Այս մղձավանջը, ազգային խայտառառակությունն ու անարգանքն այլևս չի կարելի հանդուրժել...

Սիրելի՛ հայրենակիցներ, արդեն շուրջ մեկ շաբաթ այս հայրենադավ իշխանությունների հեռացմանն ուղղված գործողությունները չեն տալիս ակնկալվող արդյունք: Եվ, բնականաբար, դա այդքան հեշտ չի լինելու: Հեշտ չի լինելու, որովհետև իշխանությունների թիկունքում կանգնած են հզոր ու նենգ  ուժեր, որովհետև նրանք տիրապետում են ֆինանսական ահռելի միջոցների, իսկ նրանց անամոթությունն ու անպատկառությունը սահմաններ չունի: Այս  իրավիճակում,  որպեսզի շարժումը լինի արդյունավետ, և կարճ ժամանակում հասնենք մեր նպատակին, շարժումը պետք է կրի համազգային բնութ  և լինի կազմակերպված: Շարժումը համակարգող կոմիտեն էլ համազգային ներկայացվածություն պետք է ունենա: Կոմիտեի կազմի ընտրությունը չպետք է լինի մեկ-երկու քաղաքական ուժի կամ դաշինքների  մենաշնորհը, այն չպետք է փակ լինի այլ քաղաքական կամ հասարակական կազմակերպությունների համար: Որպեսզի համակարգող կոմիտեն ունենա  հանրային վստահություն, հեղինակություն և ազդեցություն հանրային բոլոր շերտերի վրա, նրա կազմում պետք է ներկայացված լինեն հանրապետության քաղաքական-հասարակական ազդեցիկ ուժերի, հոգևոր դասի, մտավորականության, զինվորականության ու քաղաքագիտական հանրության ընտրանին՝ փորձառու, նվիրյալ և հանրային վստահություն վայելող ներկայացուցիչները: Այդ սկզբունքով կոմիտեն ձևավորելուց հետո պետք է առանց ժամանակ կորցնելու ձեռնամուխ լինել իշխանությունների հեռացման իրատեսական քարտեզի, երկիրը ճգնաժամային իրավիճակից դուրս բերելու դրույթների մշակման, ազգային համաձայնության ժամանակավոր կառավարության ձևավորման ու վարչապետի թեկնածուի ընտրության ու հանրությանը ներկայացման պատասխանատու գործին: Նպատակահարմար կլինի, որ  համակարգող կոմիտեն ունենա նաև պրոֆեսիոնալներից կազմված մշտական գործող աշխատակազմ:

Սիրելի՛ հայրենակիցներ,  զոհասեղանին է դրված  Արցախը, Հայաստանը, հայի ազգային արժանապատվությունն ու լինելիությունը իր պատմական տարածքում: Երկրի ու ժողովրդի համար այս օրհասական պահին պետք է մի կողմ թողնել բոլոր տեսակի անձնական ու կուսակցական նեղ  շահերը, ամբիցիաներն ու կամակորությունները: Մենք կանգնած ենք պատասխանատու երկընտրանքի՝ ստրկության, հայրենազրկման, թրքահպատակության և արժանապատվության, պետականության ու մեր պատմական տարածքում ապրելու ընտրության առջև: Իսկ այս իշխանություններին հանդուժելը, նվաստացման ու ինքնաոչնչացման հետ հաշտվելը պարզապես ազգային խայտառակություն են և անպատվություն: Հիմա ազգի ու երկրի փրկությունը քաղաքական ընդդիմության համախմբման, ազգային էլիտայի և ժողովրդի նվիրյալ ու առաջադեմ հատվածի, համազգային համերաշխության  մեջ պետք է  փնտրել: Արցախում Հայաստանի իշխանությունների  հանցավոր անտարբերության ու անգործության արդյունքում ամեն Աստծո օր դաժանորեն կոտորածի են ենթարկվում մեր հայրենակիցները, իսկ հապաղելը հանցագործություն է, հապաղելը մահ է, հապաղելը անդառնալի նոր կորուստների պատճառ  կարող է դառնալ, Սյունիքի հանձնումը կարող է լինել: Հաղթանակն ու հաջողությունն էլ երաշխավորված են այնտեղ, որտեղ կա միասնություն, համախմբում, պայքարելու և ապրելու կամք:

ՀԱՅԿ  ՂԱԶԱՐՅԱՆ
տնտեսագիտության   թեկնածու