ՊԱՏՄՈՒԹՅԱՆ ԱՅՍ ՕՐԸ (28 ՀՈԿՏԵՄԲԵՐԻ). Երևանում տեղի է ունեցել Ցեղասպանության զոհերի հիշատակին նվիրված հուշարձան-կոթողի բացումը. «Փաստ»

«Փաստ» օրաթերթը գրում է

ՏՈՆԵՐ ԵՎ ՀԻՇԱՐԺԱՆ ՕՐԵՐ

Ուսանողների միջազգային օր, Անիմացիայի միջազգային օր, Չեխիա և Սլովակիա՝ Չեխոսլովակիայի հիմնադրման օր, Հունաստան՝ Օխի օր, Կիպրոս՝ Հունական սփյուռքի օր, Ուկրաինա՝ Ֆաշիստական օկուպացիայից ազատագրման օր:

ՀԱՅ-ՀԱՅԱՍՏԱՆ

1270-վախճանվել է Հայոց Կիլիկիայի թագավոր Հեթում Ա-ն։

1817 – ծնվել է բանասեր և լեզվաբան Ղևոնդ Հովնանյանը։

1857 – ծնվել է նկարիչ, գրող և հասարակական գործիչ Գևորգ Բաշինջաղյանը։

1887 –ծնվել է դաշնակահարուհի Թագուհի Շահնազարյանը։

1908-լույս է տեսել Ստամբուլի «Ժամանակ» օրաթերթի առաջին համարը 15 հազար տպաքանակով, այն չի ունեցել կուսակցական ուղղվածություն և իր շուրջն է հավաքել ժամանակի ամենահեղինակավոր հայ մտավորականներին:

1920- հայ-թուրքական պատերազմի ժամանակ թուրքական բանակը վերսկսել է ընդհանուր հարձակումը և իր վերահսկողության տակ է վերցրել Արդահան նահանգի հարավային հատվածը։

1938 –ծնվել է խորհրդահայ երգչուհի Կարինե Լիսիցյանը։

1950 –ծնվել է բժիշկ, մոլեկուլային կենսաբան Վեհարի Սաքանյանը։

1959 –ծնվել է նկարչուհի Նունե Աղբալ յանը։

1963-վախճանվել է բանասեր և պատմաբան Ներսես Ակինյանը։

1967- Երևանում՝ Ծիծեռնակաբերդի բարձունքում, տեղի է ունեցել1915 թվականի Մեծ եղեռնի զոհերի հիշատակին նվիրված հուշարձան-կոթողի բացումը:

1974-շահագործման է հանձնվել Երևանի «Ռոսիա» կինոթատրոնը:

1975-Լիբանանի մայրաքաղաք Բեյրութում տեղի է ունեցել թուրքական դեսպանատան ռմբահարումը հայ ահաբեկիչների կողմից, որը առաջացրել է զգալի ավերածություններ։

1989- Խորհրդային միության Գերագույն խորհուրդը լուծարել է Արցախում իր իսկ ստեղծած «Վոլսկու կոմիտեն»:

1993- Ղարաբաղյան պատերազմի ժամանակ հայկական ստորաբաժանումները տանկային գումարտակի օժանդակությամբ գրոհել և գրավել են Մինջևան երկաթուղային կայարանը։

1999- Հայաստանի Ազգային ժողովում հոկտեմբերի 27-ին իրականացված ահաբեկչական գործողությունն ավարտվել է, լուսադեմին ահաբեկիչների կողմից զենքերը վայր դնելուց ու հանձնվելուց հետո գերեվարվածները ազատ են արձակվել։

2004-«Կարեն Դեմիրճյան» մարզահամերգային համալիրում մեկնարկել է «Հայագրոֆորում» առաջին միջազգային համաժողովը, որին մասնակցել են ինչպես կառավարության և Ազգային ժողովի անդամներ, այնպես էլ միջազգային դոնոր կազմակերպությունների ներկայացուցիչներ, Հայաստանում հավատարմագրված դիվանագիտական ծառայությունների ղեկավարներ, աշխարհի 27 երկրի մասնագետներ ու ագրարային բիզնեսով զբաղված գործարարներ, հարյուրավոր ֆերմերներ Հայաստանի տարբեր մարզերից:

2011-Երևանի քաղաքապետ Կարեն Կարապետյանը հրաժարականի դիմում է ներկայացրել՝ այդ մասին հայտարարելով «Ֆեյսբուքի» իր էջում:

2014 - Հադրութը (Արցախ) և Բըրբանքը (ԱՄՆ) դարձել են բարեկամ քաղաքներ։

2019-Խորհրդարանի նախկին նախագահ Արա Բաբլոյանին մեղադրանք է առաջադրվել, խափանման միջոց է ընտրվել ստորագրությունը չհեռանալու մասին, նույն գործով մեղադրանք է առաջադրվել նաև Ազգային ժողովի աշխատակազմի ղեկավարի նախկին տեղակալ Արսեն Բաբայանին, որը կալանավորվել է։

2020- Ղարաբաղյան պատերազմի ընթացքում Բերձորի ուղղությամբ շարունակվել են ադրբեջանական ուժերի գործողությունները, սակայն անհաջող. ըստ պաշտոնական տեղեկատվության, հայկական ուժերին անգամ հաջողվել է որոշակի դիրքային բարելավումներ իրականացնել։

ԱՇԽԱՐՀ

312 -տեղի է ունեցել Մուլվինյան կամրջի ճակատամարտը Մակսեցիայի և Կոնստանտինի բանակների միջև, որի արդյունքում հաղթանակած Կոնստանտինը դարձել է Հռոմի կայսր, իսկ վիրավորված Մակսեցիան վախճանվել է հաջորդ օրը։

1237 -եղել է առաջին հիշատակությունը Բեռլինի մասին, և այդ օրը համարվում է Բեռլինի ծննդյան օրը։

1420 –Չինաստանում Մին դինաստիան Արգելված քաղաքի շինարարության ավարտից հետո Պեկինը հայտարարել է երկրի մայրաքաղաք:

1469 -ծնվել է հոլանդացի փիլիսոփա, մարդասեր, Վերածննդի դարաշրջանի խոշորագույն գիտնական Էրազմ Ռոտերդամցին։

1492 - Քրիստափոր Կոլումբոսը հայտնաբերել է Կուբան։

1707 -Ճապոնիայում տեղի ունեցած հզոր երկրաշարժի զոհ է դարձել 5 հազար մարդ։

1860 - ծնվել է մարտարվեստի ճապոնացի վարպետ, ձյուդոյի ստեղծող Ձիգորո Կանոն։

1885 –ծնվել է ռուս բանաստեղծ և թատերագիր Վելիմիր Խլեբնիկովը։

1886– Նյու Յորքում տեղի է ունեցել Ազատության արձանի հանդիսավոր բացումը:

1892- կայացել է շարժանկարի առաջին հանրային ցուցադրությունը։

1900 - Ֆրանսիայի մայրաքաղաքում փակվել են Երկրորդ Օլիմպիական խաղերը։

1903– ծնվել է անգլիացի գրող, գրաքննադատ և լրագրող Իվլին Վոնը։

1914 –ծնվել է անգլիացի կենսաքիմիկոս Ռիչարդ Լորենս Միլինգթոնը։

1914 -ծնվել է ամերիկացի վարակաբան, պոլիոմիելիտի պատվաստանյութի ստեղծող Ջոնաս Սոլկը։

1914- «Կոդակ» ընկերությունը հայտարարել է, որ սկսել է աշխատել գունավոր լուսանկարչության տեխնոլոգիայի ստեղծման ուղղությամբ։

1918– Առաջին համաշխարհային պատերազմի ժամանակ Չեխոսլովակիան հայտարարել է Ավստրո-Հունգարիայից անկախանալու մասին, որով իսկ փլուզվել է ԱվստրոՀունգարական Կայսրությունը։

1933– ծնվել է բրազիլացի նշանավոր ֆուտբոլիստ Գարինչան:

1940 -Հունաստանը պաշտոնապես մտել է Երկրորդ համաշխարհային պատերազմի մեջ, այդ օրը Հունաստանում նշվում է որպես Օխիի օր։

1955 –ծնվել է ամերիկացի գործարար Բիլ Գեյթսը։

1956– ծնվել է Իրանի նախկին նախագահ Մահմուդ Ահմադինեժադը:

1962 -Կարիբյան ճգնաժամի ժամանակ ԽՍՀՄ ղեկավար Նիկիտա Խրուշչովը հայտարարել է Կուբայից խորհրդային հրթիռների դուրս բերման մասին։

1967 –ծնվել է ամերիկացի դերասանուհի Ջուլիա Ռոբերտսը։

1969- վախճանվել է ռուս խորհրդային բանաստեղծ Կորնեյ Չուկովսկին։

2011 -Մոսկվայում 6 տարվա վերակառուցումից և հիմնանորոգումից հետո վերաբացվել է Մեծ թատրոնը։

Մանրամասները՝ «Փաստ» օրաթերթի այսօրվա համարում