Փաստաթղթերում առկա տառասխալներ ու անճշտություններ, կորսված փաստաթղթեր. ի՞նչ անել. «Փաստ»

«Փաստ» օրաթերթը գրում է

«-Ես ծննդյան վկայական չունեմ: -Ինչպե՞ս թե չունեք: -Այո, ես ունեմ միայն անձնագիր: Հարգելիս, դա անհնար է, անձնագիրը տրվում է ծննդյան վկայականի հիման վրա: -Տես, է, ինձ կհամոզի, որ ես սուտ եմ խոսում ու ծննդյան վկայականս իրեն ցույց չեմ տալիս»:

«-Մենք չորս քույր ենք, ծնված նույն հորից ու մորից: -Ես ձեզ հավատում եմ, բայց տեսեք՝ ձեր ծննդյան վկայականներում ձեր ծնողների ազգանունները տարբեր են: Մի դեպքում ձեր մայրիկի ազգանունը նույնն է, ինչ ձեր հայրիկինը, մյուս դեպքում՝ տարբեր: Նման փաստաթղթերով ես չեմ կարող սկսել ձեր ժառանգության ստացման գործը»:

Սրանք ֆիլմից կադրեր չեն, երկուսն էլ իրական պատմություններ են: Առաջինը լսել եմ նոտարական գրասենյակներից մեկում: Տղամարդը եկել էր ժառանգության ստացման հետ կապված գործարք կատարելու, փաստաթղթերը լրացնելու համար քարտուղարին անհրաժեշտ էր վերջինիս ծննդյան վկայականը, իսկ նա պնդում էր, որ նման փաստաթուղթ չունի:

Երկրորդը պատահել է անձնապես մեր ընտանիքի հետ, երբ մայրիկիս և իր քույրերի ծննդյան վկայականներում նրանց ծնողների ազգանունները տարբեր էին, և ստիպված էինք «երկար ճանապարհ անցնել»՝ մինչև ապացուցեցինք, որ խոսքը նույն մարդկանց մասին է, ուղղակի այն տարիներին ՔԿԱԳ-ներում, չգիտես ինչու, մի երեխայի դեպքում կնոջ ազգանվան տողում գրել են նրա հայրական ազգանունը, մյուս երեխայի ծննդյան վկայականում կինը կրում է ամուսնու ազգանունը: Իրականում քիչ չեն դեպքերը, երբ քաղաքացիներն ամենատարբեր փաստաթղթեր չունենալու կամ էլ դրանցում առկա տարաբնույթ, երբեմն մեր աչքին փոքրիկ թվացող սխալների պատճառով ստիպված են լինում տարբեր գերատեսչությունների դիմել, որպեսզի կարողանան իրենց անշարժ կամ շարժական գույքի հետ կապված ամենատարբեր գործարքներ կատարել:

Փաստաբան Լիլիթ Թարջիմանյանի հետ խոսել ենք այս թեմայի մասին՝ փորձելով տալ մի շարք հարցերի պատասխաններ:

-Տիկին Թարջիմանյան, ժառանգության ընդունման ժամանակ առաջ են գալիս խնդիրներ՝ կապված փաստաթղթերի հետ: Ի՞նչ հիմնական խնդիրներ են հանդիպում պրակտիկայում՝ փաստաթղթերի ոչ ճշգրիտ լինել, մաշվածություն, տառասխալներ:

-Այո, մեր իրականության մեջ, ցավոք, շատ տարածված են խնդիրները մարդու անվան, ազգանվան ոչ ճիշտ գրառումների հետ, օրինակ՝ տառասխալների կամ լրացված տվյալի՝ մեկ այլ փաստաթղթի հետ անհամապատասխանության, որոնք, ըստ էության, խանգարում են ժառանգության ընդունման գործընթացին, քանի որ դրանցից կախված են անձանց ազգակցական կապի, փաստաթուղթը անձին պատկանելու կամ այնպիսի հարցեր, որոնք կարող են առաջ գալ ժառանգության ընդունման գործընթացում:

-Պետական ո՞ր մարմիններն են իրավասու փաստաթղթերի հետ կապված ճշգրտումներ անելու:

-Ճշգրտում կատարում է տվյալ փաստաթուղթը տրամադրող մարմինը:

-Պետական մարմինների միջև գործո՞ւմ է էլեկտրոնային հարցումներ կատարելու մեխանիզմը: Օրինակ՝ ինչ-որ փաստաթղթի հետ կապված խնդիր է առաջանում, և նոտարն է դիմում ՔԿԱԳ-ին ճշգրտման համար, և ոչ թե քաղաքացին է ընկնում դռնեդուռ:

- Պրակտիկայում ընդունված է հարցումները փոստով կամ քաղաքացու միջոցով հասցեագրելու ընթացակարգը կամ, ինչու ոչ, մենք՝ փաստաբաններս ենք կազմակերպում այս գործընթացը՝ մեր վստահորդներին հնարավոր անհարմարություններից զերծ պահելու նպատակով:

-Եթե ինչ-որ փաստաթղթեր այդպես էլ հնարավոր չի լինում գտնել արխիվներում, օրինակ՝ անձի ծննդյան վկայական, մահվան վկայական և այլն, ի՞նչ պետք է անեն նրա ժառանգներն այդ դեպքում, ինչպե՞ս ապացուցեն, որ իրենց հարազատն, օրինակ՝ իրականում մահացել է, բայց ամենատարբեր պատճառներով «իրենց ձեռքում» այդ պահին որևէ փաստաթուղթ չկա:

-Եթե փոփոխություններ կատարելու հիմքերը բավարար չեն կամ ընդհանրապես հնարավոր չէ գտնել այդ փաստաթուղթը, գործում է այդ փաստի, օրինակ՝ ծննդյան, մահվան, ազգակցական կապի, փաստաթղթի պատկանելության դատական կարգով հաստատման ինստիտուտը: Բայց պետք է նշեմ, որ այս տարբերակին հնարավոր է դիմել բացառապես այն դեպքում, երբ առկա է պատշաճ փաստաթուղթը ստանալու կամ կորցրած փաստաթուղթը վերականգնելու անհնարինության վերաբերյալ համապատասխան մարմնի եզրակացությունը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում