Պատգամավորը համոզված է, որ համամասնական ընտրակարգը թույլ կտա կուսակցություններին կայանալ
SOCIETYՀայաստանի քաղաքական դաշտում 2017թ-ին զգալի փոփոխություններ տեղի կունենան, և շատ համակարգերում դա արդեն նկատելի է: Մարտի 17-ին լրագրողների հետ հանդիպման ժամանակ նման կարծիք հայտնեց ԱԺ ԲՀԿ խմբակցության պատգամավոր Վահան Բաբայանը: Նա նշեց, որ նոր Սահմանադրությունը թելադրում է նոր իրողություններ, և պետք է շարժվել դրանց համըթնաց, ոչ թե նախկինում ընդունված մտածելակերպով: Ընտրական օրենսգրքի նախագծի մասին խոսելիս պատգամավորը նշեց, որ թե խորհրդարանական, թե արտախորհրդարանական ուժերը,ինչպես նաև քաղաքացիական հասարակությունը պետք է առաջարկներով հանդես գան և ակտիվ մասնակցություն ունենան այդ գործընթացում:
«Մեր երկրում հաստատվում է համամասնական ընտրակարգ, որպեսզի կուսակցությունները կարողանան կայանալ: Ներքաղաքական զարգացումների վերաբերյալ տրվում են մի շարք գնահատականներ, բայց պարզ է, որ նախընտրական տարին լինելու է տարբեր շոուներով և միջոցառումներով լի»,- «Արմենպրես»-ի փոխանցմամբ՝ ասաց պատգամավորը:
Բաբայանը մի քանի անգամ մատնանշեց, որ քաղաքական դաշտում կա «սերիալ» կազմակերպելու մոլուցք, որպեսզի հասարակության ուշադրությունը կենտրոցվի այս կամ այն քաղաքական ուժի զարգացումների վրա: Նրա կարծիքով` Հայաստանի քաղաքական դաշտը նոր քաղաքական գործիչների կարիք ունի: Նա նաև վստահեցրեց, որ «սերիալներին ու շոուներին» չի ցանկանում մասնակցել, դրա համար էլ հիմա անկուսակցական դիրքորոշում ունի:
ԲՀԿ-ից հեռանալու վերաբերյալ պատգմավորը նշեց, որ ավելացնելու նոր բան չունի: «Ես ունեի ներքին քաղաքական և ռազմավարական խնդիրների շուրջ տարաձայնություններ կուսակցության հետ: Ինտրիգներ փնտրելու կարիք չկա, ամեն ինչ պարզ ու թափանցիկ է»,- ասաց Բաբայանը: Իր ապագա անելիքների մասին Բաբայանը չցանկացավ շատ խոսել` թողնելով դա հաջորդ հանդիպմանը:



