Երիտասարդ տաղանդավոր կոմպոզիտոր Գրիգորի Բալասանյանի՝ 44-օրյա պատերազմին նվիրված «Լուռ արցունքները» օպերան ներկայացվել է Բոստոն քաղաքում

CULTURE 29 January, 2025 21:16

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երիտասարդ կոմպոզիտոր Գրիգորի Բալասանյանի «Լուռ արցունքները» առաջին օպերայի պրեմիերան տեղի է ունեցել 2024թ. նոյեմբերի 16-ին՝ Բոստոնում՝ Fenway Opera Club-ի հետ գործակցությամբ: Օպերան հիմնված է իրական պատմության վրա: Այն նկարագրում է 44-օրյա պատերազմն ու մի ընտանիքի ճակատագիր: Նոյեմբերի 16-ին այն ներկայացվեց երկու համերգով, երկուսն էլ՝ լեփ-լեցուն դահլիճով: Հանդիսատեսը շատ ջերմ ընդունեց երիտասարդ կոմպոզիտորի ստեղծագործությունը, ոմանք խորապես հուզված էին երաժշտությունից և օպերայում նկարագրված իրադարձություններից: Այժմ կոմպոզիտորը պլանավորում է օպերան ԱՄՆ-ի այլ քաղաքներում բեմադրել:

«Լուռ արցւնքները» օպերան երիտասարդ կոմպոզիտորի առաջին աշխատանքը չէ: Tert.am Life-ը զրուցել է Գրիգորիի հետ՝ անցած ճանապարհի ու ձեռքբերումների մասին:

-Գրիգորի, կպատմե՞ք՝ ինչպես եղավ Ձեր մուտքը երաժշտության ասպարեզ:

-Իմ երաժշտական ճանապարհորդությունը ես սկսել եմ 8 տարեկանից։ Իմ առաջին երաժշտական ալբոմը թողարկվել է 10 տարեկանում: Երբ 12 տարեկան էի, Հայաստանում իմ հեղինակած երաժշտության հիման վրա բեմադրվեց «Ալիսը՝ Հրաշքների աշխարհում» պարային ներկայացումը։ Ներկայացումը բեմադրել են Էլեն Գրիգորյանը և Գառնիկ Մակարյանը:

Իմ առաջին բալետը՝ հիմնված Հայաստանի նախկին առաջին տիկին Նունե Սարգսյանի հեքիաթի վրա, ձայնագրվել է 2019թ. Հայաստանի պետական սիմֆոնիկ նվագախմբի կողմից և պրեմիերան կայացել է 2021թ. Երևանի պարարվեստի պետական քոլեջում; Այն համարվում է հայ երաժշտության պատմության մեջ առաջին մանկական բալետը։

2024թ. մարտի 3-ին «Երաժշտական Հայաստան» համերգաշարի շրջանակում Կարնեգի Հոլում իմ դեբյուտը նշեցի` ներկայացնելով հեղինակային ստեղծագործություններ: «Երաժշտական Հայաստան» ամենամյա միջոցառումը հանդիսատեսին ներկայացնում է տաղանդավոր հայ երաժիշտների և կոմպոզիտորների: Ինձ համար պատիվ էր ելույթ ունենալ այս բեմում, և ես անչափ շնորհակալ եմ ինչպես կազմակերպիչներին, այնպես էլ հանդիսատեսին ջերմ ընդունելության համար:

-2022թ. ընդունվել եք Բերքլիի Բոստոնի կոնսերվատորիա, ի՞նչ փոխվեց ձեր ստեղծագործական կյանքում:

-Այնտեղ ես ներկայացրել եմ բազմաթիվ ստեղծագործություններ՝ սկսած անհատական ստեղծագործություններից մինչև անսամբլային ստեղծագործություններ։ Իմ կրթության համար ֆինանսական աջակցություն եմ ստացել հենց Բոստոնի կոնսերվատորիայից: Բացի այդ, շատ այլ կազմակերպություններ և հիմնադրամներ շնորհել են կրթաթոշակներ՝ շարունակելու իմ կրթությունը և զարգացնելու իմ տաղանդը:

ԱՄՆ-ն ինձ հարթակ տվեց երաժշտության մեջ իմ ստեղծագործական ունակությունները զարգացնելու համար: Ես այստեղ ազատ եմ արտահայտելու իմ տեսակետները երաժշտության միջոցով և գնահատում եմ այն, ինչ ինձ տալիս է ԱՄՆ համայնքը: Այստեղ իմ երաժշտությունը թղթի վրա չի մնում։ Միշտ կան մարդիկ, ովքեր հետաքրքրված են համագործակցել նոր նախագծեր ստեղծելու և ԱՄՆ-ի մշակութային կյանքին նպաստելու համար: Ես գնահատում եմ այս սերը երաժշտության հանդեպ ԱՄՆ-ում և գնահատում եմ այն բոլոր հնարավորությունները, որոնք այս երկիրն ինձ տալիս է իմ ոլորտում առաջադիմելու համար:

-Ի՞նչ ծրագրեր ունեք մոտ ապագայի համար

-Ես ավարտում եմ համալսարանը նախատեսվածից մեկ տարի շուտ: Ես արդեն դիմել եմ մի քանի համալսարան և հուսով եմ շարունակել ուսումս ԱՄՆ-ում՝ մագիստրոսի կոչում ստանալու համար, իսկ ավելի ուշ՝ PhD: Արդեն պլանավորված հարցազրույցներ ունեմ մի քանի բուհերի հետ և վերջնական որոշումը կկայացվի ապրիլին: Այժմ աշխատում եմ «Հռիփսիմյանց կույսեր» նոր օպերայի վրա:

Հեղինակ՝ Մարինե Ոսկանյան

Հետևեք մեզ՝ այստեղ