Ճապոնիայի դեսպանատունը «շփոթվել է» ԱԳՆ կանչից հետո դեսպանի չներկայանալու պատճառի հարցում. Լավրով

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ռուսաստանը կանչել է Ճապոնիայի դեսպան Ակիրա Մուտոյին այն բանից հետո, երբ Տոկիոն բողոք է հայտնել ՌԴ նախագահ Վլադիմիր Պուտինի՝ Իթուրուպ կատարած այցի կապակցությամբ, սակայն դեսպանատանը «շփոթվել են» և ասել, որ դիվանագետը չի կարողանա այցելել արտաքին գործերի նախարարություն ո՛չ օգոստոսի 14-ին, ո՛չ էլ 17-ին՝ առանց հստակ բացատրելու պատճառը։ Այդ մասին մամուլի ասուլիսում հայտարարել է Ռուսաստանի ԱԳՆ ղեկավար Սերգեյ Լավրովը, հայտնում է ՏԱՍՍ-ը:

«Երբ մենք իմացանք, թե ինչպես են տիկին Տակաիչին, նրա արտգործնախարարը որակել մեր նախագահի այցը սեփական հողին, սեփական քաղաքացիների մոտ, մենք անմիջապես կանչեցինք Ճապոնիայի դեսպանին։ Մեզ ոչ այնքան հստակ պատասխանեցին դեսպանատնից, նրանք շփոթվեցին, իսկ հետո բացատրեցին, որ դեսպանը չի կարողանա ո՛չ ուրբաթ՝ օգոստոսի 14-ին, ո՛չ էլ երկուշաբթի՝ օգոստոսի 17-ին, այսինքն՝ այսօր, որ նա կամ Մոսկվայում չէ, կամ իրեն լավ չի զգում։ Մենք այդպես էլ չհասկացանք դա»,- ասել է Լավրովը՝ պատասխանելով ՏԱՍՍ-ի հարցին՝ Պուտինի՝ Իթուրուպ կատարած այցի կապակցությամբ ճապոնական կողմի հայտարարած բողոքին Մոսկվայի արձագանքի մասին

Ռուսաստանի ԱԳՆ ղեկավարը նշել է, որ ճապոնական կողմի նման պատասխանը զարմանք է առաջացնում, քանի որ պարոն դեսպանը հայտնի է իր չմարող եռանդով։

«Նա այստեղ է ժամանել մի քանի տարի առաջ և անընդհատ ինչ-որ տեղ ակտիվություն է ցուցաբերում, փորձում է ինչ-որ մեկի հետ հանդիպել»,- նկատել է նախարարը։

Այս կապակցությամբ Ռուսաստանի արտաքին քաղաքական գերատեսչության ղեկավարը պատմել է, որ վերջերս Մուտոն առանց համաձայնեցման, նույնիսկ առանց նախարարությանը տեղեկացնելու բերել է գործարարների ինչ-որ պատվիրակություն, անհասկանալի է, թե ինչ օրակարգով, անհասկանալի է, թե ում հետ էր պլանավորում հանդիպել։

«Բայց արդյունքում նրանց հետ հանդիպել են և՛ մեր նախարարության, և՛ Արդյունաբերության և առևտրի նախարարության ներկայացուցիչները: Բայց հանկարծ սկսեց պարզվել, որ այցի ավարտին պարոն դեսպանը կազմակերպել է ինչ-որ անհասկանալի աշխատանքային խումբ, հետո նրանք սկսեցին հրաժարվել»,- հստակեցրել է Լավրովը: 

«Այսինքն՝ նման չմարող եռանդի դեպքում այն, որ մարդու մոտ առողջության հետ կապված լավ չի եղել, երբեմն պատահում է։ Բայց ամեն դեպքում մենք պարոն դեսպանին կանչել ենք։ Նա պետք է գա ԱԳՆ, և մենք կխոսենք թե՛ ճապոնական ղեկավարության պահվածքի մասին՝ նախագահ Պուտինի՝ ռուսական Իթուրուպ կղզի կատարած այցի կապակցությամբ, թե՛ այն մասին, թե ինչպես դեսպանը պետք է կառուցի իր աշխատանքը ընդունող երկրում՝ հարգելով և՛ նրա օրենքները, և՛ այն ընթացակարգերը, որոնք գոյություն ունեն արտասահմանյան դիվանագետների համար այդ երկրում, տվյալ դեպքում՝ Ռուսաստանում»,- նշել է Լավրովը:

Հիշեցնենք, որ Պուտինն ավելի վաղ ժամանել էր Սախալինի մարզ, որտեղ նախագահն աշխատանքային հանդիպում է անցկացրել մարզի նահանգապետ Վալերի Լիմանրենկոյի հետ, իսկ Իթուրուպ կղզում նա ծանոթացել է մի շարք սոցիալական օբյեկտների աշխատանքին։

Ավելի ուշ Ճապոնիայի ԱԳՆ-ն բողոք է հայտնել Պուտինի՝ Իթուրուպ կատարած այցի կապակցությամբ, որը հարավային Կուրիլների մյուս երեք կղզիների հետ միասին Տոկիոն համարում է իրենը, թեև դրանք Երկրորդ համաշխարհայինի արդյունքներով մտել են ԽՍՀՄ կազմի մեջ, և Մոսկվայի դիրքորոշմամբ՝ ՌԴ ինքնիշխանությունը դրանց նկատմամբկասկածի ենթակա չէ։

Հետևեք մեզ՝ այստեղ