Իրանը հայտնել է, թե որքան կտեւի Հորմուզի նեղուցի հատման սահմանափակումը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Պակիստանում բանակցությունների ընթացքում Միացյալ Նահանգները նոր, չափազանց մեծ պահանջներ է ներկայացրել, նշվել է Ազգային անվտանգության բարձրագույն խորհրդի քարտուղարության հայտարարության մեջ, տեղեկացրել է Mehr-ը։

Քարտուղարությունում նշել են, որ «մարտադաշտում ներխուժած թշնամիների պարտությունից հետո, Իրանի ժողովրդի եւ զինված ուժերի պատմական եւ աննախադեպ դիմադրության շնորհիվ, պատերազմի 10-րդ օրը ամերիկացիներից ստացվել են հաղորդագրություններ եւ խնդրանքներ՝ հրադադարի եւ իրենց սկսած պատերազմը դադարեցնելու բանակցությունների վերաբերյալ»։

«Պատերազմի 40-րդ օրը, ԱՄՆ նախագահի՝ Իրանի 10 կետանոց ծրագիրը որպես պատերազմի դադարեցման հիմք ընդունելու պաշտոնական հայտարարությունից հետո, Իրանի Իսլամական Հանրապետությունը համաձայնել է բանակցություններ վարել Իսլամաբադում, Պակիստանի միջնորդությամբ։

Բանակցությունները տեւել են 21 ժամ՝ առանց ընդմիջման։ Իրանի պատվիրակությունը լրջորեն եւ նախաձեռնողաբար առաջ է քաշել Իրանի ժողովրդի պահանջները՝ չնայած Միացյալ Նահանգների նկատմամբ խոր անվստահությանը»։

Չնայած թշնամին համաձայնել էր բանակցություններից առաջ գործել Իրանի 10 կետանոց ծրագրի համաձայն, բանակցությունների ընթացքում առաջ է քաշել նոր եւ չափազանց մեծ պահանջներ: Նրանք բախվել են իրանական պատվիրակության կոշտ դիրքորոշմանը եւ հասկացել, որ Իրանը չի նահանջի՝ հենվելով իր մարտիկների, ազգային հպարտության եւ զգոն ժողովրդի վրա»,- նշվել է հայտարարության մեջ:

Քարտուղարությունն ընդգծել է, որ բանակցությունների այս փուլն ավարտվել է առանց կոնկրետ արդյունքների, եւ կվերսկսվի, երբ Միացյալ Նահանգները հրաժարվի իր չափազանց մեծ պահանջներից եւ դրանք կհամապատասխանեցնի իրականությանը:

«Վերջերս, Թեհրանում Պակիստանի բանակի հրամանատարի միջնորդությամբ, ամերիկացիները նոր առաջարկներ են ներկայացրել: Իրանի Իսլամական Հանրապետությունը քննարկում է դրանք եւ դեռեւս չի արձագանքել:

Իրանցի բանակցողների թիմը, հենվելով Ամենակարող Աստծո, հանրային աջակցության, պողպատե վճռականության եւ իր մարտիկների կրակային հզորության վրա, չի գնա զիջումների, չի նահանջի կամ որեւէ անփութություն չի ցուցաբերի: Նրանք կպաշտպանեն Իրանի շահերը եւ այս պատերազմում թափված թանկարժեք արյունը, մասնավորապես՝ իր սիրելի առաջնորդի արյունը, անկախության, արժանապատվության եւ պատվի համար:

Ժամանակավոր հրադադարի համաձայնագիրն ընդունելու Իրանի ամենակարեւոր նախապայմաններից մեկը հրադադարն էր բոլոր ճակատներում, այդ թվում՝ Լիբանանում»,- նշվել է հայտարարության մեջ:

Ընդգծվել է, որ Իսրայելը սկզբից եւեթ խախտել է այս պայմանը՝ հարձակվելով Լիբանանի եւ «Հեզբոլլահի» վրա։

Նաեւ նշվել է, որ Իրանի համառության շնորհիվ Իսրայելը համաձայնել է հրադադարի Լիբանանում։

«Համաձայնեցված էր, որ եթե թշնամին պահպանի հրադադարը բոլոր ճակատներում, Հորմուզի նեղուցը պայմանականորեն ժամանակավորապես կբացվի մինչեւ հրադադարի ավարտը՝ բացառապես առեւտրային նավերի համար (ոչ թե թշնամական պետությունների ռազմական կամ ոչ ռազմական նավերի), Իրանի զինված ուժերի վերահսկողության ներքո եւ թույլտվությամբ եւ Իրանի կողմից նշանակված երթուղիներով։

Քանի որ Պարսից ծոցում ԱՄՆ ռազմաբազաների համար նախատեսված սարքավորումների մեծ մասը մատակարարվում է ծովային ճանապարհով՝ Հորմուզի նեղուցով, ինչը սպառնում է Իրանի եւ Պարսից ծոցի տարածաշրջանի ազգային անվտանգությանը, Իրանը վճռականորեն հսկում եւ վերահսկում է երթեւեկությունը նեղուցով՝ մինչեւ պատերազմի լիակատար ավարտը եւ երկարատեւ խաղաղության հաստատումը։

Այդ վերահսկողությունը կիրականացվի անցնող նավերի վերաբերյալ ամբողջական տեղեկատվություն ստանալու, Իրանի հայտարարած կանոնակարգերին համապատասխան տարանցիկ թույլտվությունների, անվտանգության, ապահովության եւ շրջակա միջավայրի պաշտպանության ծառայությունների համար վճարներ գանձելու եւ Իրանի հայտարարած երթուղիներն օգտագործելու միջոցով։

Քանի դեռ թշնամին մտադիր է խաթարել նավագնացությունը կամ կիրառել այնպիսի մեթոդներ, ինչպիսին է ծովային շրջափակումը, Իրանի Իսլամական Հանրապետությունը դա կհամարի հրադադարի խախտում եւ կկանխի Հորմուզի նեղուցի պայմանական, սահմանափակ բացումը»,- նշվել է հայտարարության մեջ։

Հետևեք մեզ՝ այստեղ