Մենք ցանկանում ենք լինել միջազգային հանրության լիիրավ անդամ. ԼՂՀ Նախագահ
SOCIETYԱրցախի հայությունն ընտրել է սեփական ճակատագիրը ժողովրդավարական սկզբունքների համաձայն կառուցելու ուղին: Ինչպես հաղորդում է «Արմենպրես»-ը, այս մասին լրագրողների հետ Ստեփանակերտում հանդիպման ժամանակ ասել է Արցախի Հանրապետության Նախագահ Բակո Սահակյանը:
«Մենք ցանկանում ենք, որ միջազգային հանրության ուշադրությունն Արցախին սևեռված լինի ոչ միայն պատերազմական և ռազմական գործողությունների շրջանում: Այն, որ մենք դժգոհում ենք միջազգային հանրության առաքելությունից, դժգոհում ենք նաև այն առումով, որ ստեղծվել է անհասկանալի անջրպետ Արցախի և արտաքին աշխարհի միջև: Մենք ընտրել ենք այս ուղին, այս ինքնուրույն, մեր սեփական ճակատագիրը կառուցելու ուղին` ժողովրդավարական սկզբունքների համաձայն` ցանկություն հայտնելով և հայտ ներկայացնելով միջազգային հանրությանը, որպեսզի լինենք նրա լիիրավ անդամ»,- ասել է Բակո Սահակյանը:
Նա հերթական անգամ շնորհակալություն է հայտնել այս օրերին Արցախում տեղի ունեցող դեպքերը լուսաբանող օտարերկրյա լրատվամիջոցների ներկայացուցիչներին` նշելով, որ նաև նրանց շնորհիվ է միջազգային հանրության ուշադրությունն այս օրերին սևեռված իրենց վրա:



