«Կանաչ աճի» գնահատումը Հայաստանում խթանվում է միջազգային համատեղ գործունեությամբ

 ԵԱՀԿ ու Տնտեսական համագործակցության զարգացման կազմակերպության (ՏՀԶԿ) համատեղ ջանքերով տեղի ունեցավ աշխատաժողով, որի ընթացքում ներկայացվեցին ՏՀԶԿ մշակած ազգային տնտեսության «կանաչացման» ջանքերի գնահատման մեթոդոլոգիաները: Հանդիպումը կայացավ ԵԱՀԿ-ի «Աջակցություն հյուրընկալող երկրին՝ կայուն շուկայական տնտեսության անցմանը և տնտեսական կայունության ապահովման» ծրագրի, ՏՀԶԿ-ի ղեկավարած ու Ե Մ-ի ֆինանսավորված EaP GREEN ծրագրի շրջանակներում:

«Հանդիպման hիմնական նպատակն է ՀՀ կառավարության, պետական մարմինների, էկոնոմիկայի ու բնապահպանության նախարարության, ինչպեսնաև ՀՀ վիճակագրական ծառայության հետ քննարկել, թե ինչպես կարելի է բարձրացնել  բնակչության իրազեկվածությունը շրջակա միջավայրի ևտնտեսության  փոխհարաբերությունների մասին»,- «Արմենպրես»-ի փոխանցմամբ՝ նշեց ՏՀԶԿ շրջակա միջավայրի տնօրինությունում ծրագրերիավագ ղեկավար Կրիշտոֆ Միխալակը: Աշխատանքային հանդիպումը դիտարկեց այն գործիքները, որոնց օգնությամբ կարելի է պարզել, թե Հայաստանն ինչպիսի առաջընթաց է  ձեռք բերում տնտեսությունն ավելի կանաչ՝ էկոլոգիապես մաքուր դարձնելու և բնակչության բարեկեցությունն ապ ահովելու ուղղությամբ՝ միևնույն ժամանակ պաշտպանելով Հայաստանի բնական պաշարները: Քննարկվեց նաև բոլոր պետական մարմիններում «կանաչ աճի» չափման մոտեցումը կիրառելու հարցը:

«Մենք վաղուց համագործակցում ենք Հայաստանի հետ մի շարք հարցերով՝ կապված շրջակա միջավայրի և տնտեսության հետ: Սովորաբար դիտարկում ենք, թե ինչպես կարելի է կիրառել իրավակարգավորիչ դաշտի բարեփոխումները, և առավել արդյունավետ կիրառել գործիքները երկրի տնտեսական զարգացմանը աջակցելու համար»,- ասում է Միխալակը: Նա հավելեց, որ հանքարդյունաբերության ոլորտը ՏՀԶԿ երկրներում, անշուշտ, շատ մեծ ազդեցություն ունի շրջակա միջավայրի վրա: Այդ առումով հարկավոր է հանքարդյունաբերողների հետ ապահովել սերտ համագործակցությունը, որպեսզի նրանք հնարավորինս լավ տեխնոլոգիաներ կիրառեն ու արագորեն արձագանքեն դժբախտ պատահարների, միջադեպերի դեպքում:

ԵԱՀԿ երևանյան գրասենյակի ղեկավար Արգո Ավակովը նշեց, որ «կանաչ աճի» ցուցանիշներն աստիճանաբար ավելի կարևոր գործիք են դառնում՝ կայուն տնտեսության զարգացումն առանձին երկրներում չափելու համար: «Մեր հիմնական խնդիրն է ոչ միայն մշակել այդ ցուցանիշները համապետական և մարզային մակարդակներում, այլև կորելացնել դրանք կառավարության տնտեսական զարգացման ծրագրերի հետ»,- ասաց Ավակովը: Ըստ նրա՝  ՀՀ-ն մինչ օրս կախվածություն ունի բնական պաշարներից և հումքից, իսկ երկրին ներհատուկ «կանաչ աճի» ցուցանիշի մշակումն էապես կնպաստի տնտեսական քաղաքականության իրականացմանը:

ՀՀ էկոնոմիկայի առաջին փոխնախարար Գարեգին Մելքոնյանը նշեց, որ վերջին տարվա ընթացքում մեկնարկել է անցում ՄԱԿ-ի «Հազարմյակի զարգացման նպատակներից» դեպի «Կայուն զարգացման նպատակներ»: Այս նոր մոտեցման շրջանակում բավական տեղ է հատկացվում բնապահպանական հարցերին: Այդ առումով,  ՀՀ նոր ընդունած Սահմանադրության և ընդհանուր կառավարական գործունեության մոտեցումների համաձայն, սոցիալական,  բնապահպանական և տնտեսական զարգացումը պետք է ունենա ներդաշնակ աճ ու հնարավորինս ծառայի փոխադարձ պաշտպանությանն ու առաջընթացին: