Միջազգային հանրությունը չունի բավարար կամք և իրավական կառուցակարգեր՝ միջազգային իրավունքի սկզբունքները պաշտպանելու համար. փաստաբան
SOCIETY«Ադրբեջանի գործողություններում ակնհայտ էին միջազգային մարդասիրական իրավունքի նորմերի լուրջ խախտումներ,- Past.am-ի հետ զրույցում նշեց փաստաբան Տիգրան Սարգսյանը»:
Ըստ փաստաբանի` զինված ընդհարումների ժամանակ մարդասիրական իրավունքի նորմերի լուրջ խախտումներ են ռազմական գործողություններին անմիջականորեն չմասնակցող խաղաղ բնակչության, վիրավորների, հիվանդների, բժշկական կամ հոգևոր անձնակազմի սպանությունը, խոշտանգումները և անմարդկային վերաբերմունքը, դիտավորությամբ լուրջ տառապանք պատճառելը կամ անձի ֆիզիկական կամ հոգեկան վիճակին սպառնացող այլ գործողություններ կատարելը:
Սարգսյանը նշեց, որ զինված ընդհարումների ժամանակ մարդասիրական իրավունքի նորմերի լուրջ խախտումներ են նաև քաղաքացիական բնակչության կամ առանձին քաղաքացիական անձանց վրա հարձակումը, չպաշտպանվող տարածքները և ապառազմականացված գոտիները հարձակման օբյեկտ դարձնելը:
Փաստաբանը ափսոսանք հայտնեց, որ միջազգային հանրությունը չունի բավարար կամք և իրավական կառուցակարգեր` միջազգային իրավունքի սկզբունքները պաշտպանելու համար:
Լևոն Փանոսյան



