ՌԴ արդարադատության նախարարությունը դադարեցրել է Ղրիմաթաթարական ժողովրդի մեջլիսի գործունեությունը

 Ռուսաստանի Դաշնության արդարադատութւյան նախարարությունը դադարեցրել է Ղրիմում Ղրիմաթաթարական ժողովրդի մեջլիսի գործունեությունը` մտցնելով այն կազմակերպությունների ցանկի մեջ, որոնք արգելված են իրենց ծայրահեղական գործունեության համար:

Այս մասին, ինչպես հաղորդում է «Արմենպրես»-ը, հայտնում է ՌԴ արդարադատության նախարարության մամուլի ծառայությունը:

Նշվում է, որ միավորումը ծայրահեղական կազմակերպությունների ցուցակ է մտցվել Ղրիմի դատախազի՝ հասարակական միավորման գործունեությունը դադարեցնելու մասին որոշման հիման վրա:

Մեջլիսը Ռուսաստանում հանդիսանում է չգրանցված կազմակերպություն, որը հավակնում է Ղրիմի թաթարների ներկայացուցչական մարմնի կարգավիճակի:

Մեջլիսի նախկին եւ ներկայիս առաջնորդներ, Ուկրաինայի Գերագույն ռադայի պատգամավորներ Մուստաֆա Ջեմիլեւը եւ Ռեֆաթ Չուբարովը բնակվում են Կիեւում: Ղրիմի դատախազությունը գտնում է, որ նրանք մասնակից են թերակղզու էներգետիկական շրջափակմանը:

Ղրիմի Գերագույն դատարանը ներկայում քննում է հանրապետության դատախազ Նատալյա Պոկլոնսկայայի՝ Ղրիմաթաթարական ժողովրդի մեջլիսի ծայրահեղական ճանաչելու եւ նրա գործունեությունը Ռուսաստանում արգելելու մասին հայցը:

Նատալյա Պոկլոնսկայան կազմակերպության գործունեությունը դադարեցրել է 2016 թվականի ապրիլի 13-ին:

«Մեջլիսին արգելվում է օգտվել բոլոր պետական եւ քաղաքապետական ԶԼՄ-ներից, անցկացնել տարբեր հրապարակային զանգվածային միջոցառումներ, օգտագործել բանկային ավանդներ եւ ընդհանրապես որեւէ աշխատանք անցկացնել: Նրանց ամբողջ պրոպագանդան արգելվելու է», -Facebook-ի իր էջում գրառել էր Նատալյա Պոկլոնսկայան:

Ռուսաստանյան ԶԼՄ-ներն ավելի վաղ հայտնել էին, որ Ղրիմի դատարանը հեռակա ձերբակալել է Ղրիմաթաթարական ժողովրդի մեջլիսի նախկին առաջնորդ Մուստաֆա Ջեմիլեւին:

Հետաքրքիր է, որ օրերս Թուրքիա կատարած այցին Ադրբեջանի նախագահ Իլհամ Ալիեւն ու արտգործնախարար Էլմար Մամեդյարովը Ստամբուլում հանդիպել են ղրիմցի թաթարների առաջնորդներ Մուստաֆա Ջեմիլեւի եւ Ռեֆաթ Չուբարովի հետ: Այդ հանդիպումը փաստող լուսանկարը հրապարակվել է Ղրիմաթաթարական մեջլիսի «նախագահ» Ռեֆաթ Չուբարովի բլոգում:

Լուսանկարում երեւում է, որ Իլհամ Ալիեւը և Էլմար Մամեդյարովը զրուցում են Մուստաֆա Ջեմիլեւի եւ Ռեֆաթ Չուբարովի հետ:

Ուկրաինական ԶԼՄ-ներն օրերս հայտնել են, որ համացանց թափանցած գաղտնի փաստաթղթերի համաձայն` ուկրաինական հատուկ ծառայությունների աշխատակիցները երկար ժամանակ հետեւել են Ղրիմում թաթարների մեջլիսի առաջնորդ Մուստաֆա Ջեմիլեւի գործունեությանը եւ եզրակացության հանգել, որ նա աշխատում է թուրքական հետախուզության օգտին եւ սպառնալիք է ներկայացնում ազգային անվտանգությանը:

Այդ գաղտնի նյութերի համաձայն` անվտանգության ծառայությունը համարում է, որ բոլորը հիմքերն ունի Ջեմիլեւին որպես «թուրքական հատուկ ծառայությունների ազդեցության գործակալ» կասկածելու գծով հետաքննություն անցկացնելու համար այն բանից հետո, երբ նա եւ Ղրիմի ադրբեջանական համայնքի ղեկավար Ռահիմ Հումբաթովը 2013 թվականին ակտիվորեն առաջ են տարել գերմանացի ֆաշիստների հետ համագործակցելու համար 1944 թվականին կղզուց ղրիմցի թաթարների արտաքսումը «ցեղասպանություն» ճանաչելու մասին օրինագիծ: