Ֆրանսիայում դատարանը դատապարտել է Ադրբեջանի 9 քաղաքացու՝ բլոգեր Մահամադ Միրզալիի սպանության փորձի համար

INTERNATIONAL NEWS 12 June, 2026 18:25

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ֆրանսիական Ռեն քաղաքում դատարանը մեղավոր է ճանաչել Ադրբեջանի ինը քաղաքացու՝ տարագրության մեջ գտնվող բլոգեր Մահամադ Միրզալիի սպանության փորձի գործով, հայտնել է OC Media-ն։

Գործի գլխավոր մեղադրյալը՝ Էմին Ղասիմովը, դատապարտվել է 30 տարվա ազատազրկման և Ֆրանսիա մուտք գործելու ցմահ արգելքի։ Մյուս ութ ամբաստանյալները ստացել են 5-15 տարվա ազատազրկման պատիժներ։

Միրզալիի վրա հարձակումը տեղի է ունեցել 2021 թվականի մարտին Նանտում։ Գործով դատավարությունը սկսվել է միայն մայիսի 26-ին։

Հարձակման ժամանակ Ղասիմովը եղել է Ադրբեջանի ևս երկու քաղաքացիների՝ Ռովշան Գոջաևի և Մեհրայ Զարբալիևի հետ, որոնք համապատասխանաբար դատապարտվել են 25 և 18 տարվա ազատազրկման։ Գոջաևը դատապարտվել է հեռակա կարգով և հայտարարվել է Ինտերպոլի հետախուզման մեջ։

Եվս երկու մեղադրյալներ՝ Էմին Զամզանզադեն և Ռզա Մալիկովը, դատապարտվել են 15 և 13 տարվա ազատազրկման՝ օժանդակության համար։

Բոլոր դատապարտյալները նաև ստացել են Ֆրանսիա մուտք գործելու ցմահ արգելք։

Մնացած երեք ամբաստանյալները ստացել են մինչև հինգ տարվա ազատազրկում։

Միակ ամբաստանյալը՝ Ֆաիգ Փաշա-զադեն, արդարացվել է՝ հարձակմանը նրա մասնակցության բավարար ապացույցների բացակայության պատճառով։

Միրզալին OC Media-ին հայտնել է, որ 2021 թվականի մարտի 20–21-ին Փաշա-զադեն Հունգարիայում կացարան է տրամադրել Ղասիմովին, Գոջաևին և Զարբալիևին, այնուհետև օգնել է նրանց կեղծ անձնագրեր պատրաստել։

Քննության ընթացքում պարզվել է, որ Փաշա-զադեի նկատմամբ Հունգարիայում նախկինում հարուցվել էր քրեական գործ, որով նա դատապարտվել էր վեցուկես տարվա ազատազրկման՝ կողոպուտի համար։

Միրզալին հայտարարել է, որ դատավճռի հրապարակման ժամանակ Ղասիմովը դատարանի դահլիճում սպառնացել է իրեն և բղավել, որ «Ֆրանսիայում արդարություն չկա», հավելելով, որ «թքում է նրանց արդարադատության վրա» և որ ինքը «երկար չի մնա բանտում»։

Միրզալիի խոսքով՝ Գոջաևը, որը 2024 թվականին Թուրքիայում ձերբակալվել էր Ադրբեջանի Պետական անվտանգության ծառայության (DTX) կողմից, այժմ պահվում է Ադրբեջանում։

Նա նաև հայտարարել է, որ քննությանը չի հաջողվել հաստատել պետական կառույցների մասնակցությունը հարձակմանը։ Նրա խոսքով՝ դատարանի որոշմամբ Ղասիմովի խցում տեղադրվել էր ձայնագրող սարք, և հորեղբոր հետ զրույցի ընթացքում նա հիշատակել էր ներքին գործերի նախարար Վիլայաթ Էյվազովին՝ ասելով, որ նա «գիտի, թե ինչու է ինքը ձերբակալված»։

Ղասիմովի հորեղբայրը, ըստ Միրզալիի, ավելի ուշ հրամայել է նրան ցուցմունքներում չհիշատակել պետական նավթային SOCAR ընկերությունը և գործարար Անար Ալիզադեին։

Միրզալին Made in Azerbaijan YouTube-ալիքի հիմնադիրն է և 2016 թվականից ապրում է Ֆրանսիայում՝ որպես քաղաքական փախստական։ Նա հայտնի է Ադրբեջանի նախագահ Իլհամ Ալիևի և երկրի այլ բարձրաստիճան պաշտոնյաների կոշտ քննադատությամբ։

Նա OC Media-ին պատմել է, որ սկսել է քննադատել իշխանություններին այն բանից հետո, երբ 2021 թվականին դարձել է շանտաժի զոհ՝ իր քրոջ մասնակցությամբ ինտիմ տեսանյութի օգտագործմամբ։

Դատավարության ընթացքում Ղասիմովը և նրա փաստաբանները փորձել են գործի մեջ չներքաշել ադրբեջանական իշխանությունների ներկայացուցիչների անունները։

Դատավորը նշել է, որ հարձակումը տեղի է ունեցել այն պատճառով, որ Միրզալին բլոգերի և լրագրողի իր աշխատանքում օգտվել է խոսքի ազատությունից։

«Սա տեղի ունեցավ, որովհետև նա օգտագործում էր այն մեթոդները, որոնք գիտեր, որպեսզի պայքարի ադրբեջանական իշխանությունների դեմ։ Նրանք ցանկանում էին օրը ցերեկով քաղաքի կենտրոնում գլխատել Միրզալիին՝ ամբողջ Եվրոպայում այլախոհներին ազդակ ուղարկելու համար», — հայտարարել է դատավորը։

Հետևեք մեզ՝ այստեղ