Ֆավորիտները հաղթեցին, սակայն նվազագույն հաշիվը վտանգավոր է

Կատալոնական «Բարսելոնան» ու Մյունխենի «Բավարիան» նվազագույն առավելությամբ հաջողության են «Չեմպիոնների լիգայի» խաղարկության 1/4  եզրափակիչի առաջին հանդիպումներում:

«Արմենպրես»-ը հայտնում է, որ ապրիլի 5-ին տեղի են ունեցել եվրոպական ֆուտբոլի ամենահեղինակավոր մրցաշարի քառորդ եզրափակիչ փուլի հանդիպումները` «Բարսելոնա»-«Ատլետիկո» և «Բավարիա»-«Բենֆիկա»:

Իսպանական «Լա լիգայում» այս մրցաշրջանում կատալոնական «Բարսելոնան» արդեն երկու անգամ հաղթել էր Մադրիդի «Ատլետիկոյին», ինչը ֆուտբոլային տեսաբանների համար հիմք էր` պնդելու, որ չնայած բարդ կլինելի Լուիս Էնրիկեի թիմի համար, սակայն «ատլետիները» ամենևին էլ անպարտելի չպետք է լինեն «Կամպ Նոու» մարզադաշտում: «Ատլետիկոյի» գլխավոր մարզիչ Դիեգո Սիմեոնեն իր հերթին վստահ էր, որ Կատալոնիա է հասել ամենևին էլ ոչ պարտվելու կամ ոչ-ոքի խաղալու համար՝ չնայած դեմ չէր լինի, եթե հանդիպումն ավարտվեր ոչ-ոքի:

«Բարսելոնա»-«Ատլետիկո» դիմակայությունը կարելի է բաժանել իրարից լիովին տարբեր երկու մասի` խաղ մինչև «Ատլետիկոյի» հարձակվողի հեռացումը խաղադաշտից և 10 հոգով պայքար ընդդեմ աշխարհի լավագույն հարձակման: Մրցավեճի առաջին րոպեներից որևէ անակնկալ չեղավ. «Ատլետիկոն», ունենալով խիստ պաշտպանողական մարտավարություն, փորձում էր օգտվել դաշտի տերերի սխալներից: «Բարսելոնան» իր հերթին տոտալ հարձակման էր անցել. գրոհներին միանում էին ոչ միայն եզրային պաշտպանները, այլև կիսապաշտպանները և կենտրոնական պաշտպանները:

«Ատլետիկոյի» դարպասի մոտ վտանգավոր իրավիճակներ ավելի հաճախ էին, քան մադրիդյան թիմի սեփական գրոհները: Ե՛վ Նեյմարն ու Լեո Մեսսին, և՛ Իվան Ռակիտիչն ու Անդրես Ինյեստան լավ գիտեին, թե ինչպես է պետք շրջանցել «Ատլետիկոյի» խուլ պաշտպանությանը, սակայն գրավել մրցակցի դարպասն այդպես էլ չէր հաջողվում: Մադրիդյան թիմն էլ իր հերթին միայն պաշտպանվելով չէր զբաղված. «Ատլետիկոյի» ֆուտբոլիստները ակտիվ ճնշման էին դիմում, փորձում արագորեն գնդակ խաղարկել, հակագրոհել, հեռվից հարվածներով զգոն պահել «Բարսելոնայի» դարպասապահ Մարկ-Անդր ե տեր Շտեգենին:

Գրագետ կազմակերպված հակագրոհներից մեկի ժամանակ «ատլետների» հարձակվող Ֆեռնանդո Տորեսին հաջողվեց գնդակը դարպասապահի ոտքերի արանքով մխրճել ցանցի մեջ` առաջ մղելով իր թիմին: «Բարսելոնայի» արձագանքը Տորեսի խփած գնդակին ամենևին էլ արագ չստացվեց, և գուցե չստացվեր էլ, եթե հանդիպումը սպասարկող գլխավոր մրցավար Ֆելիքս Բրիխը չորոշեր Սերխիո Բուսկետսի դեմ դաշտի կենտրոնում կոպիտ խաղի համար երկրորդ դեղին քարտը ցույց տալ գոլի հեղինակ դարձած Տորեսին:

Առաջին խաղակեսում չկարողանալով գտնել մրցակցի դարպասը խոցելու տարբերակներ` Մեսսին ու թիմակիցները երկրորդ խաղակեսն սկսեցին շատ ավելի ակտիվ` ճնշելով 10 հոգով մնացած թիմին: Մրցակցի դարպասին ամբողջական ճնշումն արդյունք տվեց. հանդիպման 62-րդ րոպեին Լուիս Սուարեսը, ով մինչև այդ մեծ ակտիվություն չէր ցուցաբերել, ճիշտ պահին ճիշտ տեղում էր` Խորդի Ալբայի սուր փոխանցումից հետո գնդակի ուղղությունը շեղելով դեպի Յան Օբլակի պաշտպանած դարպասը: Մինչ «ատլետները» պնդում էին խաղից դուրս իրավիճակի մասին, կատալոնական թիմի ֆուտբոլիստները մեծ խանդավառությամբ նշեցին խփված գնդակը: Այն ասես թևեր տվեց «Բարսելոնայի» ֆուտբոլիստներին, ովքեր առաջ նետվեցին հաղթանակ կորզելու համար:

Հանդիպման 74-րդ րոպեին եզրային պաշտպան Դանի Ալվեշի փոխանցմանը գլխի շեշտակի ու դիպուկ հարվածով արձագանքեց «Բարսելոնայի» ուրուգվայցի ռմբարկուն` Սուարեսը` խփելով «Չեմպիոնների լիգայի» խաղարկությունների շրջանակում իր15-րդ գնդակը (նա ներկայիս անվանի ֆուտբոլիստներից ամենից արագն է հասել նմանօրինակ արդյունքի. պահանջվել է 23 հանդիպում):

Խաղատախտակին հաղթական հաշիվ տեսնելով` «Բարսելոնայի» ֆուտբոլիստները թուլացրին ճնշումը` թույլ տալով «Ատլետիկոյին» հանգիստ շունչ քաշել ու մտածել ընդամենը մի քանի օր անց Մադրիդում կայանալիք պատասխան հանդիպման մասին: Չնայած «Բարսելոնայի» տարածքային ու խաղային առավելությանը, այնուամենայնիվ արձանագրված 2-1 հաշիվը դեռևս լավ հնարավորություն է տալիս «Ատլետիկոյին» հաջորդ փուլ դուրս գալ. հարկավոր է սեփական հարկի տակ հաղթել ուժեղ մրցակցին կամ նվազագույն հաշվով ու գոլ բաց չթողնելով, կամ ուղղակի 2 գնդակի տարբերությամբ: Օր եր անց Մադրիդի «Վիսենտե Կալդերոն» մարզադաշտում կայանալիք պայքարը խոստանում է շատ հարցերի պատասխան տալ:

 «Բավարիա»-«Բենֆիկա» դիմակայությունում գլխավոր ֆավորիտ համարվող մյունխենցիներից «Ալյանս Արենա» մարզադաշտ եկած մարզասերները գոլային հրավառություն էին ակնկալում, սակայն դեռ հանդիպումից առաջ «Բավարիայի» գլխավոր մարզիչ Խոսեպ Գվարդիոլան հայտարարել էր, որ իր թիմին բաժին է ընկել բավականին ամուր մրցակից, որն ունակ է թե՛ գրագետ պաշտպանվել, թե՛ պետք եղած դեպքում արագ հակագրոհել` խնդիրներ ստեղծելով ցանկացած մրցակցի պաշտպանությունում:

Ու չնայած Արթուրո Վիդալի` հանդիպման արդեն 2-րդ րոպեին խփած գնդակն արագորեն առաջ մղեց բավարացիներին, սակայն խաղի հետագա ընթացքը ցույց տվեց, որ Գվարդիոլան բավականին ճիշտ էր բնորոշել մրցակցին: Իհարկե, ամբողջ խաղի ընթացքում «Բավարիայի» ձեռքում էր թե՛ խաղային, թե՛ տարածքային առավելությունը, սակայն դրանք խփված գնդակների չէին վերածվում. գերազանց էին գործում «Բենֆիկայի» պաշտպանները, իսկ եթե վերջիններս չէին հասցնում փակել «Բավարիայի» այս կամ այն աստղին, այդ դեպքում հիանալի էր խաղում պորտուգալական թիմի դարպասապահը:

Թոմաս Մյուլլերը, Ռոբերտ Լևանդովսկին, Վիդալը, Ֆրանկ Ռիբերին ու Դուգլաս Կոստան ոչ մեկ անգամ անհանգստացրին «Բենֆիկայի» պաշտպաններին ու դարպասապահին, սակայն այդպես էլ 2-րդ գնդակը չխփվեց, ավելին` պորտուգալական թիմի հարձակման առաջատարներ Խոնասը մրցակցի դարպասը գրավելու 2 շատ լավ հնարավորություն ձեռքից բաց թողեց: «Բավարիայի» նվազագույն` 1-0 հաշվով հաղթանակը  ֆուտբոլասերների համար լրացուցիչ հետաքրքրության առիթ է. չէ՞ որ «ինչպես կխաղա զույգի ֆավորիտը մրցակցի հարկի տակ» հարցն այժմ տանջում է բոլորին:

Ապրիլի 6-ին սպասվում են «Չեմպիոնների լիգայի» մրցաշարի 1/4 եզրափակիչ փուլի մյուս երկու զույգերի` «Վոլֆսբուրգ» (Գերմանիա) - «Ռեալ» (Իսպանիա) և «ՊՍԺ» (Ֆրանսիա) - «Մանչեսթեր Սիթի» (Անգլիա) հանդիպումները, որոնց մասին «Արմենպրես»-ը ավելի ուշ կներկայացնի նախախաղային տեսություն: