Կյանքի գնով ոչնչացրել էր մեկ տանկ եւ տասնյակ թշնամիների. Տեղի է ունեցել Արմենակ Ուրֆանյանի հոգեհանգիստը
SOCIETYNews.am-ը գրում է.
Երեւանի Սուրբ Հովհաննես եկեղեցում այսօր՝ ապրիլի 5-ին, տեղի է ունեցել շփման գծում ադրբեջանական ագրեսիան հետ մղելիս զոհված Արմենակ Ուրֆանյանի հոգեհանգիստը:
Հոգեհանգստին ներկա էին նրա հարազատները, ծառայակից ընկերները:
4-րդ հրաձգային վաշտի հրամանատար, կապիտան Արմենակ Ուրֆանյանն իր անձնակազմի հետ երկար մարտի է բռնվել հակառակորդի հետ: Հակառակորդի գերազանցող ուժերի ճնշման տակ անձնակազմին հետ ուղարկելով՝ միայնակ նա շարունակել է մարտը՝ խոցելով մեկ տանկ եւ մոտ մեկ տասնյակ թշնամու զինվոր: Վերջում մի քանի նռնակներ նետելով՝ չի թողել իրեն շրջապատեն ու վերջին նռնակով իր հետ միասին պայթեցրել է մոտեցողներին:
Նշենք, որ Արմենակ Ուրֆանյանը 26 տարեկան էր, Զինված ուժերում ծառայում էր 2007թ.-ից:
Հիշեցնենք, որ ապրիլի 2-ից գիշերը իրավիճակը Լեռնային Ղարաբաղի հակամարտության գոտում կտրուկ լարվել է։ Պարբերաբար կրակոցներից եւ մասնակի դիվերսիոն հետախուզական փորձերից Ադրբեջանն անցում է կատարել մասշտաբային հարձակման շփման գծի ողջ երկայնքով՝ օգտագործելով հրետանի, ծանր տեխնիկա եւ ավիացիա։ Սրանք ամենախոշոր գործողություններն են 1994 թվականին հաստատված հրադադարի ռեժիմից հետո, որոնք ձեռնարկել է Ադրբեջանի զինուժը: Երկու կողմերից էլ կան զոհեր։



