Միոզիտ` ժողովրդական դեղատոմսեր

Shabat.am-ը գրում է.

Մարդու մարմնի զանգվածի մեկ երրորդը կազմում են մկանները, դրանք թվով մոտ 650-ն են` տեղակայված մարմնի բոլոր մասերում։ Մկանների միջոցով սննդից ստացված էներգիան փոխակերպվում է մեխանիկական շարժման էներգիայի։ Մկանների հիմնական մասն ամրացված է ոսկորներին։

Վնասվածքի, մրսեցնելու, անհաջող շարժման, վարակային կամ բակտերիալ ինֆեկցիաների հետևանքով առաջացած մկանների բորբոքումը կոչվում է միոզիտ։
Հիվանդությունն արտահայտվում է` շարժման ժամանակ սաստկացող, մկանային ցավերով։ Վնասված մկանը հաճախ այտուցվում է, հնարավոր է ջերմության բարձրացում։
Հիվանդությունը բուժվում է հակավարակային և հակաբիոտիկ` կախված ինֆեկցիայի տեսակից, նաև հակաբորբոքային դեղորայքով (քսուքներ, դեղահաբեր)։
Ժողովրդական միջոցներով ինքնաբուժումը հղի է անկանխատեսելի հետևանքներով, սակայն կարող է զգալիորեն բարձրացնել բուժման արդյունավետությունը բոլոր փուլերում` սուր շրջան, ֆիզիոթերապիա, մարմնամարզություն և այլն։

 

Ժողովրդական դեղատոմսեր

* Փոշիացրեք ձիաձետ դաշտայինի խոտը, խառնեք գոլացրած կարագի հետ (1։4)։ Ներմերսեք մեջքին, պարանոցին, կատարեք օրվա ընթացքում և քնելուց առաջ։
* Եփեք կարտոֆիլը`կեղևով, տրորեք։ Բորբոքված հատվածը ծածկեք երկտակ ծալած վուշե (բամբակե) լաթով, տեղադրեք կարտոֆիլի խյուսը, վիրակապեք, փաթաթեք շալե կտորով։ Կատարեք քնելուց առաջ, հանեք առավոտյան։
* Մանրացրեք դափնու տերևը, 3 ճ/գ հումքը խառնեք 200 մլ գոլացրած արևածաղկի յուղի հետ, 10 րոպե տաքացրեք ջրային բաղնիքի վրա, 10 օր թրմեք, ընթացքում խառնեք յուղամզվածքը, քամեք։ Կատարեք մերսումներ` օրը 2 անգամ։
* Գետնախնձորի բույսի վերգետնյա մասը` 1 կգ զանգվածով, 10 րոպե եփեք թույլ կրակի վրա` 5 լ ջրի մեջ, 20 րոպե թրմեք, քամեք։ Ավելացրեք լոգանքի ջրին, կատարեք օրը 1 անգամ, շարունակեք 10 օր։ Լոգանքի տևողությունը` 15 րոպե, ջերմաստիճանը` 32-36C։
* Հավաքեք խատուտիկի դեռ չբացված` ձևավորված կոկոնները, լցրեք ապակե տարայի ողջ ծավալը (ոչ խիտ), ավելացրեք օդեկոլոն` այնքան, որ ծածկի հումքը, թրմեք 3 ամիս, պարբերաբար խառնեք։
Գերազանց միջոց է հիվանդության սեզոնային սրացումները կանխարգելելու, ընթացքը թեթևացնելու համար։ Կատարեք շփումներ։
* 1ճ/գ խռնդատի արմատը կամ ծաղիկը (կարելի է` խառնուրդը) 20 րոպե թրմեք 200 մլ օղու մեջ, քամեք։ Կատարեք շփումներ միոզիտի, ռադիկուլիտի, ռևմատիզմի, հոդատապի, հոդացավերի դեպքում։
* Ծովաբողկի արմատի քերուկը լցրեք վուշե պարկիկի մեջ, դրեք բորբոքված հատվածին, պահեք` մինչև հիվանդը զգա թեթև այրոց, հետզհետե ավելացրեք թրջոցի պահելու ժամանակը։ Ծովաբողկի արմատն ունի սուր հոտ, շատ ավելի ուժեղ է, քան սոխը։
* Թրախոտի չոր արմատը 20 օր թրմեք օղու մեջ` 2։1 ծավալային հարաբերությամբ, մութ տեղում։ Խմեք 1-ական թ/գ` օրը 3 անգամ, ուտելուց առաջ։ Կատարեք շփումներ, դրեք թրջոց` խառնեք ջրի հետ` 1։5-1։10, ծածկեք թրջոցը կալկայով։
* Թրախոտի մանրացրած արմատը 20 օր թրմեք բուսայուղի մեջ (1։4)։ օգտակար է արթրիտի, ռևմատիզմի, հոդատապի, իշիասի, օստեոխոնդրոզի դեպքում` կատարեք շփումներ։
* Օգտագործեք դեղատներում վաճառվող « Сабельник » քսուքը, որն ունի կիրառման լայն ոլորտ։

 

Հնդկական սոխ` թունավոր բուժարարը

Գիտական անվանումն է` Ornithogalum gussonei, տարածված է Միջերկրական ծովի ափերին, Միջին և Հարավ-արևելյան Եվրոպայում, Կովկասում։ Աճում է մարգագետիններում, սարերի լանջերին, լուսավոր անտառներում։
Շուշանազգիների ընտանիքին պատկանող, բազմամյա սոխուկավոր բույս է։ Ցողունը խիտ ճյուղավորված է, ծաղիկները խոշոր են, կաթնասպիտակ, տերևները` նշտարաձև երկար։
Պարունակում է թունավոր գլիկոզիդներ և ցավազրկող հատկություն ունեցող ալկալոիդներ։ Թունավոր նյութերը հիմնականում կենտրոնացած են սոխուկի մեջ։ Սենյակային բույսերում թունավոր նյութերի բաղադրությունն անհամեմատ ցածր է բնության մեջ աճողների համեմատությամբ։
Բուժիչ, ցավազրկող, հատկություն ունի սոխուկից և տերևից հոսող անգույն լորձը (հյութը)։ Հյութի դեղաբանական ուսումնասիրությունները ցույց են տվել, որ այն ունի ոչ միայն ցավազրկող, այլ նաև հականեխիչ հատկություններ։ Տեղային ցավազրկման համար բավարար է քսել տերևի փոքր հատվածից հոսող հյութը։ Հյութն ունի այրող հատկություն և ներգործում է շատ արագ։ Ժողովրդական բժշկության մեջ կիրառվում է ռադիկուլիտի, օստեոխոնդրոզի, արթրիտի, հոդատապի, միոզիտի, հերպեսի, այրվածքի, մեղվի և կրետի խայթոցների դեպքում։
Միոզիտ. Խառնեք 2-ական մաս Վիշնևսկու քսուք և ձիթապտղի յուղ, ավելացրեք 1-ական մաս եղևինի յուղ (գնեք դեղատներից « Пихтовое масло» Эвалар) և հնդկական սոխի հյութ։ Ունի տաքացնող հատկություն, քսեք ցավոտ մասին և վիրակապեք, պատրաստեք օգտագործելուց առաջ, պահպանման ժամկետը 5-7 օր է։
* Ընտրեք համեմատաբար չոր տերև, զգուշորեն մանրացրեք, 2 շաբաթ թրմեք օղու մեջ (1։20 քաշային հարաբերությամբ), քամեք։
* Տարայի վրա փակցրեք նախազգուշական պիտակ. «Արտաքին օգտագործման համար, չխմել»։ Պահեք սառնարանում։ Մաշկին քսեք վրձնով, փոքր չափաբաժիններով, 1-2 րոպեից ոչ ավելի։ Ոգեթուրմն ունի այրող հատկություն։ Պահպանման ժամկետը մի քանի տարի է։
գ Ապակե տարայի մեջ խառնեք 10 մլ հնդկական սոխի տերևի ոգեթուրմ և 1 ձվի հարած սպիտակուց։ Քսեք ցավոտ մասին, փաթաթեք կալկայով (հատուկ թրջոցների համար նախատեսված թղթով) և վիրակապեք բրդե շալով։ Կրկնեք 2-3 ժամից։
*Վազելինը լցրեք ապակե տարայի մեջ, գոլացրեք ջրային բաղնիքի վրա (40C ջերմաստիճան) խառնեք հնդկական սոխի հյութ` կաթիլ առ կաթիլ (5։1)։ Պահեք սառնարանում։ Օգտագործեք` ինչպես նկարագրված է նախորդ դեղատոմսում։
* 300 գ սոճու փշատերևը 30 րոպե եփեք 1,5 լ ջրում` փակ կափարիչի տակ, 12 ժամ թրմեք, քամեք։ Եփուկի մեջ լուծեք 100 մլ հնդկական սոխի ոգեթուրմ, ավելացրեք լոգանքի ջրին (37 C)։
Նստատեղի նյարդի (ջղի) բորբոքում. Մանրացրեք, խառնեք քարխոտի արմատ, հնդկական սոխի տերև (2։1)։ 100 գ հումքը 3 օր թրմեք 500 մլ օղու մեջ, քամեք։ Քսեք և վիրակապեք։
Մրսածություն. Հյութը լուծեք օղու մեջ (1։2)։ Քսեք լիմֆատիկ հանգույցներին, ճակատին` հոնքերից վերև։

Ռադիկուլիտ. Տերևի փոքր կտորով (2×2 սմ ք) 1 րոպե շփեք մեջքը, կապեք շալով, պառկեք անկողնու մեջ։ Հյութի պատճառած այրոցի սուր զգացումը տևում է մոտ 10 րոպե, որից հետո ցավը դադարում է։
Անգինա. Տերևի ոգեթուրմը լուծեք գոլ ջրի մեջ (1։3), քառատակ ծալած թանզիֆը թրջեք լուծույթի մեջ, 1-2 րոպե շրջանաձև շարժումներով մերսեք կոկորդը, կրծքավանդակը։ Քնելուց առաջ վրձնով ուրվագծեք վանդակ կրծքի և մեջքի վրա, ինչպես դա արվում է յոդով։
Զգուշացում: Բույսից ստացված պատրաստուկները կարող են առաջացնել անհատական անընկալունակություն։ Եթե հյութն ընկնի աչքի վրա, պետք է 5-10 րոպե լվանալ սառը ջրով և օգտագործել աչքի համար նախատեսված կաթիլներ։ 
Հակացուցված է հղիներին, երիկամային անբավարարության, քրոնիկ հիվանդությունների սրացման դեպքում։