«Բիզնեսի համար ինչ ասես անում են, բա երեխեքի մասին ո՞վ մտածի»․ «Փոսի դպրոցի» ծնողները բողոքում են

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

MediaHub-ը երկու շաբաթ առաջ անդրադարձել էր այն իրավիճակին, որ ձևավորվել է Երևանի Հակոբ Օշականի անվան 172 հիմնական դպրոցում՝ հայտնի «փոսի դպրոցում»: Հիշեցնենք, տևական ժամանակ է դասերն այս դպրոցում հեռավար են:

Մեզ հետ զրույցում տնօրենը նշել էր, որ Օրբելի 23 հասցեում 30 հարկանի շենքի հիմք է գցվում, և այդ աշխատանքների արդյունքում դպրոցում որոշակի տատանումներ են առաջանում։ Նա հավելել էր, որ դիմել են տարբեր կառույցներ, ստուգումներ են իրականացվում։ Ըստ այդմ, տեղեկացրել էր, որ մի քանի օր հեռավար կանցկացվեն դասերը՝ երեխաների անվտանգության և ապահովության համար։

Մեկ շաբաթ առաջ MediaHub-ը կրկին կապ հաստատեց դպրոցի տնօրենի հետ, որը տեղեկացրեց՝ դասերը շուտով կվերսկսվեն։

«Դեռ դասերն օնլայն ռեժիմով են, բայց երկուշաբթի օրվանից, ըստ երևույթի, աշակերտները կգան դպրոց, քանի որ ստուգումներն արդեն արվեցին, երկրաբանականի պատասխանն եկավ՝ ամենը նորմալ է, դպրոցի շենքի հիմքն ամուր է, դպրոցի շենքը խնդիր չունի»,- MediaHub-ի հետ զրույցում նշել էր դպրոցի տնօրենը։

Սակայն, այսօր MediaHub-ը կրկին ահազանգ ստացավ աշակերտների ծնողներից, թե դասերը դեռ օնլայն են, իսկ դպրոցի շենքի վրա բավականին շատ են ճաքերը։ Ծնողների մեծամասնությունը բողոքում է և շեշտում, որ խախտվել է երեխաների կրթություն ստանալու իրավունքը, նրանց շահերը ոտնահարվել են ու կարծես ոչ մեկին դա չի հուզում: Մեզ դիմած ծնողները նշում են, որ նրանք ցանկանում, են, որպեսզի երեխաները այցելեն դասի, դասապրոցեսը լինի դպրոցում, այլ ոչ հեռավար, ինչպես 2020 թվականին էր, թեև նրանցից շատերը նաև ընդունում են, որ դպրոցի վիճակն էլ մտահոգիչ է, քանզի գործ ունեն երեխաների անվտանգության հետ:  

«Այս ի՞նչ իրավիճակ է, ասում են այդ կառուցվող շենքը կապ ունի ՀՀ փոխվարչապետ Մհեր Գրիգորյանի հետ, դե արդեն պարզ է՝ ինչ կլինի։ Այսինքն, մինչև 2026 թվական պետք է երեխաներն օնլայն դասերի մասնակցե՞ն: Ես աշխատում եմ, երեխաներս տանը ո՞ւմ հետ մնան, ինչո՞ւ պիտի օնլայն լինեն դասերը, որքա՞ն երեխաները պետք է օնլայն դասերի մասնակցեն, էս ի՞նչ վիճակ ա: Բիզնեսի համար ինչ ասես անում են անում, երեխաներն են տուժում, ոտնահարվում են երեխաների իրավունքները։ Այլ դպրոց չե՛մ ուզում տեղափոխեմ, իմ երեխաները պետք է սովորեն միայն այդ դպրոցում»,– MediaHub-ի հետ զրույցում ահազանգեց աշակերտներից մեկի ծնողը։

Նշենք, այսօր մամուլը գրել էր, որ «Ռենշին» քաղաքաշինական ներդրումային ընկերությունը անմիջական կապ ունի ՀՀ փոխվարչապետ Մհեր Գրիգորյանի հետ։ Եվ որ ինքը՝ փոխվարչապետը, խուսափում է որևէ արձագանք տալուց, հերքելուց կամ հաստատելուց, սակայն, տեղեկություններ կան, որ Մհեր Գրիգորյանի հովանավորությամբ է «Ռենշին» ընկերությունը հաջողություններ գրանցում կառուցապատման ոլորտում։

MediaHub-ը դարձյալ կապ հաստատեց դպրոցի տնօրեն Գայանե Մկրտչյանի հետ, որը հաստատեց՝  դասերը դեռ օնլայն են։

«Սպասում ենք, ուրբաթ սեսմիկը վերջնական պատասխանը կտա, քաղաքապետարանից էլ դեռ պատասխան չի եկել, սպասում են` եզրակացությունը գա երկրորդ ստուգման: Հույս ունենք, երկու օր սպասենք, լաբարատոր եզրակացությունը կտան, և հույսով եմ, որ երկուշաբթի օրվանից նորմալ աշակերտները կգան դասի»,– նշեց տնօրենը։

Հարցին, թե արդյո՞ք տնօրենը կարդացել է ծանոթ է մամուլի հրապարակմանը, թե ցնցումների պատճառ դարձած կառուցապատող կազմակերպությունը կապ ունի ՀՀ փոխվարչապետ Մհեր Գրիգորյանի հետ, տնօրենը նշեց, որ սոցցանցերում չկա և այնքան զբաղված է աշխատանքով, որ նման խոսակցություններ ո՛չ լսել է, ո՛չ էլ ուզում է այս պահին լսել, իրեն հետաքրքրում է դպրոցը, և որ դպրոցը լինի անվտանգ, գան բնականոն աշխատանքի։

Դիտարկմանը, թե ինչու ստուգումները այսքան ձգձգվեցին, մեկ ստուգումը բավարար չէ՞ր, մեր զրուցակիցը նշեց. «Երկրորդ անգամ են ստուգում, երևի, որ ավելի վստահ լինեն, երեխաները հանգիստ գան դպրոց։ Ինչ–որ տարբեր շեշտեր կար, դրա համար կրկին ուզեցին ստուգել»։

Ինչ վերաբերում է հարցին, թե ի՞նչ արձագանք կա ԿԳՄՍՆ–ից, տնօրենը պատասխանեց․ 
«ԿԳՄՍՆ–ից հետաքրքրվում են, չգիտեմ, երևի իրենք էլ են աշխատում, ես կոնկրետ քաղաքապետարանի հետ եմ կապի մեջ»։