«Ոսկե ծիրան» 2026-ը կմեկնարկի հուլիսի 12-ին․ Կաննի հետ նոր համագործակցություն, Պավել Պավլիկովսկի և միջազգային կինոյի աստղեր՝ Երևանում

CULTURE 3 July, 2026 20:44

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երևանի 23-րդ միջազգային «Ոսկե ծիրան» կինոփառատոնը կանցկացվի 2026 թվականի հուլիսի 12-19-ը։ Այս տարի ևս փառատոնը կներկայացնի մրցութային և արտամրցութային հարուստ ծրագրեր՝ աշխարհի տարբեր երկրներից ընտրված ֆիլմերով, այդ թվում՝ Կաննի, Բեռլինի և այլ հեղինակավոր միջազգային կինոփառատոններում ներկայացված աշխատանքներով։

Փառատոնի ընթացքում Հայաստան կժամանեն համաշխարհային կինոյի ճանաչված ռեժիսորներ, դերասաններ, պրոդյուսերներ և ոլորտի մասնագետներ, որոնք ոչ միայն կներկայացնեն իրենց ֆիլմերը, այլև կմասնակցեն վարպետության դասերի և հանդիպումների՝ ստեղծելով մասնագիտական երկխոսության և մշակութային համագործակցության հարթակ։

«Ոսկե ծիրան» միջազգային կինոփառատոնի տնօրեն և գեղարվեստական ղեկավար Կարեն Ավետիսյանը ներկայացրեց այս տարվա կարևորագույն նախաձեռնություններից մեկը՝ Կաննի կինոփառատոնի շրջանակում անցկացվող «Քննադատների շաբաթ» ծրագրի և Next Step հարթակի հետ համագործակցությունը։ Նրա խոսքով՝ Հայաստանը հաջորդ տարի կլինի ծրագրի ֆոկուս երկիրը, ինչը կարևոր հնարավորություն է հայ կինոյի համար։

«Դա ոչ միայն ներկայացուցչական հաջողություն է, այլև կոնկրետ արդյունք կունենա։ Կնկարահանվեն չորս կարճամետրաժ ֆիլմեր՝ հայ և եվրոպացի ռեժիսորների համահեղինակությամբ։ Այս տարվա «GAIFF Pro» կրթական հարթակի շրջանակում կընտրվեն այն չորս հայ հեղինակները, որոնք կստեղծեն այդ ֆիլմերը, իսկ հաջորդ տարի դրանք կներկայացվեն Կաննի կինոփառատոնի «Քննադատների շաբաթ» ծրագրում»,- ասաց Ավետիսյանը։

Նա տեղեկացրեց նաև, որ փառատոնի բացման պաշտոնական արարողությունը տեղի կունենա հուլիսի 13-ին՝ հաշվի առնելով, որ հուլիսի 12-ը համընկնում է Վարդավառի տոնին, թեև ֆիլմերի ցուցադրությունները կմեկնարկեն հենց հուլիսի 12-ից։

Փառատոնը կբացվի ռեժիսոր Թամարա Ստեփանյանի «Արտոյի երկիրը» հայ-ֆրանսիական համատեղ արտադրության ֆիլմով, որը նախկինում բացել էր նաև Լոկառնոյի միջազգային կինոփառատոնը։ Ֆիլմում ներգրավված են հայ և ֆրանսիացի դերասաններ, այն նկարահանվել է Հայաստանում և անդրադառնում է վերջին պատմական իրադարձություններին։

Հուլիսի 15-ին Երևանի քաղաքապետարանի աջակցությամբ Կարեն Դեմիրճյանի անվան մարզահամերգային համալիրում կկայանա աշխարհահռչակ շեփորահար Իբրահիմ Մալուֆի համերգը։ Նա նաև ընդգրկված է փառատոնի տարածաշրջանային ժյուրիում։

Կարեն Ավետիսյանը նաև հայտնեց, որ փառատոնի պատվավոր հյուրերից է լինելու օսկարակիր լեհ ռեժիսոր Պավել Պավլիկովսկին։ «Նա Երևանում կներկայացնի իր նոր «Father Land» ֆիլմը, որի համաշխարհային պրեմիերան կայացել է Կաննի կինոփառատոնում, որտեղ ռեժիսորն արժանացել է լավագույն ռեժիսորի մրցանակին։ Պավլիկովսկին նաև կանցկացնի վարպետության դաս և կհանդիպի հանդիսատեսի հետ»,- նշեց նա:

Փառատոնի հիմնադիր նախագահ Հարություն Խաչատրյանն՝ անդրադառնալով ժամանակակից կինոյի մարտահրավերներին, ընդգծեց, որ այսօր առավել կարևոր է ոչ թե ֆիլմերի քանակը, այլ դրանց որակը։

«Այսօր ֆիլմերը շատացել են, սակայն մտահոգիչ է, որ լավ հայկական ֆիլմերի թիվն այդքան էլ չի աճել։ Պետք է ուշադրություն դարձնել որակին և ձգտել, որպեսզի հայկական կինոն միջազգային ասպարեզում ներկայանա լավագույն աշխատանքներով»,- ասաց նա։

«Ոսկե ծիրան» միջազգային կինոփառատոնի միջազգային բաժնի ղեկավար Վարվառա Հովհաննիսյանն էլ ներկայացրեց ծրագրային կարևոր շեշտադրումները։ Նրա խոսքով՝ փառատոնի ընթացքում տեղի կունենան մի շարք երևանյան պրեմիերաներ, ինչպես նաև կցուցադրվեն հեղինակավոր միջազգային կինոփառատոններից ժամանած ֆիլմեր։

Փառատոնի շրջանակում նախատեսված են նաև բազմաթիվ վարպետության դասեր, որոնք կվարեն պատվավոր հյուրերն ու ժյուրիի անդամները, այդ թվում՝ ավստրիացի ռեժիսոր Ջեսիկա Հաուսները, մեքսիկացի ռեժիսոր Միշել Ֆրանկոն և այլ միջազգային հեղինակություններ։ Հատուկ կրթական ծրագրով Երևան կժամանեն նաև երիտասարդ կինոգործիչների մենթորներ, որոնք կաշխատեն հայկական նախագծերի հեղինակների հետ։

Այս տարվա «Ոսկե ծիրանի» գլխավոր ուղերձը հորդոր է կինոյից սպասել ոչ թե պատրաստի բացատրություններ, այլ բացահայտումներ։ Փառատոնի կազմակերպիչների խոսքով՝ ինչպես պոեզիան, այնպես էլ կինոն հաճախ խոսում է ոչ թե հստակ պատասխանների, այլ զգացողությունների, պատկերների և ներքին բացահայտումների լեզվով։

Փառատոնի գլխավոր պաստառի հեղինակը հայտնի նկարիչ և դիզայներ Իգոր Գուրովիչն է։ Նրա ստեղծած աշխատանքը, ըստ կազմակերպիչների, արտացոլում է այս տարվա գաղափարական առանցքը՝ կինոն և պոեզիան որպես ստեղծագործական ազատության և մարդկային զգայունության տարածքներ։

Հիշեցնենք՝ «Ոսկե ծիրան» 23-րդ միջազգային կինոփառատոնի պատվավոր հյուրն է անվանի ֆրանսահայ դերասան, դրամատուրգ և ռեժիսոր Սիմոն Աբգարյանը։

Հետևեք մեզ՝ այստեղ