Լիբերմանը դեմ է Թուրքիայի հետ հարաբերությունների վերականգնմանը

«Մեր տունն Իսրայելն է» կուսակցության առաջնորդ, պաշտպանության նախարար Ավիգդոր Լիբերմանը դեմ է Թուրքիայի հետ հարաբերությունների վերականգնմանը, եւ գտնում է, որ Իսրայելը չպետք է համաձայնվի Անկարայի առաջադրած պայմաններով Թուրքիայի հետ հարաբերությունների նորմալացմանը:

Այս մասին հայտնում է Իսրայելի երկրորդ հեռուստաալիքը` պնդելով, որ այդ առնչությամբ արած հայտարարության մեջ Լիբերմանն ասել է այն մասին, որ ինքը կառավարության նիստում դեմ կքվեարկի այդ համաձայնությանը:

Ավիգդոր Լիբերմանն ավելի վաղ բազմիցս նախազգուշացրել էր Թուրքիայի նախագահ Թայիփ Էրդողանի հետ հարաբերությունների վերականգնման հնարավոր բացասական հետեւանքների մասին: Այսպես, դեռեւս 2015 թվականին Լիբերմանն ասել էր, որ «Թուրքիայի հետ համաձայնությունը դեռ կնքված չէ, իսկ պետական մակարդակով վնասն Իսրայելին արդեն հասցվել է»:

Լիբերմանը հիշեցրել է, որ վերջին տարիներին Իսրայելը հսկայական ջանքեր է գործադրել Հունաստանի եւ Կիպրոսի հետ երկկողմանի հարաբերությունները զարգացնելու գծով, նրանց հետ հասել կարեւոր պայմանավորվածությունների եւ սերտ համագործակցություն կարգավորել: Թուրքիայի հետ համաձայնությունը անուղղելի վնաս կհասցնի այդ հարաբերություններին:

«Այն հարված կհասցնի Եգիպտոսի հետ մեր հարաբերութուններին, քանի որ Էրդողանը դժվար թե հրաժարվի Գազայի հատվածի նկատմամբ իր պահանջներից: Գազայում Թուրքիայի դիրքերի ամրապնդումը կարող է տեղի ունենալ միայն Եգիպտոսի դիրքերի թուլացման հաշվին: Գազի արտահանման նկատմամբ եւս. կան դրանում հետաքրքրված բավարար թվով երկրներ: Այդ մասին բանակցություններ են տարվել Հունաստանի եւ Կիպրոսի հետ, եւ որոշակի փոխըմբռնում է ձեռք բերվել», -ասել է Ավիգդոր Լիբերմանը:

Իսրայելյան «Հաարեց» թերթն ավելի վաղ հայտնել էր, որ Թուրքիան եւ Իսրայելը համաձայնություն են ձեռք բերել են հարաբերությունները նորմալացնելու հարցում:

«Բանակցություններում առաջընթացը սկսվել է «Մոսադ»-ի ղեկավար Յոսի Կոենի Թուրքիա կատարած գաղտնի այցից հետո: Իսրայելի արտաքին հետախուզական ծառայության պետը հանդիպել էր իր թուրք գործընկեր Հաքան Ֆիդանի հետ եւ եկել համաձայնության այն մասին, որ Թուրքիան ՀԱՄԱՍ ահաբեկչական կազմակերպությանը թույլ չի տա իր տարածքում դիվերսիաներ կատարել Իսրայելի դեմ, սակայն, ՀԱՄԱՍ-ի ներկայացուցչությունը Թուրքիայում կշարունակի աշխատել», -գրել էր «Հաարեց»-ը:

Համաձայնության շրջանակում Իսրայելը 20 մլն դոլար կփոխանցի այսպես կոչված մարդասիրական հիմնադրամին, որը պետք է ստեղծվի 2010 թվականին թուրքական «Մավի Մարմարա» նավում իսրայելյան զինվորների հետ բախման ժամանակ սպանված 9 թուրք քաղաքացիերի ընտանիքներին փոխհատուցելու համար: Թուրքիան հնարավորություն կստանա առանց խոչընդոտների նախագծեր իրականացնել Գազայի հատվածի վերականգնման գծով: Դրա հետ միասին, Թուրքիան հրաժարվել է Իսրայելի կողմից Գազայի ամբոջղական շրջափակումը վերացնելու իր պահանջից:

Համաձայնությունը նախատեսում է երկրների միջեւ հարաբերությունների ամբողջական նորմալացում, դեսպանների վերադարձ Անկարա եւ Թել Ավիվ, ինչպես նաեւ 2010 թվականին ճգնաժամի ստեղծման պահից իրագործվող բոլոր առեւտրային եւ այլ սահամանափակումների վերացում: