Լարված իրավիճակ՝ Արմավիրի մարզում․ Էջմիածնի Զվարթնոց թաղամասի մեծ թվով ջերմոցատերեր վստահեցնում են, որ կդիմեն կտրուկ քայլերի

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Այսօր՝ հուլիսի 11-ին, լարված իրավիճակ էր ստեղծվել Արմավիրի մարզում։ Էջմիածին քաղաքի Զվարթնոց թաղամասի մեծ թվով ջերմոցատերեր հավաքվել էին՝ իրենց բողոքի ձայնը հասցնելու պատասխանատու կառույցներին այն հարցի շուրջ, որ հարյուրավոր հեկտարների վրա ցանված ծաղիկները չեն կարողանում արտահանել Ռուսաստանի Դաշնություն՝ առանց հիմնավոր պատճառաբանության։ Ջերմոցատեր գյուղացիները, որոնք զբաղվում են ծաղկի բիզնեսով, հայտնվել են անելանելի իրավիճակում, քանի որ եկել է ծաղկի հավաքելու և արտահանելու ժամանակը, որից ստացված եկամուտներով պետք է փակեն բանկերից վերցրած վարկերը, սակայն ծաղիկ չի արտահանվում, իսկ տեղական շուկան էլ շատ փոքր է այդքան մեծ քանակի ծաղիկներ իրացնելու համար։

SHAMSHYAN.com-ի թղթակցի հետ զրույցում մտահոգ գյուղացիները ասում էին․ «Մեզնից յուրաքանչյուրը վարկերով ջերմոցներ է կառուցել, վարկերով թունաքիմիկատներ, դեղորայք գնել և խնամքի ծախսերը հոգացել, սակայն այսօր ծաղիկները հավաքում և թափում ենք, քանի որ չենք կարողանում արտահանել։ Արդեն 5 օր է՝ ծաղիկները տանում ենք տեղական շուկա, էլի հետ բերում, կամ եթե բախտներս բերում է, վաճառում ենք 200-300 դրամ այն դեպքում, երբ այդ փնջի ծաղիկները աճեցնելու համար մենք ծախսել ենք 1500-1600 դրամ։ Մեր պահանջը այն է, որ եթե ճանապարհները փակել են, ի՞նչ են մտածում հարգելի էկոնոմիկայի նախարարը, հարգելի պատասխանատուները։ Գոնե գան, ասեն՝ ճանապարհը երբ կբացվի, կամ ասեն չի բացվի, գոնե դեղորայքի, ջրելու, հոսանքի փող չտանք։ Միլիոնների ներդրում ենք արել հույսով, որ պետք ա հիմա վաճառենք, բայց փաստորեն իզուր։ 

Բանկերը էլ վարկեր չեն տալիս, արդեն էլ տեղ չկա վարկ վերցնելու։ Տանը էլ ոսկի էլ չի մնացել, որ գրավադրենք ու դրանով էլ վարկերի ամսական մարումները կատարենք։ Մենք մեր հող ու ջուրը սիրելով էսքան ներդրում ենք արել, վարկեր ենք վերցրել, որ էսօր կանգնենք կոտրած տաշտակի առաջ։ Այս թաղամասում մոտ 400 հազար հատ լիզանտուս ծաղիկ կա դրած, որոնք ծաղկում են հիմա, բայց ստիպված քաղում, թափում ենք։ Միայն այդ 400 հազար ծաղիկի համար վճարել ենք 40 մլն դրամ, միայն դատարկ բույսի գումարն է դա, էլ չեմ ասում խնամքը։ Ոչ մի տեղից արձագանք չկա։ Մենք ինչի պետք է ինչ-որ մեկին դիմենք, թող պատասխանատուները հայտարարեն որն է պատճառը։

 Ռուսաստանում ասում են, որ ծաղկի վրա վնասատուներ չլինեն, բայց մեր ծաղիկները առողջ են և ոչ մի վնասատու չեն պարունակում։ Մի քանի օր էլ եթե այսպես շարունակվի, մեր ամբողջ բերքը կդառնա ոչ պիտանի։ Ասում են իբր հողի վրա աճեցված ծաղիկը չի կարող դուրս գալ, բայց բոլորն էլ գիտեն, որ այստեղ մեծամասնությունը հողի վրա է աճեցնում ու երկար տարիների արտահանել ենք, ինչի՞ հենց հիմա նման պահանջներ առաջացան, այն էլ չհիմնավորված ու չարդարացված։ Մենք դիմում ենք ՀՀ Կառավարությանը՝ վարչապետ Նիկոլ Փաշինյանի գլխավորությամբ ու խնդրում, որ հետևողական լինի ու խնդիրը լուծում ստանա։ Միչև երկուշաբթի, եթե կոնկրետ քայլեր չձեռնարկվեն, մենք ստիպված կլինենք դիմել կտրուկ քայլերի, որոնց մասին նախօրոք չենք հայտարարում»։

Ինչպես ավելի վաղ հայտնել էր SHAMSHYAN.com-ը, հուլիսի 10-ին լարված իրավիճակ էր ստեղծվել Արմավիրի մարզի մի քանի գյուղերում: Ծիածան գյուղի կենտրոնական փողոցում էին հավաքվել գյուղի մեծ թվով բնակիչներ, ովքեր արդարացիորեն պահանջում էին, որպեսզի Էկոնոմիկայի նախարար Գևորգ Պապոյանը հստակ պատասխան տա, թե իր ղեկավարած կառույցը ինչ է անում, որպեսզի գյուղացուն փրկի հերթական կործանումից: 
 
Ֆոտոլրագրող Գագիկ Շամշյանի հետ զրույցում գյուղացիները ասում էին. 
 
«Դեռ սովետական տարիներից գյուղում եղել են բնակիչներ, ովքեր գյուղատնտեսկան աշխատանքներին զուգահեռ զբաղվել են նաև ծաղկավաճառությամբ: 
 
Անգամ մութ ու ցուրտ տարիներին ծաղիկներ ենք աճեցրել ու հանել վաճառքի ոչ միայն Հայաստանում, այև Ռուսաստանում ու արտերկրում: 

Մինչև վերջերս ոչ մի խնդիր չենք ունեցել, անգամ տարեցտարի Ռուսասանից խնդրում ու մեզնից ավելի շատ ծաղիկեր էին պահանջում: 
 
Արտահանմանում ոչ մի խդնիր, ոչ մի խոչընդոտ չենք ունեցել, բայց հունիսի 28-ից, ոչ միայն մեր գյուղում, այլև հարակից մի քանի գյուղերում, ինչպես նաև մի քանի մարզերում ծաղկավաճառությամբ զբաղվողներս հայտնվել ենք անտանելի և անօգնական վիճակում: 

2 օր առաջ Կառավարության մոտ հավաքվել էինք, մեզ ընդունեցին էկոնոմիկայի նախարարության ներկայացուցիչները, լսեցին ու խոստացան, որ ամեն բան կանեն, որպեսզի մեր խնդիրը լուծվի, բայց արդե որերորդ օրն է՝ ոչ մի դրական տեղաշարժ: 

Էլ չենք էլ հավատում Էկոնոմիկայի նախարարին, քանի որ հարցի լուծումը միայն կարող է տալ վարչապետ Նիկոլ Փաշինյանը՝ խնդիրը քննարկելով իր ռուս գործընկերոջ հետ:
 
Վարկերով ջերմոցներ ենք ստեղծել, աշխատատեղեր ենք բացել ու հիմա չգիտենք՝ ինչ է գալու մեր գլխին:

Եթե կառավարությունը միջոցներ չձեռնարկի՝ մեր հարցը լուծելու ուղղությամբ, ապա ստիպված դիմելու ենք կտրուկ միջոցների: 

Հանրապետության բոլոր մարզերում փակելու ենք ճանապարհներ, որովհետև դա մեր գոյության հարցն է:

Կառավարութունն ասում է՝ մի արտագաղթեք ու ստեղծեք աշխատատեղեր, մենք այդ ամենն անում ենք, բայց քանի օր է՝ Էկոնոմիկայի նախարարի ոչ սրտացավ մոտեցման արդյունքում երևի գյուղեր դատարկվեն: 

Բավական է, այս հարցը կարող է լուծել միայն վարչապետ Նիկոլ Փաշինյանը»: 

Գյուղացիները մատնացույց էին անում իրենց կողմից ստեղծված բիզնեսները, որտեղ հազարավոր ծաղիկներ արդեն ոչնացվել են, մեծ մասն էլ ոչնչացման եզրին է ու պետք է օր առաջ Հայաստանի Կառավարությունը Ռուսաստանի Կառավարությանը հորդորի, որպեսզի արհեստական ոչ մի խոչընդոտ չստեղծեն, ինչը երբևէ չի եղել, իսկ Հայաստանից Ռուսաստան ու արտերկիր ներմուծված ծաղիկները միշտ սպառվել են ժամերի ընթացքում:
 
Ֆոտոլրագրողը հայտնել էր, որ նույն պատկերն է Մրգաստան գյուղում, որտեղ հսկայական ջերմոցներում փչացել ու շարունակում են փչանալ մարդկանց քրտինքով աճեցրած ծաղիկները: 

Հետևեք մեզ՝ այստեղ