Փարաքարում դանակի 44 հարվածով սպանված կնոջ ամուսինը գրեթե հույս չունի, որ գործը կբացահայտվի
SOCIETYԱրմավիրի մարզի Փարաքար գյուղում 2015թ. փետրվարի 5-ին դանակի 40-ից ավելի հարվածներից մահացած 51-ամյա Անահիտ Զաքեւոսյանի ամուսինը զարմացած է` ինչու մեկ տարվա ընթացում գործը չի բացահայտվել այն դեպքում, երբ սպանություն կատարողի արյունը թափված է եղել տան բակում:
«Տնից դուրս է եկել, գնացել ու թռել է ցանկապատի վրայով: Արյան հետքերն էլ մնացել են ճանապարհին»,- ասաց Ավետիք Զաքեւոսյանը:
Ամուսինը արդեն գրեթե կորցրել է հույսը, որ կնոջ սպանությունը երբեւէ կբացահայտվի, քանի որ կարծում է` դա պետք էր անել, երբ սպանության հետքերը դեռ թարմ էին:
Ավետիք Զաքեւոսյանը նշեց, որ իրենց ընտանիքը ոչ մի թշնամի չի ունեցել, գիշեր ու ցերեկ դուռը բաց է պահել` չկասկածելով վտանգի մասին:
«Մինչեւ դեպքը նույնիսկ նեղվում էի, երբ գիշերը տան դուռը փակում էինք: Հիմա արդեն վախեցել ենք, էլ դուռը բաց չենք թողնում»,- ասաց նա:
Նշենք, որ սպանությանը դեռ բացահայտված չէ, կասկածյալ չկա:
Հիշեցնենք, որ դեպքը տեղի էր ունեցել փետրվարի 5-ի երեկոյան, ժամը 21:00-ի սահմանում: Կինը տան հարեւանությամբ գտնվող իրենց խանութից գնացել էր տուն՝ ֆիլմ դիտելու, ինչից մեկ ժամ անց ամուսինը մտել էր տուն եւ կնոջը սպանված գտել: Կնոջը սպանել են դանակի 44 հարվածով:



