5 պատճառ, թե ինչու է Սիրուշոյի վերջին տեսահոլովակը հիասթափեցնող և ոչինչ չասող

Blognews.am-ը գրում է.

Հայկական երգարվեստին առանձնապես չեմ հետևում: Իմ երաժշտական ճաշակը և մեր երգիչ-երգչուհիների մատուցած երաժշտությունը ոչ մի ընդհանուր բան չունեն: Բայց, լինելով ֆեյսբուքյան ակտիվ օգտատեր, միշտ տեղյակ եմ լինում մեր շոու բիզնեսի վերջին նորություններին: Հիշում եմ, մի քանի ամիս առաջ ընկերուհիս զանգեց. «Աննա, լսիր, Սիրուշոն նոր երգ ա հրապարակել, շատ լավն ա»: Մտա Ֆեյսբուք, ընկերներիցս շատերն էին կիսվել Սիրուշոյի նոր երգի հղումով, լսեցի իհարկե: Չեմ ասի, թե շատ հավանեցի, բայց կարևորը՝ կլկլոց չէր:

Անցավ մի քանի ամիս, ես արդեն մոռացել էի Սիրուշոյի երգն էլ, Սիրուշոյին էլ, երբ համացանցը «ցնցեց» Սիրուշոյի` «Մի թող ինձ մենակ» երգի հիման վրա նկարահանված տեսահոլովակը: Այս տեսահոլովակին չանդրադառնալ, իհարկե, չեմ կարող: 

Անդրադարձս կանեմ կետերով: Եվ այսպես, 5 պատճառ, թե ինչու է Սիրուշոյի վերջին տեսահոլովակը հիասթափեցնող և ոչինչ չասող.

• Սիրուշոն հայ այն եզակի երգչուհիներից է, ով ունի համաշխարհային ճանաչում  և մեծ լսարան դրսում: Նրա տեսահոլովակներն ու երգերը տարածվում են ամբողջ աշխարհով մեկ: Նա պետք է օգտվի այդ հնարավորությունից և իր տեսահոլովակներում փորձի աշխարհին ներկայացնել Հայաստանը, նրա գեղեցիկ ու տեսարժան վայրերը, մշակույթը, ոչ թե մետրոյի կայարանները, հատկապես, երբ տարբեր երկրների մետրոների շքեղ կայարանների համեմատ մեր մետրոն շատ խղճուկ ու դատարկ է: 

• Ինչպես գիտեք, մետրոն ռազմավարական օբյեկտ է հանդիսանում, և այնտեղ խիստ արգելված են ամեն տեսակ նկարահանումները: Հիշեք, թե քանի ցուցանակի վրա է դա գրված, և ամեն անգամ ինչպես են բղավում մետրոպոլիտենի աշխատակիցները, երբ ձեր ձեռքին ֆոտոխցիկ կամ նկարող հեռախոս են տեսնում: Այս տեսահոլովակում ռեժիսորները շեշտը փորձել են դնել վաղուց հայտնի այն փաստի վրա, որ Սիրուշոն արտոնյալ է, և նրան ամեն բան կարելի է: 

• Սիրուշոյի երգի տեսահոլովակն ինձ կադրեր հիշեցրեց «Метро» ֆիլմի պաշտոնական սաունդթրեք «Би-2»  խմբի «Молитва» երգի տեսահոլովակից և  լուսանկարներ Մինսկի մետրոյում արված սկանդալային ֆոտոշարքից: Ինչպես ասում են՝ լավագույն նորը լավ մոռացված հինն է:

• Սիրուշոն այն եզակի երգչուհիներից է, ով ոճ է թելադրում: Նրա տեսահոլովակների կերպարները շատ կարճ ժամանակում դառնում են ընդօրինակման օբյեկտ հազարավոր հայ աղջիկների համար: Սիրուշոն կրեց նարնջագույն տաբատ և կոստյում, և այդ համարձակ գույնն իր տեղը գտավ հայուհիների զգեստապահարանի սև հագուստի կողքին: Նա կրեց հայկական ավանդական նախշերով խոշոր զարդեր, և հիմա բոլոր նորաձև աղջիկների զարդատուփում գոնե մեկ այդպիսի զարդ կա:  Բայց այս տեսահոլովակում նա ոչ մի նոր թրենդ չթելադրեց: 90-ականներից մեզ հասած կլոր մազափունջ և մոխրագույն վերարկու, որի սեզոնային նորաձև լինելու մասին արդեն մեկ տարի է՝ խոսում են բոլոր կայքերն ու ամսագրերը:

• Եվ վերջապես, ամենատգեղ կադրը, որը փչացրեց տեսահոլովակից ստացածս գոնե չնչին դրական տպավորությունները: Սիրուշո՛ ջան, ախր ինչպե՞ս կարելի է կանգնել մի տեղ, որտեղ մարդիկ նստում են: Սա ինձ համար տեսահոլովակի ամենատգեղ պահն էր։

 

Ցավում եմ, որ արդեն անգամ մեր շոու բիզնեսի ամենավառ երգչուհին մեզ ոչնչով չի զարմացնում...