Ազատության հրապարակում ավարտվեց հանրահավաքը.Դավիթ Սանասարյանը մեկ պայմանով դուրս եկավ հացադուլից

Ազատության հրապարակում քիչ առաջ ավարտվեց էլեկտրաէներգիայի սակագնի բարձրացման դեմ հրավիրված հանրահավաքը:

Ինչպես տեղեկացնում է Past.am-ը, ելույթ ունեցող նախաձեռնող խմբի անդամները ներկայացրեցին իրենց պահանջները․ չեղյալ հայտարարել Հանրային ծառայությունները կարգավորող հանձնաժողովի որոշումը, վերանայել գործող սակագինը՝ իջեցման նպատակով, պատժել հունիսի 23-ին քաղաքացիների և լրագրողների հանդեպ կիրառված բռնության պատասխանատուներին:

Երևանի ավագանու անդամ Անահիտ Բախշյանը իր ելույթում նշեց. «Չլսեք մեծերիս, մեր սարքած պետությունը սա է` գողեր, ավազակներ: Մենք լավ ժառանգություն չենք տալիս ձեզ: Եկեք, դուք առաջնորդեք, մենք ձեզ սատար, մենք ձեր կողքին: Միայն լավ լինեք, առողջ լինեք, ամուր լինեք»:

Տիկին Բախշյանն, ասելով,որ վատ է զգում երիտասարդների փոխարեն՝ հորդորեց Դավիթ Սանասարյանին և մյուս հացադուլ անող երիտասարդներին, որպեսզի վերջիններս դադարեցնեն պայքարի ծայրահեղ տեսակը: Նա խնդրեց, որ այդ հարցում մեծերին լսեն:

Դավիթ Սանասարյանը հավաքվածներին ասաց. «Հացադուլը դադարեցնում եմ միայն մի պայմանով, որ Երևանի հրապարակներն ու փողոցները լցվեն երկրում ապօրինությունների դեմ պայքարող մարդկանցով»:

Հավաքի նախաձեռնողները դադարեցրեցին նաև նստացույցը, հայտարարելով, որ պատրաստվում են առաջիկայում ասուլիսներ տալ, իրազեկման ակցիաներ և երթեր անել:

Ըստ ակտիվիստների` մյուս հանրահավաքը տեղի կունենա հաջորդ շաբաթվա վերջին, սակայն օրը դեռ հստակ որոշված չէ:

Լևոն Փանոսյան