Արամ MP3-ը, Սոսո Պավլիաշվիլին, Յուրա Մովսիսյանը, Սաթի Ջանիբեկյանը՝ նոր կինոկատակերգությունում

LIFE 23 March, 2016 21:26

Aysor.am-ը գրում է.

Ծիծաղի օրը ծիծաղով կլցվի Մոսկվա կինոթատրոնը. բարձր տրամադրությունը ստանձնել է ապահովել ապրիլի 1-ին մեծ էկրան բարձրացող «Առաջին դեմք» ֆիլմի ստեղծագործական կազմը: 1 ժամ 46 րոպե տևողությամբ ռոմանտիկ կինոկատակերգության սցենարի հեղինակներն են «ԱրմՔոմեդի» հաղորդման վարողներ Նարեկ Մարգարյան և Սերգեյ Սարգսյան: Aysor.am-ը հյուրընկալել է ֆիլմի ռեժիսոր Հրանտ Երիցկինյանին:

-Քանի որ արդեն ֆիլմի պրեմիերայի օրը որոշված է, կարելի է ասել՝ բոլոր աշխատանքներն ավարտված են…

-Այո, նկարահանումները սկսել ենք հոկտեմբերի 4-ին, ավարտել՝ նոյեմբերի 24-ին: Ի սկզբանե որոշել էինք, որ այն մեծ էկրան կբարձրանա գարնանը: Այնպես որ, մենք մեր խոսքի տերը եղանք (ժպտում է):

-Կարելի է ենթադրել, որ ապրիլի 1-ը՝ ծիծաղի օրը, հատուկ է ընտրվել:

-Իսկապես, հատուկ ենք ընտրել, որպեսզի մարդիկ այդ օրը լիաթոք ծիծաղելու ևս մեկ հնարավորություն ունենան:

-Թեև արդեն որոշակի տեղեկություններ ունենք ֆիլմի մասին, բայց կցանկանայի փակագծերն ավելին բացել…

-Հետաքրքիր, զվարճալի, ընտանեկան և դինամիկ ֆիլմ է, որը կարելի է դիտել ամբողջ ընտանիքով, ու բարձր տրամադրությամբ ու լիցքերով վերադառնալ տուն: Ինչո՞ւ ոչ, շատերը նաև որոշ բաներ կքաղեն այս ֆիլմից: Գլխավոր հերոսը հայտնվել է իր համար ոչ սովորական իրավիճակում. Գրիգոր Աստվածատրյանը (Արամ MP3) նախագահ է, ով չգիտի, թե ինչ է կատարվում իր շուրջը, իր միջավայրում… Նկարահանումներն իրականացրել ենք Երևանում, ստեղծագործական կազմն ամեն ինչ արել է, որ գեղեցիկ ու հետաքրքիր աշխատանք ստացվի: Չեմ ցանկանում շատ մանրամասնել, քանի որ ավելի լավ է մեկ անգամ դիտել, քան՝ անընդհատ լսել:

-Բացի Արամ MP3-ը, ովքե՞ր են ընդգրկված ֆիլմի դերասանական կազմում:

-Սաթի Ջանիբեկյանը, Աննա Գրիգորյանը, Դավիթ Թադևոսյանը, Արա Դեղտրիկյանը, «ԱրմՔոմեդիի» Նարեկ Մարգարյանն ու Սերգեյ Սարգսյանը, երգիչ Սոսո Պավլիաշվիլին, ֆուտբոլիստ Յուրա Մովսիսյանը:

-Յուրա Մովսիսյանն ի՞նչ կերպարով է հանդես գալու:

-Հենց իր՝ Յուրա Մովսիսյանի կերպարով, ինքն իրեն է խաղում (ժպտում է):

-Նկատելի է, որ ֆիլմում ներգրավված դերակատարների մեծ մասը մասնագիտությամբ դերասաններ չեն:

-Նախ ասեմ, որ երբ սցենարը ստացա, հենց այդ կերպարներում տեսա Սերգեյին ու Նարեկին: Արամի մարմնավորած Գրիգոր Աստվածատրյանի կերպարում էլ շատերին ենք փորձել, ի վերջո հասկացանք, որ հենց նրա հետ աշխատելն է հետաքրքիր: Արդյունքում՝ ստացվեց այն, ինչ ես էի ուզում:

-Որպես ռեժիսոր՝ Ձեզ համար բարդ չէ՞ր ոչ պրոֆեսիոնալների հետ աշխատելը:

-Կոնկրետ Արամի հետ կապված ասեմ, որ աշխատել ենք միմյանց շատ լավ հասկանալով: Նա տաղանդավոր անձնավորություն է, ոչ մի խնդիր կամ դժվարություն չենք ունեցել նկարահանման հրապարակում:

-Ի վերջո, երկրի առաջին դեմք լինելը Գրիգոր Աստվածատրյանի երազա՞նքն էր, ցանկությունը, թե՞ իրականացած նպատակը…

-Դա երազ է, իրականություն, թե պատկերացում՝ թող հանդիսատեսն իմանա ապրիլի 1-ին (ծիծաղում է):

-Ֆիլմը սաունդթրեյք կունենա՞:

-Անպայման: Այն դուրս կգա ապրիլի վերջին, բայց թե ո՞ւմ կատարմամբ՝ թող մնա անակնկալ:

-Յուրաքանչյուր աշխատանքի համար գլխավոր ու կարևոր նախապայման է նաև լավ բյուջե ունենալը: Որքա՞ն է կազմում այս ֆիլմի բյուջեն:

-Անկեղծ ասած, ես այդ թվերին չեմ տիրապետում, քանի որ դրանով զբաղվել են միայն պրոդյուսերները:

-Կինոթատրոնների էկրաններին որոշ ժամանակ մնալուց հետո ֆիլմերը հայտնվում են հեռուստաէկրաններին: Արդեն իսկ որոշվա՞ծ է, թե երբ հեռուստադիտողը կկարողանա դիտել «Առաջին դեմք»-ը:

-Այդ մասին խոսելը դեռևս շուտ է: Այս ֆիլմը դեռ շրջագայելու է Հայաստանի բոլոր մարզերով, էկրան է բարձրանալու Միացյալ Նահանգներում, Կանադայում, Ղազախստանում, Ռուսաստանում: Կլինի ֆիլմի նաև ռուսերեն տարբերակը՝ ռուսախոս հանրության համար: Այնպես որ, կարելի է ասել՝ գրեթե երկու տարի այն հեռուստացույցով չի ցուցադրվի, երկար ճանապարհ ունենք:

-Վերջին տարիներին հատկապես կատակերգական ժանրի ֆիլմեր Հայաստանում քիչ չեն նկարահանվում: Ինչո՞վ կառանձնանա «Առաջին դեմք»-ը մյուսներից:

-Նախ ասեմ՝ շատ ուրախ եմ այն փաստից, որ շատ ֆիլմեր են նկարահանվում: Ներքին շուկան աշխույժ է: Ես չեմ կարող իմ ֆիլմին որակավորում տալ, հանդիսատեսի արձագանքն այդ հարցի ամենաճիշտ պատասխանն է: Միայն կասեմ, որ մեր ֆիլմը յուրահատուկ է իր տեսակով, բովանդակությամբ և սցենարով: Էլ չասեմ, որ շատ դերակատարների համար սա դեբյուտ է, նույն Արամ MP-ը առաջին անգամ է հանդես գալիս գեղարվեստական ֆիլմում: Թեև այդ բառը չեմ սիրում, բայց փորձել ենք առանձնանալ դաշտում…

-Շնորհակալ եմ զրույցի համար, հուսանք՝ ապրիլմեկյան ծիծաղն ապահովված է:

-Ես ևս շնորհակալ եմ, բոլորին սիրով սպասում ենք: