Երուսաղեմում գտածոներն ապացուցում են Հիսուսի թաղման փաստը. հետազոտություն

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երկարատև բանավեճերը Հիսուս Քրիստոսի խաչելության և թաղման ճշգրիտ վայրի վերաբերյալ նոր թափ են ստացել հնագիտական ​​նշանակալի հայտնագործությունների շնորհիվ: Հռոմի Սապիենցա համալսարանի գիտնականները կարևոր ապացույցներ են հայտնաբերել, որոնք կարող են հաստատել Երուսաղեմի Սուրբ Գերեզմանի եկեղեցու՝ որպես Քրիստոսի իրական գերեզմանի պատմական նշանակությունը, գրում է New York Post-ը։

Հնագետները հայտնաբերել են բույսերի մնացորդներ, որոնք թվագրվում են մոտավորապես մ.թ. 33 թվականին՝ Հիսուսի մահվան ենթադրյալ ժամանակին, հաղորդում է Planet Today-ը: Այս գտածոն առանձնահատուկ հետաքրքրություն է ներկայացնում Հովհաննես 19.43-ում նշված հիշատակման լույսի ներքո. «Եւ այն տեղում, ուր նա խաչուեց, պարտէզ կար. եւ այդ պարտէզում՝ մի նոր գերեզման, որի մէջ երբեք որեւէ մէկը չէր դրուած։ 44Եւ քանի որ գերեզմանը մօտ էր, հրեաների ուրբաթի պատճառով, այնտե՛ղ դրեցին Յիսուսի մարմինը»։

Ֆրանչեսկա Ռոմանա Ստասոլլան՝ հնագիտական ​​խմբի ղեկավարը, Times of Israel-ին տված հարցազրույցում պարզաբանել է. «Ավետարանում նշվում է կանաչ տարածք Գողգոթայի և դամբարանի միջև, և մենք հայտնաբերեցինք այդ մշակովի դաշտերը»։

Բացի բույսերի մնացորդներից, հետազոտական ​​թիմը տեղում մարմարե դամբարաններ է հայտնաբերել: Այս գտածոներն առնչվում են Հովսեփ Արիմաթիացուն՝ աստվածաշնչյան գործիչ, որն, ըստ քրիստոնեական ավանդույթի, իր հողամասը հատկացրել է Հիսուսի թաղման համար: Հնագետների թիմը նախատեսում է հայտնաբերված մարմարի համապարփակ հետազոտություն անցկացնել՝ պատմական համատեքստի մասին լրացուցիչ տեղեկություններ ստանալու համար:

«Մենք երկրաբանական վերլուծություն ենք անցկացնում՝ ստուգելու համար մարմարի ծագումը, ինչպես նաև փորձարկում շաղախը: Երկու հետազոտություններն էլ մեզ կարևոր պատմական տվյալներ տրամադրելու ներուժ ունեն»,-պատմում է Ստասոլլան:

Ավագ շաբաթվա և Սուրբ Զատիկի ընթացքում հնագիտական ​​աշխատանքները ժամանակավորապես դադարեցվել են՝ հավատացյալների և ուխտավորների՝ տաճար մուտքն ապահովելու համար: Հետազոտությունները նախատեսվում է վերսկսել ամսվա վերջին։

«Հյուսիսային անցումի միայն մի մասն է մնացել պեղումների համար»,- նշել է արշավախմբի ղեկավարը։

Չնայած տպավորիչ գտածոներին, Ստասոլլան շեշտում է, որ իրենց աշխատանքի արժեքը գերազանցում է հնագիտական ​​արտեֆակտները. «Իրական գանձը, որը մենք բացահայտում ենք, այն մարդկանց պատմությունն է, ովքեր այս վայրը դարձրել են այն, ինչ կա՝ արտահայտելով իրենց հավատքը այստեղ»։

Սուրբ Գերեզմանի եկեղեցու նշանակությունը ոչ միայն նրա պոտենցիալ պատմական իսկության, այլև դարերի ընթացքում նրա մշակութային և կրոնական ազդեցության մեջ է:

«Անկախ նրանից՝ ինչ-որ մեկը հավատում է Սուրբ Գերեզմանի պատմականությանը, թե ոչ, այն փաստը, որ մարդկանց սերունդները հավատացել են, օբյեկտիվ է։ Այս վայրի պատմությունը Երուսաղեմի պատմությունն է, և գոնե ինչ-որ պահից՝ Հիսուս Քրիստոսի պաշտամունքի պատմությունը»,- ընդգծել է հետազոտողը։

Ներկա հնագիտական ​​աշխատանքն ավելի լայն հետազոտության մի մասն է, որի նպատակն է խորացնել այս սուրբ վայրի պատմական և կրոնական նշանակությունը: Յուրաքանչյուր նոր հայտնագործություն գիտնականներին հնարավորություն է տալիս վերակառուցել աստվածաշնչյան տեքստերում նկարագրված իրադարձությունների մանրամասները և լույս սփռել այն համատեքստի վրա, որում ձևավորվել է վաղ քրիստոնեությունը:

Հետևեք մեզ՝ այստեղ