Գագիկ Ծառուկյանը՝ Հայաստանի ներքին իրավիճակի և տնտեսական մարտահրավերների մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Բարգավաճ Հայաստան» կուսակցության նախագահ Գագիկ Ծառուկյանը հանդես է եկել ծավալուն հայտարարությամբ՝ անդրադառնալով հետընտրական ներքաղաքական իրավիճակին, հասարակության մեջ առկա լարվածությանը և երկրի առջև ծառացած տնտեսական մարտահրավերներին։

Նրա գնահատմամբ՝ ընտրություններից հետո հանրությունը պետք է մտներ ավելի հանգիստ և համերաշխ փուլ, սակայն իրականությունը, ըստ նրա, հակառակ պատկերն է ցույց տալիս։ Ծառուկյանի խոսքով՝ երկրում շարունակվում է հասարակության բևեռացումը, աճում են լարվածությունն ու փոխադարձ անվստահությունը, ինչը խոչընդոտում է պետության բնական զարգացմանը։

ԲՀԿ առաջնորդը նշում է, որ վերջին օրերին հիմնականում գտնվել է Հիսուս Քրիստոսի արձանի կառուցման տարածքում, ինչը, նրա խոսքով, հնարավորություն է տվել որոշ չափով հեռանալ առօրյա քաղաքական իրադարձություններից և ստեղծված իրավիճակին նայել ավելի լայն՝ պետական մտածողության տեսանկյունից։

Ծառուկյանը շեշտում է, որ իր և քաղաքական թիմի նկատմամբ իրականացված գործողություններին չի ցանկանում մանրամասն անդրադառնալ, քանի որ այդ հարցերով զբաղվում են իրավաբաններն ու կուսակցության ներկայացուցիչները։ Նրա խոսքով՝ այսօր առավել կարևոր է խոսել այն խնդիրների մասին, որոնք վերաբերում են ամբողջ հասարակությանը և երկրի ապագային։ Այդ համատեքստում նա հարց է բարձրացնում, թե ինչու ընտրություններից հետո Հայաստանում չի ձևավորվում հանդարտության և համերաշխության մթնոլորտ, այլ հակառակը՝ խորանում են ներքին հակասությունները։

Քաղաքական գործիչը համոզված է, որ երկրում կայունություն հնարավոր կլինի ապահովել միայն այն դեպքում, երբ քաղաքական պայքարը հիմնված լինի ծրագրերի մրցակցության վրա, այլ ոչ թե փոխադարձ վիրավորանքների, սպառնալիքների և ատելության խոսքի։ Նրա գնահատմամբ՝ իշխանությունն ու ընդդիմությունը պետք է գիտակցեն, որ բոլորն ունեն մեկ ընդհանուր պատասխանատվություն երկրի ապագայի նկատմամբ, քանի որ պետական շահը վեր է ցանկացած քաղաքական կամ անձնական հետաքրքրությունից։

Անդրադառնալով իր հասցեին հնչող այն քննադատությանը, թե քաղաքական ակտիվությունը պայմանավորված է սեփական բիզնես շահերը պաշտպանելու ցանկությամբ, Ծառուկյանը պնդում է, որ իր նպատակը եղել և մնում է երկրի խնդիրների լուծմանը նպաստելը։ Նրա խոսքով՝ ցանկության դեպքում կարող էր հեռու մնալ քաղաքական գործընթացներից, սակայն չի կարող անտարբեր մնալ, երբ Հայաստանը կանգնած է լուրջ մարտահրավերների առաջ։

Ծառուկյանը նաև ընդգծում է, որ հասարակության մեջ փոխադարձ հարգանքի և համերաշխության պակասն այսօր դարձել է ամենամեծ խնդիրներից մեկը։ Նրա համոզմամբ՝ անհրաժեշտ է ձևավորել այնպիսի միջավայր, որտեղ մարդիկ կկարողանան լսել միմյանց, հարգել տարբեր կարծիքները և միասին աշխատել ընդհանուր նպատակների իրականացման համար։

ԲՀԿ առաջնորդը մտահոգություն է հայտնում նաև պետական կառավարման համակարգի վերաբերյալ։ Նրա կարծիքով՝ այսօր փորձառու մասնագետների և բարձր որակավորում ունեցող կադրերի ներուժը լիարժեք չի օգտագործվում, իսկ որոշումների կայացման գործընթացում հաճախ գերակշռում է քաղաքական պատկանելության գործոնը։ Նա նաև նշում է, որ թե՛ Սփյուռքի ներուժը, թե՛ տարբեր քաղաքական հայացքներ ունեցող քաղաքացիների մասնագիտական կարողությունները պետք է ծառայեն պետական շահին, այլ ոչ թե դուրս մնան գործընթացներից։

Հայտարարության զգալի մասը վերաբերում է տնտեսական խնդիրներին։ Ծառուկյանի խոսքով՝ տնտեսությունը չի կարող բաժանվել աշխարհաքաղաքական կողմնորոշումների հիման վրա, քանի որ դրա գլխավոր նպատակը երկրի զարգացման ապահովումն է։ Նա մտահոգություն է հայտնում արտաքին շուկաներում տեղի ունեցող փոփոխությունների առնչությամբ և նշում, որ հայկական արտադրողները կարող են կորցնել իրենց դիրքերը, եթե ժամանակին համապատասխան քայլեր չձեռնարկվեն։

Նրա գնահատմամբ՝ եթե առկա միտումները շարունակվեն, դժվար իրավիճակում կհայտնվեն գյուղատնտեսությամբ զբաղվող քաղաքացիները, գործարարներն ու ընդհանուր տնտեսությունը, ինչը կազդի նաև պետական բյուջեի եկամուտների վրա։ Այդ պատճառով, ըստ Ծառուկյանի, անհրաժեշտ է կենտրոնանալ ոչ թե ներքին բաժանումների, այլ տնտեսական խնդիրների լուծման վրա։

Հայտարարության ավարտին ԲՀԿ նախագահը խոսում է նաև իր նախաձեռնած Հիսուս Քրիստոսի արձանի և «Նոյյան տապան» համալիրի մասին՝ նշելով, որ դրանք նախատեսված են ոչ միայն զբոսաշրջության զարգացմանը նպաստելու, այլև ազգային միասնության գաղափարը խորհրդանշելու համար։ Նրա խոսքով՝ այսօր Հայաստանի համար առավել քան երբևէ կարևոր է հաղթահարել հասարակական պառակտվածությունը և ձևավորել համերաշխության մթնոլորտ։

Մանրամասները՝ «Փաստ» օրաթերթի այսօրվա համարում

Հետևեք մեզ՝ այստեղ