Անքուն գիշերներ ապրած ու հուզված Մարջան Ավետիսյանն ու զգոնությունը չկորցրած Մկրտիչ Արզումանյանը. «Սեր և նարինջներ» ներկայացման վերջին փորձերը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մի քանի ժամից՝ Կ. Ստանիսլավսկու անվան դրամատիկական թատրոնի բեմում, ռեժիսոր Կարո Բալյանը հանդիսատեսի դատին կհանձնի «Սեր և նարինջներ» ներկայացումը:

Գլխավոր հերոսներին մարմնավորում են Մկրտիչ Արզումանյանն ու Մարջան Ավետիսյանը:

Սցենարի հեղինակը Նարեկ Ավագյանն է, պրոդյուսերը Հռիփսիմե Բասենցյանը, բեմանկարիչը Գարիկ Եվագուլյանն է, զգեստների նկարիչը՝ Մարիամ Մուրադյանը:

Tert.am Life-ը ներկա է եղել ներկայացման վերջին փորձերին, զրուցել դերասանների ու ռեժիսորի հետ,  առանձնացրել կուլիսային հետաքրքիր դրվագները:

Մինչ պրեմիերան Մարջան Ավետիսյանի մոտ բուռն էմոցիաներ են՝ անքուն գիշերներ ու մղձավանջ, Մկրտիչ Արզումանյանը չի կորցնում զգոնությունն ու ձգտում է հասնել մաքսիմալ արդյունքի:

 

«Կան որոշակի գերխնդիրներ, որոնք քո առջև դրված են որպես արտիստ, և դա պետք է կատարես մաքսիմալ կենտրոնացմամբ: Անհանգստություն կա, բայց թուլանալ ու շարքից դուրս գալ չի կարելի, որովհետև, եթե ունես կոնկրետ խնդիր, ուրեմն չպետք է շեղվես դրանից»,- Tert.am Life-ի հետ զրույցում նշեց Մկրտիչ Արզումանյանը:

Թեև դերասանի համար գերծանրաբեռնված ամիս է, քանի որ զուգահեռ նաև մասնակցել է «Իմ կնոջ ամուսինը» ներկայացման փորձերին, բայց նշում է՝ ավելի շատ զգոն է: Նրա խոսքով՝ դերասանի համար նման գրաֆիկով աշխատելը սովորական է:

«Մարջանի հետ փորձել ենք աշխատել «Հյուսիսային պողոտայի բանտարկյանլը» ներկայացման ժամանակ, փորձերն արդեն սկսել էինք, բայց տեխնիկական պատճառներով չկարողացանք իրականացնել և մեր համագործակցությունը չստացվեց:

Տարիներ անց այս նոր ներկայացման շրջանակներում հանդիպեցինք»,- ասաց դերասանը:

Խոսելով ներկայացման մասին՝ Մկրտիչ Արզումանյանը նշեց, որ շատ հետաքրքիր  նյութ է, կարծում է՝ հանդիսատեսին դուր կգա:

«Իսկ իմ և Մարջանի համագործակցությունը, կարծում եմ, որ կստացվի, որովհետև երկուսս էլ մաքսիմալ ուզում ենք լավ բան ստանալ»,- ասաց Մկրտիչ Արզումանյանն, ում հերոսը հայտնվում է անելանելի իրավիճակում:

Ներկայացումը սիրո մասին է: Բեմում սերն է՝ իր բոլոր հետևանքներով:  

Երիտասարդ, հաջողակ գոծարարը նավաբեկության արդյունքում ձեռք է բերում ամնեզիա։

Ո՞վ է նա, և որտե՞ղ է՝ անվերջ հարցերի պատասխանները կօգնի ստանալ սթրեսի հասցնող սերը:

Ներկայացումը լիրիկական կոմեդիա է:

Դերասանուհի Մարջան Ավետիսյանը վերջին անգամ բեմ է բարձրացել 2019 թվականին՝ Գյումրու դրամատիկական թատրոնում: Դերասանուհին խոստովանեց, որ պրեմիերայից առաջ իրեն շատ բարդ ապրումներ են ուղեկցում՝ կիլոգրամների կորուտս, անքուն գիշերներ, մտատանջություններ, երազներ ու մղձավանջ:

«Խայտառակ վախ կա և մաքսիմալն անելու պատասխանատվության շատ մեծ զգացում:

Ամեն անգամ, երբ կուլիսներում կանգնած եմ ու  շուտով պիտի դուրս գամ բեմ, ուզում եմ արագ փախչել այդտեղից: Այդ զգացողությունը ոչ մի կերպ չի հաղթահարվում: Ես հեշտ ու հանգիստ չեմ անցնում այս ամենի միջով, շատ դժվար է»,- Tert.am Life-ի հետ զրույցում նշեց Մարջան Ավետիսյանը:

«Կինոյում քեզ հենց այդ պահին 600 աչք չի նայում, թատրոնում այդ պահին էմոցիաները տալն ու ստանալը չափազանց բարդ է:

Շատերի համար դերասանի մասնագիտությունը թվում է շատ ուրախ ու հաճելի, բայց այն ծանր խմորումների հորձանուտ է, որը հաղթահարելը չափազանց բարդ է:

Հույս ունեմ, որ հանդիսատեսի սպասելիքները կարդարացնենք»,- նշեց դերասանուհին:

Նրա խոսքով՝ թիմը պրոֆեսիոնալ է, ինչը չափազանց հաճելի է:

«Իմ և Մկրտիչի առաջին համագործակցությունն է բեմում, կինոյում հանդիպել ենք, բայց բեմում՝ ոչ:

Ինձ համար շատ կարևոր է Մկրտիչ Արզումանյանի նման բծախնդիր դերասանի հետ աշխատելը: Ես այդքան էլ այդպիսին չեմ:

Անշուշտ, Մկոյի փորձը շատ ավելի մեծ է ու դա ինձ շատ օգնում է: Ես վերջին 7 տարում թատրոնում չեմ եղել, իսկ նա բավական շատ է խաղացել այս ընթացքում»,- անկեղծացավ դերասանուհին:

Ռեժիսոր Կարո Բալյանը մեզ հետ զրույցում նշեց, որ չի սիրում խոսել իր բեմադրության մասին,  իր գործն է համարում այն հանձնել հանդիսատեսի դատին: 

«Այս ընթացքում, երբ ինձ հրավիրեցին բեմադրել «Սեր և նարինջներ» ներկայացումը, արտերկրում ևս ներկայացում բեմադրելու հրավեր ունեի, բայց այնտեղ ժամկետները հետաձգեցի ու ընդունեցի այս առաջարկը: Եվ՛ Մկրտիչը, և՛ Մարջանը պրոֆեսիոնալ դերասաններ են, նրանց հետ աշխատելը հաճույք է: Փորձերի ընթացքը կարճ, բայց հարթ է անցել»,- ամփոփեց ռեժիսորը:

«Սեր և նարինջներ» ներկայացման պրեմիերան տեղի կունենա ապրիլի 21, 22 25 -ին՝ Կ. Ստանիսլավսկու անվան դրամատիկական թատրոնում:

«Հաջողություն եմ մաղթում մեզ, իսկ հանդիսատեսին՝ բարի դիտում: Կարծում եմ, որ ևս մեկ աշխատանք կսիրվի հանդիսատեսի կողմից:

Ուրախ եմ, որ այս նախագծում եմ, ուրախ եմ, որ այս թիմով ենք աշխատում ու Կարո Բալյանի հետ մեր հերթական լավ աշխատանքը կունենանք»,- եզրափակեց Մկրտիչ Արզումանյանը:

Լուսնկարները՝ Ռոբերտ Աբրահամյանի

Հետևեք մեզ՝ այստեղ