«Ցանկացած սահմանափակում խիստ հարվածելու է բիզնեսին ու շրջանառությանը». «Փաստ»

«Փաստ» օրաթերթը գրում է

Մենք շրջանառության զգալի կորուստ ենք ունենալու, որը մանավանդ այս սեզոնին ոչ մի կերպ չի նպաստելու ոլորտի հետագա առողջացմանը:

«Ռեստորանների ասոցիացիա» ՀԿ նախագահ Աշոտ Բարսեղյանի դիտարկումն է՝ կապված հնարավոր նոր սահմանափակումների հետ: Նշենք, որ Covid-19 վարակով պայմանավորված՝ առողջապահության նախարարությունը մշակում է մի նախագիծ, ըստ որի, ժամանցի վայրեր, այդ թվում՝ ռեստորաններ այցելելու համար պատվաստված լինելը կամ թեստավորվելը պարտադիր կդառնա: Աշոտ Բարսեղյանը սահմանափակումների երկու տեսակի մասին է մատնանշում, որոնք, ըստ էության, ընդունելի կլինեին:

«Սովորաբար այնպիսի միջոցներ են ձեռնարկվում, որ սահմանափակումները բիզնեսի վրա չազդեն, երկրորդ՝ պետությունը փոխհատուցում է բիզնեսի կրած վնասները: Մենք բոլորս լավ գիտակցում ենք, որ այս կառավարությունը դժվար թե կարողանա կամ ցանկանա փոխհատուցում տրամադրել: Հասկանալով սա՝ պետք է գիտակցենք, որ նման ցանկացած սահմանափակում խիստ հարվածելու է մեր բիզնեսին ու շրջանառությանը: Բացի այդ, դժվար է լինելու դա իրագործել ու իրականացնել նշվածը: Շատ դժվար կլինի ապահովել նաև այդ հնարավոր օրինագծի կիրառական մասը:

Այլ խնդիր էլ կա: Ինչպես իրավացիորեն նշեցին շատերը, ռեստորանային ոլորտը վերջինն է, որի նկատմամբ կարելի է այդ սահմանափակումները կիրառել: Օրինակ՝ նախօրեին առողջապահության նախարարությունը և, առհասարակ, կառավարությունը «մաստեր կլաս» ցույց տվեց ՊՇՌ թեստ հանձնելու կազմակերպման առումով: Իրականում պարզապես հերթ կազմակերպեց: Դժվա՞ր էր էլեկտրոնային հարթակ ստեղծել, մարդկանց հերթագրել, ժամ սահմանել ու հենց այդ ժամին թեստավորում կազմակերպել: Այսինքն, պարզունակ կազմակերպչական կարողություններ անգամ չկան»,-ասաց նա՝ նշելով, որ կարող էին դիմել բիզնեսին, ու ամեն ինչ այլ կերպ կկազմակերպվեր:

«Գնացեք օդանավակայան, տեսեք, թե փետրվարից ինչ է կատարվում: Հայտարարել են ստերիլ զոնա, ու ստերիլ զոնայի աջ ու ձախ կողմերում հազարից ավելի մարդիկ, իրար գլխի հավաքված, կանգնած են: Այդպիսի վայրերում վարակը չի՞ տարածվում: Էլ չեմ խոսում հասարակական տրանսպորտի մասին: Մինչդեռ հասարակական սննդի ոլորտն այն ոլորտն է, որտեղ մարդիկ իրարից բավականին հեռավորության վրա են նստած, կուտակումներ չկան ու սանիտարահիգիենիկ նորմերը պահպանվում են, ինչը նախ հենց մեր բիզնես շահերից է բխում»,-ասաց մեր զրուցակիցը: Նրա խոսքով՝ խնդիրն ավելի գլոբալ ենթատեքստ ունի: «Առողջապահության համաշխարհային կազմակերպության դաշտում է խնդիրը, որն առանց հաշվի առնելու առողջապահական խնդիրները՝ ամբողջությամբ քաղաքականացրել է այս թեման ու շարունակում է ուղիղ կառավարել ազգային առողջապահական հիմնարկները: Մեր առողջապահական հիմնարկը ևս ԱՀԿ-ի ուղիղ ենթակայության տակ է: Այնտեղից ինչ հրահանգ ուղարկեն, այստեղ ոչ թե ի գիտություն, այլ ի կատարում են ընդունում: Այս մարդիկ այս հրահանգները կատարելով՝ պարզ չէ, թե ի՞նչ օրակարգ են առաջ բերում»,-ասաց նա:

Աշոտ Բարսեղյանը Մոսկվայի օրինակը բերեց. «Մոսկվայի քաղաքապետը նախօրեին հայտարարել է, որ քաղաքային իշխանությունները թույլ չեն տա, որ համաճարակի պատճառով քաղաքը կանգնի: Ու չնայած մեզ մոտ ստեղծված հուժկու պատկերին, հիվանդությունը կարելի է առողջապահական մեթոդներով կառավարել: Երբ իրենք փորձում են ոչ թե առողջապահական մեթոդներով, այլ տնտեսական սահմանափակումների ու սանկցիաների միջոցով կառավարել, ապա այդ ճանապարհն իրենց ոչ մի տեղ չի տանելու: Դա «տուպիկ» է, իրենք չեն կարողանալու վերահսկել ռեստորանային, հյուրընկալության ոլորտները: Ու վերջապես հարց է, թե ո՞ւմ դեմ են աշխատում: Ռեստորանային ոլորտի՞, որն ուղիղ կապ ունի տուրիզմի հետ: Այն գերակա ճյուղ է, ու մեր բյուջեի մի զգալի մասը կախված է տուրիստական հոսքերից: Իսկ առողջապահության տարբեր մասնագետների կողմից առողջապահության մասին մտածելու պաթոսային տեքստերը ոչ մի վստահություն չեն ներշնչում մեր՝ բիզնեսի ներկայացուցիչներիս մոտ»:

Ոլորտի ներկայացուցիչն ընդգծեց, որ այս առումով մեկ այլ հարց էլ է առաջանում. «Տոտալ աղքատության տանենք երկիրը, բայց ասենք, որ դա ինչ-որ առողջական խնդի՞ր է լուծում: Այս ամենի մեջ տրամաբանական կապ չկա: Բացի այդ, առողջապահական խնդիրներով ու հարցերով պետք է զբաղվեն համապատասխան որակավորում ունեցող անձինք, ոլորտը հենց նրանք պետք է ղեկավարեն, ինչը մեզ մոտ բացակայում է»:

Աշոտ Բարսեղյանը նշեց, որ չեն պատրաստվում որևէ առաջարկ ներկայացնել նախագիծը մշակողներին. «Ե՞րբ են լսել: Հակածխախոտային օրենքի նախագծի պարագայում փոխնախարար հանդիսացող Լենա Նանուշյանը եկել ու ԱԺ ամբիոնից մատ էր թափ տալիս պատգամավորների վրա ու ասում՝ այս օրենքը պիտի ընդունեք: Խնդիրն այն է, որ խախտված է յուրաքանչյուր մեխանիզմ, կարևոր չէ, թե ինչ է ասված, ինչ է գրված նախագծում, բայց իրենք «զոռբայությամբ» անցկացրեցին մի օրենք, որն ուղիղ հարվածում է նաև մեր պետական բյուջեին: Մեծ հաշվով, մեր պաշտոնյաները նույնիսկ չեն էլ փորձում տեղայնացնել որևէ նախաձեռնություն: Հրահանգը ստանում են և իրականացնում»:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում