ՌԴ խոշորագույն առևտրային ցանցերն ու հայ արտահանողները քննարկում են ոլորտի մրցակցային խնդիրները

 Ռուսաստանի խոշորագույն առևտրային ցանցերի ղեկավարներն ու արտահանում իրականացնող հայ գործարարները Երևանում քննարկում են արտահանման ոլորտում առկա մրցակցային խնդիրները: «Արմենպրես»-ի փոխանցմամբ` Երևանում ընթացող «Մատակարարներ և առևտրային ցանցեր. արդյունավետ համագործակցության մեխանիզմների խթանումը ԵԱՏՄ անդամ-պետություններում» թեմայով կլոր սեղան քննարկումը կազմակերպել է Տնտեսական մրցակցության պաշտպանության պետական հանձնաժողովը: Միջոցառմանը մասնակցում են շուրջ 10 ռուսական առաջատար առևտրային ցանցերի ղեկավարներ ու 50-ից ավելի հայ գործարարներ:

ՏՄՊՊՀ նախագահ Արտակ Շաբոյանի խոսքով` իրենց կառույցը հարցումներ է իրականացրել ապրանքներ արտահանող հայ տնտեսավարողների հետ և պարզել մի շարք խոչընդոտներ` կապված ռուսական մանրածախ առևտրի ցանցեր մուտք գործելու հետ: Մյուս կողմից` ռուսական մատակարարների կողմից կան որոշակի պահանջներ, որոնց պետք է համապատասխանեն հայկական ընկերությունները: «Մի շարք հայկական ընկերություններ դժգոհել են, որ Ռուսաստանի տարածքում առևտրային ցանցերը հաճախ խոչընդոտում են իրենց մուտքը մանրածախ առևտրի ոլորտ: Իրենց հետ ուղղակի աշխատելու փոխարեն նախընտրում ե ն ապրանքները ձեռք բերել տեղական դիստիբյուտորական ընկերությունների միջնորդությամբ, որոնք էլ լրացուցիչ պայմաններ են թելադրում` բարդացնելով մատակարար-սուպերմարկետ հարաբերությունները: Բնականաբար, ապրանքի գնին ավելանում է միջնորդի մարժան, ինչն էլ ազդում է վերջնական արժեքի վրա` թանկացնելով հայկական ապրանքները ՌԴ-ում»,-ասաց Արտակ Շաբոյանը:

Բացի այդ` ըստ նրա, մատակարարների հանդեպ տարբերակված վերաբերմունք են ցուցաբերում նաև ռուսական մի շարք խոշոր առևտրային ցանցեր, որոնք կամայականորեն իջեցնում են ձեռք բերվող ապրանքների գները, ձգձգում ապրանքի դիմաց վճարումները, սուբյեկտիվ կերպով որոշում ինչպես ցուցադրել տվյալ ապրանքը իրենց խանութներում: «Առևտրային ցանցերի կողմից դրսևորվող նման վարքագիծը անբարենպաստ պայմաններ է ստեղծում` անորոշ իրավիճակի մեջ դնելով մեր արտահանող ընկերություններին: Համատեղ ջանքերով պետք է կանխարգելենք և վերացնենք այս երևույթները, քանի որ արտահանման մրցակցային խոչընդոտները լուրջ խնդիրներ են ստեղծում երկկողմ տնտեսական զարգացման հնարավորությունների առումով»,-հավելեց պաշտոնյան: Նա ավելացրեց, որ մտադիր են նման հանդիպումները դարձնել պարբերական:

Միջոցառմանը բացման խոսքով հանդես եկավ ՀՀ փոխվարչապետ, Միջազգային տնտեսական ինտեգրման և բարեփոխումների նախարար Վաչե Գաբրիելյանը: Նա շեշտեց, որ ՀՀ կառավարությունը մեծապես կարևորում է նման քննարկումները, քանի որ դրանք թույլ են տալիս վեր հանել առկա խնդիներն ու գտնել միասնական մոտեցումներ: «Տվյալ խորհրդակցության առարկան հավասար պայմանների ստեղծումն է թե ներմուծողների, թե արտահանողների կողմից: Եվրասիական տնտեսական միության պետությունների կողմից արվում են ակտիվ աշխատանքներ` փոխադարձ առևտրում խոչընդոտների վերացման ուղղությամբ: Այդ գործառույթը մաս է կազմում նաև ԵԱՏՄ-ի Հայաստանի կողմից նախարարի պորտֆելի: Այստեղ բարձրացված տարբեր խնդիրներ կարող են քննարկվել ԵԱՏՄ հարթակում թե հակամենաշնորհային քաղաքականության տեսանկյունից, թե կոնկրետ առևտրային խոչընդոտների տեսանկյունից, եթե այդպիսիք լինեն»,-նշեց նախարարը:

Վաչե Գաբրիելյանն ընդգծեց, որ իրենք պատրաստ են անհրաժեշտության դեպքում նախաձեռնել օրենսդրական կարգավորումներ, հետամուտ լինել, որ արտահողների համար ավելի դյուրին  ու կարգավորված ուղիներ լինեն այդ աշխատանքները կազմակերպու համար: «Հարկավոր է համատեղ աշխատանքով հասնել ԵԱՏՄ բոլոր երկրների համար առևտրի ու ծառայությունների միասնական սկզբունքների կանոնակարգմանն ու որոշ օրենսդրական անհամապատասխանությունների հարթմանը: Մենք շատ ուրախ կլինենք, եթե գործնական առաջարկներ ձևավորվեն այս քննարկումների արդյունքում»,-նշեց փոխվարչապետը:

Հայաստանում Ռուսաստանի դեսպան Իվան Վոլինկինը կարևոր համարեց հանգամանքը, որ ԵԱՏՄ անդամ-պետությունների միջև առևտրի մեխանիզմների արդյունավետության բարձրացման չափազանց կարևոր ու արդիական թեման քննարկման է դրվում պետական գերատեսչությունների ներկայացուցիչների և Հայաստանից ու Ռուսաստանից մեծ թվով գործարարների ու ձեռնարկատերերի կողմից: «Սա թույլ կտա ընդլայնել առևտրային հարաբերություններն ու դրանք բերել նոր որակի: Եվրասիական տնտեսական միությունն առաջին հերթին ինտեգրացիա է տնտեսության ոլորտում` որը առավելություններ է ստեղծու մ իր մասնակիցների համար»,-ասաց դեսպանը: Նա նկատեց, որ անդամակցությունը ԵԱՏՄ-ին թույլ է տալիս լինել մրցունակ ու պաշտպանված համաշխարհային տնտեսական ճգնաժամի պայմաններում: Նա հիշեցրեց, որ Հայաստանի ու Ռուսաստանի միջև առևտրաշրջանառության աճ է գրանցվել ընթացիկ տարվա առաջին կիսամյակին: