Ադրբեջանի կառավարությունը 2 մլրդդոլար պարտք է փնտրում գազային նախագծերի իրականացման համար

Ադրբեջանի իշխանության ներկայացուցիչները  էներգետիկական նախագծերի ֆինանսավորման համար 2 մլրդ դոլար միջոց ձեռք բերելու նպատակով ուրբաթ գիշեր բանակցություններ են անցկացրել միջազգային ներդրողների հետ:

Այս մասին,հայտնում է the Financial Times թերթը` նշելով, որ ադրբեջանական «Հարավային գազային միջանցք» ընկերությունը կառավարության պարտատոմսերը վաճառքի հանելու համար վարձել է UniCredit, Citi եւ JPMorgan բանկային ընկերությունները:

Հոդվածում ասվում է, որ նավթի գների անկման եւ դրա հետեւանքով ստեղծված դժվար տնտեսական վիճակի հետ կապված՝ Ադրբեջանը 45 մլրդ դոլար արժողությամբ «Հարավային գազային միջանք» նախագծում խնդիրների առաջ է կանգնել12 մլրդ դոլար իր մասնաբաժինը վճարելու հարցում:

Ադրբեջանական կողմն այդ գումարը պետք է վճարի առաջիկա երեք տարում:

Նշվում է, որ ավելի վաղ Ադրբեջանի կառավարությունը ֆինանսական փաթեթի հարցը քննարկել էր Արժույթի միջազգային հիմնադրամի եւ Համաշխարհային բանկի հետ:

Նշվում է նաեւ, որ դրանից առաջ Ադրբեջանի ղեկավարությունը հայտարարում էր, որ երկիրը 30 մլրդ դոլարի սուվերեն հիմնադրամ ունի եւ հիշյալ նախագծի իրականացման համար պարտք վերցնելու կարիք չունի:

Բրիտանական թերթը գրել է նաեւ պարտք վերցնելու հետ կապված Ադրբեջանի առաջ կանգնած դժվարությունների գործոնների մասին:

Նշվում է, որ վերջին երկու ամիսներին աշխարհի բոլոր առաջատար վարկանիշային գործակալությունները Ադրբեջանի վարկային վարկանիշն իջեցրել են նվազագույն` «աղբային» սահմանի:

The Financial Times-ը գրում է, որ Բաքվի պարտք վերցնելու գործին նաեւ խանգարում են Ադրբեջանում մարդու իրավունքների աղետալի վիճակը, ինչպես նաեւ հիշյալ նախագծի հնարավոր բնապահպանական ռիսկերը:

Ադրբեջանցի տնտեսագետ, ԱՄՆ-ի  Duke համալսարանի տնտեսագիտության պրոֆեսոր, Տնտեսական հետազոտությունների կենտրոնիվերլուծաբան Գուբադ Իբադօղլուն «Ազատութուն» ռադիոկայանի հետ զրույցում ասել է, որ 2 մլրդ դոլար պարտք վերցնելու որոնումների հետ կապված՝ Ադրբեջանի կառավարությունը մարտի վերջին շարունակելու է բանակցությունները Համաշխարհային բանկի հետ:

Ադրբեջանական ԶԼՄ-ները հայտնել էին, որ հունվարի 28-ից Բաքվում գտնվող ԱՄՀ-ի եւ ՀԲ-ի պաշտոնական ներկայացուցիչները Ադրբեջանի ղեկավարության հետ քննարկել են այդ երկրին 4 մլրդ դոլար վարկ տալու հարցը: Սակայն բանակցություններն անակնկալ ավարտվել են: Դրանից հետո Ադրբեջանի նախագահ Իլհամ Ալիեւն ու ֆինանսների նախարար Սամիր Շարիֆովը հայտարարել են, որ վարկ վերցնելու մասին խոսք չկա, ինչից կարելի է ենթադրել, որ Ադրբեջանի ղեկավարությունը վարկի տոկոսների հարցում համաձայնության չի եկել միջազգային առաջատար ֆինանսական կազմակերպությունների հետ:

«Թուրան»-ին հասած տեղեկություններով` վարկեր տրամադրելու մասին Ադրբեջանի ղեկավարության խնդրանքին ԱՄՀ-ը եւ ՀԲ-ն 5 պահանջներ են առաջադրել պաշտոնական Բաքվին. լայն մասնավորեցում, պետապարատի կրճատում, իրական դատական բարեփոխում, աշխատավարձերի, թոշակների եւ պետական ծախսերի սառեցում, մուտք Առեւտրի համաշխարհային կազմակերպություն:

Նույն աղբյուրի համաձայն` այդ 5 պայմաններից Ադրբեջանի կառավարությունը համաձայնել է միայն առաջին երկուսին, ինչի հետեւանքով միջազգային կառույցներն անհնարին են համարել վարկերի տրամադրումը:

Միջազգային վարկանիշային Standart & Poor`s, Mood`s եւ Fitch Ratings գործակալություններն այս տարվա հունվար-փետրվարին մեկ դիրքով իջեցրել են Ադրբեջանի երկարաժամկետ վարկային վարկանիշը եւ նրան շնորհել արտասահմանյան եւ տեղական արժույթով երկարաժամկետ եւ կարճաժամկետ սուվերեն վարկային BB+` «աղբային» մակարդակի վարկանիշ, ինչն իր հերթին նշանակում է, որ Ադրբեջանն այսուհետև միջազգային վարկեր կարող է ներգրավել միայն ավելի բարձր տոկոսներով:

The Financial Times թերթը գրում է, որ Ադրբեջանի արտահանման 95 տոկոսից ավելին կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձեւավորվում է էներգակիրների արտահանումից ստացվող եկամուտների հաշվին: