«Եվրո 2016». Եզրափակիչ, սակայն քառորդ եզրափակիչում. Գերմանիա-Իտալիա

«Եվրո 2016»-ի քառորդ եզրափակիչում պայքարի մեջ կմտնեն Գերմանիայի և Իտալիայի ազգային հավաքականները:«Արմենպրես»-ը ներկայացնում է հանդիպման նախախաղային տեսությունը:

Գերմանիայի ազգային հավաքական

Աշխարհի առաջնության չեմպիոնությունից հետո, «Եվրո 2016»-ում հաղթանակը  համաշխարհային ֆուտբոլում Գերմանիայի հեգեմոնիան հաստատելու յուրահատուկ հնարավորություն է: Համաշխարհային ֆուտբոլում Գերմանիայի հավաքականը ընդամենը մեկ մղձավանջ ունի: Իտալիայի հավաքականի հետ բոլոր կարևորագույն հանդիպումներում  Բունդեսթիմն անհաջող է հանդես գալիս: «Եվրո 2016»-ում Գերմանիայի հավաքականը կրկին չկարողացավ խուսափել «Սկուադրա աձուրա»-ի հետ առճակատումից: Թիմերի միջև քառորդ եզրափակիչ հանդիպումը տեղի է  ունենալու Ֆրանսիական Բորդոյում:

Իսկ Գերմանիայի ընտրանին ֆուտբոլային ճանապարհորդությունը սկսեց  Լիլ քաղաքում: «Եվրո 2016»-ից բացման խաղը Յոահիմ Լյովի թիմին  տրվեց մեծ դժվարությամբ: Պաշտպանության կենտրոնում Մատս Հումելսի բացակայությամբ, Ուկրաինան կարողացավ մի շարք դժվարություններ ստեղծել աշխարհի չեմպիոնների համար, սակայն ֆուտբոլային բախտը գերմանացիների կողմն էր և խաղն ավարտվեց 2-0 հաշվով: Խմբային մրցաշարը Յոահիմ Լյովի թիմը շարունակեց Լեհաստանի դեմ դիմակայությամբ: Լեհերը կարողացան արժանի դիմադրություն ցույց տալ և հանդիպումն ավարտեցին անարդյունք հաշտությամբ: Հյուսիային Իռլանդիայի հետ խաղը հիշեցրեց ֆուտբոլի, սակայն ընդամենը մեկ դարպասով: Եվրոպայի առաջնությունում Թոմաս Մյուլերի անհաջողությունները շարունակվեցին այդ խաղում: Մյուլերը գրոհում էր,Մյուլերը հարվածում էր, իսկ Հյուսիային Իռլանդիայի դարպասապահ Մայքլ Մակգովերնը պարզապես անգերազանցելի էր: Արդյունքում հեղինակվեց ընդամենը մեկ գոլ Մարիո Գոմեսի կողմից և Գերմանիան 1-ին տեղով դուրս եկավ «փլեյ օֆ»:

Գերմանիա-Սլովակիա հանդիպումը Գերմանիայի ընտրանու բենեֆիսն էր «Եվրո 2016»-ում: Գերմանիան արդեն խաղով էլ ապացուցեց, որ ցանկացախ մրցակցի պատրաստ է ոտնատակ անել: Սլովակիան անպատեհ ժամանակի և անպատեհ տեղում հայտնվեց Բունդեսթիմի ճանապարհին: Բոատենգ-Հեդիրա-Դրաքսլեր տրիոն սլովակիային ուղարկեց երկարատև հանգստի, իսկ Գերմանիայի հավաքականը դուրս եկավ «Եվրո 2016»-ի քառորդ եզրափակիչ: Իտալական մղձավանջն հաղթահարելը Գերմանիայի հավաքականի ուժերի սահմաններում է:Իսկ այդ խաղում Գերմանիան պետք է կարողանա հաղթել երկու մրցակցի ինքն իրեն, այնուհետև Իտալիային հզոր թիմին:

Իտալիայի ազգային հավաքական:

Անտոնիո Կոնտեի գլխավորությամբ Իտալիայի հավաքականը « Եվրո 2016»-ում շարունակում է գերազանց ելույթների շարքը եվրո: Բուֆոնն ու մյուս նվիրյալները հիանալի տրամադրությամբ են մոտեցել այս առաջնությանը: Առաջին հայացքից թիմում չկան ակնհայտ գոլահարներ և առաջին մեծության հարձակվողներ, սակայն առկա է 1-ին մեծության ֆուտբոլը: Իտալական կատենաչոյին գումարում ենք կայուն թիմային խաղը և արդյունքում ստանում Իտալիայի հավաքականի հաջողության գաղտնիքը:

Սկուադրա աձուրան Եվրոպայի առաջնությունում  ֆուտբոլամանիան սկսեց Բելգիայի հետ խաղում: 1-ին իսկ հանդիպումը եկավ ասելու, որ Անտոնիո Կոնտեն Ֆրանսիա է ժամանել լուրջ ակնկալիքներով: Բելգիական աստղաբույլը քանդվեց իտալական թիմային խաղի առաջ: Աձուրան հաղթեց 2-0 հաշվով: Շվեդիայի հետ 2-րդ հանդիպումը բարդ ընթացք ունեցավ կապույտների համար: Միայն վերջին րոպեներին Էդերի  վարպետությունը պարգևեց 3 միավոր :Իտալիան Շվեդիային հաղթեց 1-0 հաշվով: Վերջին տուրից առաջ ապահովելով 1-ին տեղը Իտալիան 2-րդ կազմով պարտվեց Իռլանդիային, սակայն հենց դա հետագայում դարձավ չար կատակ Իսպանիայի գլխին:

1/8 եզրափակիչում Իտալիայի մրցակիցը Իսպանիայի ընտրանին էր: Անտոնիո Կոնտեն յուրահատուկ ֆուտբոլային դաս  տվեց կարմիր ֆուրիային:Գեղեցիկ հարձակողական ֆուտբոլ համեմված կազմակերպվածությամբ և Իսպանիան զիջեց ճանապարհը: 1-ին խաղակեսում գոլի հեղինակը Յուվեի պաշտպան Ջիորջիո Կելինին էր, իսկ հաշիվը խաղավարտին  կրկնապատկեց  Գրացիանո Պելեն: Իտալիան անցավ քառորդ եզրափակիչ, որտեղ սպասում է իր ամենաբարդ, սակայն միևնույն ժամանակ ամենացանկալի մրցակիցը` Գերմանիան:

Գերմանիա-Իտալիա 

Գերմանիա-Իտալիա մրցավեճը կարող է զարդարել ցանկացած մրցաշարի եզրափակիչ: Համաշխարհային ֆուտբոլի երկու հսկաներից մեկը ստիպված կլինի թողնել պայքարը «Եվրո 2016»-ում: 2 հավաքականները միմյանց միջև անցկացրել են 33 հանդիպում: Իտալիայի հավաքականը բացահայտ առավելություն ունի: Սկուադրա Աձուրան կարողացել է հաղթել 15 անգամ, իսկ ահա Գերմանիան իր օգտին ունի 8 խաղ: Թիմերի միջև ևս 10 մրցավեճ ավարտվել է ոչ-ոքի արդյունքով:Այս թիմերի դիմակայությունը առանձնահատուկ է գերմանացիների համար: Բունդեսթիմը պաշտոնական հանդիպումներում մշտապես պարտություններ է կրել Իտալիայի ընտրանուց: Գերմանիայի առաջին լուրջ անհաջողությունը  Իտալիայի ընտրանու  հետ սկսվել Է 1970 թվականի աշխարհի առաջնությունում: Կիսաեզրափակիչում Իտալիան  11 մետրանոցներով հաղթել է Բունդեսթիմին: 1982 թվականին Գերմանին արդեն մունդիալի եզրափակիչում ստիպված եղավ գլխիկոր հեռանալ: Այս անգամ Իտալիան հաղթեց 3-1: Բունդեսթիմի հիշողություններում թարմ են նաև 2006 թվականի աշխարհի առաջնության և 2012 թվականի Եվրոպայի առաջնության կիսաեզրափակիչները: 2 դեպում էլ Իտալիան իսկական դաս տվեց Գերմանիային: «Եվրո 2016»-ը հավակնում է դառնալ Գերմանիայի ընտրանու նոր պատմության հիմնաքարը, առանց Իտալիայի: Իտալիա-Գերմանիա հանդիպումը սկսվելու է Երևանի ժամանակով ժամը 23:00-ին:Մրցավեճի գլխավոր մրցավարն է Վիկտոր Կաշաին:

Արմեն Մանուկյան