11 դասախոս դիմել է դատարան՝ ընդդեմ բուհի

Դեռ հունվարին Հայաստանի ֆիզիկական կուլտուրայի եւ սպորտի պետական ինստիտուտի նախկին ռեկտոր Դավիթ Խիթարյանը «Հրապարակի» հետ զրույցում նշել էր, որ բուհի հոգաբարձուների խորհուրդն իրեն անհիմն կերպով ազատել է աշխատանքից, ռեկտորի ԺՊ է նշանակվել բուհի նախկին դեկաններից մեկը` Տիգրան Սիմոնյանը, ում ամիսներ առաջ նկատողությամբ ազատել էին դեկանի պաշտոնից: 2023-ի դեկտեմբերի վերջին Հայաստանի ֆիզիկական կուլտուրայի եւ սպորտի պետական ինստիտուտի հոգաբարձուների խորհուրդը նիստ էր արել եւ իր որոշմամբ ռեկտոր Դավիթ Խիթարյանին անսպասելիորեն ազատել աշխատանքից: Ընդ որում` դա նրան ազատելու երկրորդ դեպքն էր: Նախորդը 2023-ի սեպտեմբերին էր եղել․ դադարեցրել էին նրա լիազորությունները՝ Հակակոռուպցիոն դատարանում քննվող գործի պատճառով, սակայն որոշ ժամանակ անց դատարանը վերականգնել էր ռեկտորի լիազորությունները: 

Խիթարյանը այս անգամ էլ էր հայտարարել, որ դիմելու է դատարան, եւ իր ազատման պատճառը համարում էր այն, որ ինքը «պայքարում էր կոռուպցիայի դեմ»: Մեր հրապարակումից հետո բուհի հոգաբարձուների խորհուրդը հաղորդագրություն տարածեց` նշելով, որ ռեկտորի հետ աշխատանքային պայմանագրի լուծման համար հիմք են հանդիսացել աշխատանքային պարտականությունները, հոգաբարձուների խորհրդի հանձնարարականը պատշաճ չկատարելը եւ խորհրդին անհրաժեշտ փաստաթղթեր չներկայացնելը, ինչի համար Խիթարյանի նկատմամբ կիրառվել է կարգապահական տույժ՝ նկատողություն։ Մյուս պատճառն էլ այն է, որ Դավիթ Խիթարյանի կողմից ֆիզկուլտինստիտուտի անշարժ եւ շարժական գույքի տնօրինումն օրենսդրությամբ սահմանված կարգի խախտումով է իրականացվել, ինչի պատճառով նախկին ռեկտորի նկատմամբ կիրառվել է կարգապահական տույժ՝ խիստ նկատողություն։ 

Այսպիսով` նա ստացել է նկատողություն եւ խիստ նկատողություն եւ այդ հիմքով հեռացվել աշխատանքից: Սակայն մեզ հետ զրույցում բուհի հոգաբարձուների խորհրդի նախագահ, ԿԳՄՍ փոխնախարար Կարեն Գիլոյանը բոլորովին այլ պատճառ էր նշել` որ բուհում վատ մթնոլորտ է տիրում, եւ դա Խիթարյանի մեղքն է: Նաեւ ասել էր, որ Խիթարյանը չի տնտեսել բուհի գումարները` վարկով ծառայողական մեքենա է գնել: 

Մենք Դավիթ Խիթարյանից մեկնաբանություն խնդրեցինք, թե ինչ ընթացքում է այժմ գործը, ինչ է կատարվում բուհում: Խիթարյանը նշեց, որ 2 վարույթ է հարուցվել` իր կողմից բուհի դեմ, իսկ ընդհանուր առմամբ ավելի քան 11 դասախոս դատական հայց է ներկայացրել Ֆիզիկակական կուլտուրայի և սպորտի ինստիտուտի դեմ, դասախոսները պնդում են, որ բուհից հեռացվել են անհիմն. «Դատական գործը դեռևս ընթացքի մեջ է, գործը առաջին ատյանում է, հաջորդ նիստը այս ամսվա սեպտեմբերի 16-ին է: Ինստիտուտի վրա այս պահի դրությամբ կա 11 դատական գործ: Ինձանից հետո լիքը մարդկանց են ապօրինաբար ազատել աշխատանքից, մեծ մասը որոշել է դատարանում իր իրավունքները պաշտպանել: Մեկ-երկուսն արդեն իսկ առաջին ատյանում հաղթել են, մյուսներն էլ, կարծում եմ, տարվա վերջ պարզ կլինի», - ասաց նախկին ռեկտորը: 

Իսկ ովքե՞ր են այդ 11 աշխատակիցները. «Օրինակ` ուսումնագիտական գծով պրոռեկտորը երեք հայց է ներկայացրել, այդ թվում՝ մեկը զրպարտության հոդվածով` ռեկտորի ԺՊ-ի հետ կապված: Մի դասախոսի էլ  գրեթե ժամեր չեն տալիս` այն պատճառով, որ հոգաբարձուների խորհրդում հօգուտ ինձ է քվեարկել, նա էլ է դատական հայց ներկայացրել, այժմ գործը Վերաքննիչ դատարանում է: Որակի բաժնի ղեկավարը, բակալավրիատի ղեկավարը, էլի մի քանիսը դատական հայցեր են ներկայացրել: Երկու հայց էլ ես եմ ներկայացրել: Ստեփանյան Լուսինեն նույնպես երեք հայց է ներկայացրել: Հիմնական պատկերն այսպիսին է»-, նշեց նա: 

Դատական գործերի ընթացքի մասով էլ նախկին ռեկտորն ասում է. «Թեպետ ես խնդիր չեմ տեսնում, բայց նման վեճերը սովորաբար լուծվում են երեք ամսում, բայց իններորդ ամիսն է` գործը ընթացքի մեջ է, կարծես, դա էլ համակարգի ծանրաբեռնվածության հետ է կապված»: Ինչո՞ւ բուհի ռեկտորի թափուր պաշտոնի համար մրցույթ չի հայտարարվում և վերջապես ուսանողների թվի առումով ի՞նչ վիճակում է Ֆիզկուլտինստիտուտը. «Ռեկտորի մրցույթի մասով ոչինչ չգիտեմ, չեմ էլ ուզում իմանալ, ինչ վերաբերում է ուսանողներին, ապա ասեմ, որ դիմորդների քանակը նվազել է, դարձել վերջին հինգ տարվա ընթացքում ամենաքիչը, բայց թե կոնկրետ այդ քչից էլ քանիսն են ընդունվել, դա հստակ չեմ կարող ասել», - եզրափակեց մեր զրուցակիցը: