ՏՏ խոշոր հարկատու «Դեվսոֆտ» ընկերությունը Հայաստանում է արդեն մեկ տարի. «Փաստ»

«Փաստ» օրաթերթը գրում է

DevSoft Armenia ընկերությունը ստեղծում է գործիքներ ծրագրավորողների համար, դրանք կոչվում են UI գրադարաններ, որոնցով ծրագրավորողներն ավելի հեշտ ու արագ են կառուցում իրենց ծրագրերը: Ընկերության ղեկավար Դավիթ Գրիգորյանի հետ զրուցել ենք դրա ստեղծման, առաջարկվող ծառայությունների, այս տարվա «ԴիջիԹեքին» մասնակցության մասին, անդրադարձել նաև IT ոլորտին հուզող հարցերին: Դավիթը նշում է, որ աշխարհի տարբեր անկյուններից ծրագրավորողներ օգտվում են ընկերության գործիքներից կամ էլ ամբողջովին դրանցով են կատարում իրենց պատվերները: «Հայաստանում ունենք 200-ից ավելի աշխատակից, ունենք նաև գրասենյակներ Էստոնիայում, Ֆիլիպիններում, Կիպրոսում»,-ընդգծում է «Փաստի» զրուցակիցը:

Հայաստանյան գրասենյակն այս տարի նշում է իր գործունեության մեկամյակը: Ընկերության ղեկավարն ասում է՝ DevSoft Armenia-ն, ընդլայնվելով, գրասենյակներ հիմնելով տարբեր երկրներում, դարձել է միջազգային ընկերություն. «Հայաստանում՝ որպես այս տարածաշրջանը «ծածկող» երկիր, պետք է գրասենյակ ունենայինք: Աշխարհում տեղի ունեցող գործընթացները նպաստեցին նրան, որ ԱՊՀ երկրներից մասնագետներ ժամանեն Հայաստան և այստեղ մեր գրասենյակի բացման գործընթացը ևս արագանա»: Խոսելով ընկերության առանձնահատկությունների մասին՝ նշում է, որ այն տեխնիկապես ավելի հետաքրքիր է ծրագրավորողների համար:

«Սա վերաբերում է առօրյա աշխատանքներին ու առաջադրանքներին, որոնք նրանք պետք է լուծեն: Դրանք նաև նպաստում են մեզ մոտ աշխատող մասնագետների արագ զարգացմանը։ Աշխատանքի բնույթը հետաքրքիր է և շատ արագ զարգացող: Ստեղծում ենք ու սպասարկում մեր պրոդուկտները, ոչ թե պատվերներ կատարում, անընդհատ աշխատում ենք մեր լուծումների կատարելագործման ուղղությամբ: Շատ ընկերություններից հենց այս հատկանիշներով ենք տարբերվում: Մեր ընկերության ծրագրավորողները ստեղծում են գործիքներ մյուս ծրագրավորողների համար, տեխնիկական տեսանկյունից՝ իրենք մի քանի քայլ առաջ են, ավելի լայն ու խորն են մտածում: Մեր տեխնիկական աջակցության բաժինը աշխարհի մակարդակով լավագույններից մեկն է, սա չափազանցություն չէ, հաճախորդին տալիս ենք տեխնիկական ամբողջական սպասարկում:

Օրինակ՝ մեր հաճախորդը Հնդկաստանում բնակվող ծրագրավորող է: Մեր աջակցող ինժեները ստանում է հայտը և մինչև վերջ արձագանքում հաճախորդի բոլոր հարցերին, լուծում առաջացած խնդիրները: Շուկայի ու հաճախորդների հետ սինխրոնիզացված աշխատում ենք: Շատ ենք կարևորում մեր աշխատակիցների հանգստի և ժամանցի ապահովումը: Սպորտ, արվեստ, ինտելեկտուալ խաղեր՝ այս ամբողջը մեր թիմի յուրաքանչյուր անդամի համար առաջնահերթություն է»,-հավելում է Դավիթը:

Պետք է ընդգծել, որ ընկերությունում իրապես մեծ ուշադրություն են դարձնում աշխատակիցների հարմարավետությանը, ամեն ինչ արվում է, որ ստեղծագործական աշխատանք կատարող մասնագետները նաև լիարժեք կերպով հանգստանան, իսկ հանգիստն իր մեջ ներառում է ինտելեկտուալ խաղեր, սպորտային միջոցառումներ, թիմի անդամների հանդիպումներ: Իսկ հիմնական նպատակը յուրօրինակ համայնքի կերտումն է: Ի դեպ, DevSoft Armenia-ն մասնակցելու է մարտի 10-12-ը Կ. Դեմիրճյանի անվան մարզահամերգային համալիրում կայանալիք տարածաշրջանի ամենածավալուն տեխնոլոգիական «ԴիջիԹեք 2022» ցուցահանդեսին՝ այցելուներին ներկայացնելով իրենց առանձնահատկություններն ու գրավչությունը։ Սա հարթակ է լինելու ծանոթանալու, շփվելու, գուցե հետագայում նաև համագործակցելու համար: Զրուցեցինք նաև ոլորտային խնդիրների մասին: Մեր պաշտոնյաները տարբեր հարթակներից հայտարարում են, որ Հայաստանը դիրքավորվում է որպես IT երկիր:

«Սրա մասին ասվում է, բայց իրականում մի շարք առումներով հետ ենք այն երկրներից, որոնց հետ պետք է մրցակցեինք: Մեզ մոտ չկան ոլորտային արտոնություններ: Մտահոգությունն այն է, որ մեր երկրից կարող են մեծ և լուրջ կազմակերպություններ, օրինակ՝ Վրաստան գնալ: Մեկ պարզ օրինակ. Հայաստանում ԱՁ-ն հարկվում է 5 տոկոսի չափով, Վրաստանում՝ մեկ տոկոսի, արդյոք ՀՀ քաղաքացին ԱՁ չի բացի Վրաստանում, վերադառնա Հայաստան և վրացական ԱՁ-ով աշխատի: Բացառված չէ: Մեր մտահոգությունները կապված են նման հարցերի հետ, Հայաստանը չի մրցակցում այլ պետությունների հետ հարկային միջավայրի բարելավման ուղղությամբ:

Պետությունը պետք է հստակ չափանիշներ սահմանի, օրինակ՝ բացառապես արտահանում իրականացնող ընկերությունները պետք է դոլարով աշխատավարձ վճարեն: Օրինակ՝ IT ընկերությունն ունի հաճախորդներ բացառապես արտասահմանից, գործարքների համար վճարումները կատարվում են դոլարով և, բնական է, նա պետք է հնարավորություն ունենա աշխատավարձերը ևս վճարել արտարժույթով: Հեծանիվ չենք հնարում, ուրիշ երկրներ սա վաղուց անում են: Պետք է օգտվենք լավագույն փորձից, հակառակ դեպքում՝ իրենք վազում են, իսկ մենք տեղում կանգնած ենք: Նմանատիպ շատ հարցեր կան, որոնք մեզ մտահոգում են, համոզված ենք, որ ամիսների ընթացքում շատ մեծ ընկերություններ մեր երկրից կգնան, իսկ նրանք մեր երկրում հարկեր են վճարում»,եզրափակում է Դավիթ Գրիգորյանը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում