Հորս արև. ի՞նչ է անելու Բրյուսելը բացասական արդյունքի դեպքում. «Փաստ»

«Փաստ» օրաթերթը գրում է.

rg.ru–ն «Հորս արև. ինչպես է Հայաստանի վարչապետը փորձում վերացնել քաղաքական մրցակիցներին» վերնագրով հոդվածում գրում է, որ ասում են, թե նրա նման մարդիկ փորձում են նստել երկու աթոռի վրա, և նրանք շատ են նեղվում, երբ աթոռներն սկսում են իրարից հեռանալ՝ ստեղծելով գետնին հայտնվելու լուրջ վտանգ՝ դրանից բխող բոլոր հետևանքներով: Հունիսին Հայաստանում կկայանան խորհրդարանական ընտրություններ, և Նիկոլ Փաշինյանի գլխավորած «Քաղաքացիական պայմանագիր» կուսակցությունը կհանդիպի բազմաթիվ ազդեցիկ կուսակցությունների դիմադրությանը: Եվ առաջին հերթին գործարար Սամվել Կարապետյանի կուսակցության, որին ներկայիս կառավարությունը զրկել է իր բիզնեսի զգալի մասից և բանտարկել: Կարապետյանի կողքին են հայ հոգևորականները, մինչդեռ Փաշինյանի կողքին է Եվրամիությունը, որի կառույցները, մեղմ ասած, չեն սիրում քրիստոնեական եկեղեցիները, և որտեղ միասեռ ամուսնություններն են դարձել նոր կրոն: Անցյալում իր քաղաքական հայացքների համար բանտարկված լինելով՝ Փաշինյանը հիանալի հասկանում է, թե Եկեղեցու նկատմամբ իր հալածանքների և Ադրբեջանին տարածքային զիջումների համար ի՞նչ կանի ընդդիմությունը իր հետ, եթե իշխանության գա: Դրանով է բացատրվում իշխող ռեժիմի դաժանությունը, ցանկացած քաղաքական ուժի նկատմամբ կասկածը և Փաշինյանի հակառակորդներին հնարավոր աջակցության նկատմամբ զգայունությունը։ Որովհետև վարչապետի քաղաքականությունը աջակցողների համար ամենամեղմ պատիժը ապագայում կարող է լինել արտասահման արտաքսումը։ Չնայած հասարակական կարծիքի հարցումները ցույց են տալիս անտարբերություն հայ ընտրողների շրջանում, ովքեր այլևս չեն հավատում գեղեցիկ խոստումներին, բայց դա չի երաշխավորում, որ իրավիճակը չի փոխվի մինչև հունիս։ Հայաստանի վարչապետը աշխատանքից ազատել է Հայոց ցեղասպանության թանգարան-ինստիտուտի տնօրեն Էդիտա Գզոյանին՝ ԱՄՆ փոխնախագահ Ջ. Դ. Վենսին Արցախի մասին գիրք նվիրելու պատճառով, քանի որ, իբր, դա հակասում է կառավարության արտաքին քաղաքականությանը։ Դե, յուրաքանչյուր նման ժեստ հիշեցնում է Ադրբեջանի հետ հակամարտության պատճառների և դրա՝ Երևանի համար անփառունակ ավարտի մասին։ Հիշեցնենք, որ 2023 թվականի սեպտեմբերին Ադրբեջանի նախագահ Իլհամ Ալիևը հայտարարեց, որ իր երկիրը վերականգնել է իր տարածքային ամբողջականությունը։ Դրանից հետո ավելի քան 100000 էթնիկ հայեր փախան գրավված տարածաշրջանից դեպի Հայաստան։ Այս տարվա մարտին Ռուսաստանը պլանավորում էր մարդասիրական օգնություն ուղարկել Հայաստան այդ տեղահանված անձանց համար՝ անհրաժեշտ իրեր և մանկական սնունդ, սակայն Հայաստանի կառավարությունը հրաժարվել է ընդունել այն՝ հղում անելով օրենսդրությանը, որը ենթադրաբար սահմանափակում է բարեգործական նվիրատվությունները ընտրությունների շրջանում։ «Երևանի հրաժարումը մարդասիրական օգնությունից, որը քաղաքական ենթատեքստ չունի, պայմանավորված է Հայաստանի իշխանությունների նախընտրական ցանկությամբ բառացիորեն ջնջել Ռուսաստանի մասին բոլոր հիշատակումները։ Ու՞մ են նրանք վնասում։ Իրենց սեփական քաղաքացիներին», - Փաշինյանի կաբինետի որոշումը այդպես է մեկնաբանել Ռուսաստանի արտաքին գործերի նախարարության խոսնակ Մարիա Զախարովան։

Նախկին նախագահ Ռոբերտ Քոչարյանն ավելի կոնկրետ և պակաս դիվանագիտական է եղել իշխող ռեժիմի՝ իր գնահատականում։ «Նրանք փորձում են համոզել մեզ, որ մեր հարուստ պատմությունը բեռ է, այլ ոչ թե հենարան առաջ շարժվելու համար, որ հայրենասիրությունը վատ է հայերի ստամոքսի համար։ Մենք «ոչ» ենք ասում այս վտանգավոր մոլորություններին», - հայտարարել է Հայաստանի նախկին ղեկավարը։ Նրա խոսքով, «Ադրբեջանի հետ խաղաղությունը չպետք է հիմնված լինի «հորս արև» մոդելի վրա, այլ պետք է հիմնված լինի Հայաստանի համար իրական անվտանգության երաշխիքների վրա»։

Փաշինյանի արձագանքը ընտրություններից առաջ իրեն ուղղված ուժգնացող քննադատությանը, կարծես, ավանդական է իշխանությունը պահպանել ձգտող ղեկավարների համար, այն է՝ օգնություն խնդրել ԵՄ– ից՝ հղում անելով ռուսական երևակայական սպառնալիքին։ Եվ Բրյուսելը շտապել է Փաշինյանին օգնության. Հայաստան կուղարկվի արագ արձագանքման խումբ՝ խորհրդարանական ընտրություններին «հիբրիդային միջամտության» դեմ պայքարելու համար: Այդ մասին հայտարարել է եվրոպական դիվանագիտության ղեկավար Կայա Կալլասը: Դրանով Փաշինյանը և նրա բրյուսել յան ընկերները Մոսկվային են հայտարարել Հայաստանի իշխող վերնախավի գլխավոր թշնամի: «Ճնշման տակ գտնվող ժողովրդավարությունները կարող են հույսը դնել Եվրոպայի վրա», - կեղծավորաբար հայտարարել է Կալլասը: Մոլդովայում եվրոպացի պատվիրակները, որպեսզի ապահովեն եվրոպամետ ռեժիմի իշխանության մնալը, կազմակերպել էին զանգվածային ընտրակեղծիքներ և անթիվ արտասահմանյան միջոցներ էին ներդրել իրենց նախընտրած կուսակցությունների քարոզարշավներում: Եվրոպական բյուրոկրատիան, ըստ երևույթին, Փաշինյանին կապելով հակառուսական քաղաքականության հետ, հույս ունի նմանատիպ բան իրականացնել նաև Հայաստանում: Որովհետև նա հետո անխուսափելիորեն ստիպված կլինի Հայաստանի ինքնիշխանության հարցում վճարել Բրյուսելի օգնության դիմաց: «Հորս արև»–ը այդ դեպքում չի աշխատի. Եվրոպայում բոլոր անհնազանդներին են պատասխանատվության ենթարկում: Նիկոլ Փաշինյանը հույս ունի, որ ԵՄ–ն թույլ չի տա իր ՔՊ կուսակցությանը պարտվել ընտրություններում: Իսկ բացասական արդյունքի դեպքում Բրյուսելը կգտնի պատրվակ հայտարարելու, որ չի ճանաչում ընտրությունները:

Միևնույն ժամանակ, Պենտագոնը հրապարակել է զեկույց այն ամերիկացի գեներալի վարքագծի մասին, որը վերահսկում էր Ուկրաինային օգնությունը Բայդենի նախագահության օրոք: Գեներալ Անտոնիո Ագուտոն 2024 թվականի մայիսին ընթրիքի ժամանակ խմել է ճաճա (ակնհայտորեն վրացի ծանոթների հետ), ապա ընկել և գլխով հարվածել պատին: Կարելի է միայն ենթադրել, թե ապագայում ինչ փաստաթղթեր կհայտնվեն Հայաստան հաճախ այցելող եվրոպացիների և ամերիկացիների վարքագծի մասին. հայկական կոնյակի համտեսը միշտ էլ եղել է հյուրընկալ Հայաստանի ազգային ծրագրի պարտադիր մասը։

Մանրամասները՝ «Փաստ» օրաթերթի այսօրվա համարում