդում է կառավարության կողմից ծրագրի ներկայացումը Ազգային ժողովի հավանությանը: Եթե նախկինում ներկայացված կառավարության ծրագրերը մշտապես կրել են առավելապես երկարաժամկետ և ռազմավարական բովանդակություն, ապա այս կառավարության ծրագիրն անկասկած լինելու է կարճաժամկետ շեշտադրումներով, ինչը պայմանավորված է մի շարք հանգամանքներով:

Դրանցից առավել գլխավորը գարնանը կայանալիք ընտրություններն են, ուստի այս կառավարությունը իր ծրագրերը իրականացնելու համար ունի 6-7 ամիս ժամանակ, քանզի ընտրություններից հետո կարող է ամեն ինչ փոխվել և գործող կառավորությունը միանգամից դառնա նախկին: Դրանից բացի, այս կառավարությունը, լինելով իշխանության կառավարությունը, այս 6-7 ամիսների ընթացքում պետք է այսպես կոչված «հիացնի» բոլորին: Իսկ մեր ազգային մենթալիտետի պայմաններում «հիացնել» կարելի է միայն իրական և նյութական հաջողության պայմաններում: Հենց դրան ուղղված քայլեր էլ կձեռնարկի այս կառավարությունը:

Մասնավորապես, կիզակետում կհայտնվի աշխատավարձերի բարձրացումը, ինչը միանգամից կբերի լայն շերտի դրական արձագանքին, իսկ եթե այդ բարձրացումն ուղեկցվի էլեկտրաէներգիայի և գազի գնի նվազեցմամբ, ապա միայն կարելի է պատկերացնել այն մեծ հիացմունքը, որը կլինի բնակչության շրջանում: Ուշադրության կենտրոնում կպահվեն նաև շուկայական գերը: Բանն այն է, որ նախորդ գրեթե բոլոր դեպքերում, աշխատավարձի բարձրացումը մշտապես ուղեկցվել է սպառողական ապրանքների թանկացմամբ, ինչի արդյունքում էլ բարձրացումն էական ազդեցություն սոցիալ-տնտեսական վիճակի վրա չի ունեցել, սակայն եթե այս կառավարությանը հաջողվի զսպել գների բարձրացումը, ապա կարելի է ասել, որ ծրագրային այս շեշտադրումը բարեհաջող իրականացված է:

Կառավարության գործունեության ոլորտում կլինի նաև պետական պարտքի կարգավորումը: Մեր երկրում պետական պարտք/ՀՆԱ հարաբերակցությունն արդեն հասել է 50 տոկոսի, ինչը լուրջ վտանգ է երկրի տնտեսական անվտանգության համար, ուստի պետական պարտքի կրճատումը կարող է դառնալ կառավարության ռազմավարական այն քայլերից մեկը, որը կբերի վերջինիս հեղինակության կտրուկ բարձրացման:

Խոշոր քայլերի թվին կդասվեն նաև օտարերկրյա խոշոր ներդրումների ավելացմանն ուղղված աշխատանքները: Սա կաշխուժացնի տնտեսությունը, ինչպես նաև նոր աշխատատեղեր կստեղծվեն:

Վերոնշյալ քայլերը, թեև ունեն կառավարության բարձր իմիջի ապահովման ուղղվածություն, սակայն նշված քայլերի իրականացումն անկասկած մեր երկրի և բնակչության ձեռքբերումը կլինի, ուստի անհրաժեշտ հաջողություն և ծրագրերի իրականացում մաղթել բոլորիս:

Հայկ Բեջանյան, Past.am վերլուծաբան