«Էլ ի՞նչ պետք է անեն, որ մեր հասարակությունը համոզվի` սրանք ապաշնորհ, ապազգային ու ոչ պետականամետ են»․ «Փաստ»

«Փաստ» օրաթերթը գրում է

Մեր երկրում օրհասական վիճակ է: Ունենք թե՛ բարոյահոգեբանական, թե՛ տնտեսական, թե՛ նաև անվտանգային խնդիրներ: Այն համակարգերը, որոնք անհրաժեշտ են առողջ երկիր ունենալու համար, խախտված են: «Փաստի» հետ զրույցում տեսակետ հայտնեց «Մեր տունը Հայաստանն է» դաշինքի պատգամավորի թեկնածու Հակոբ Հակոբյանը:

«Ինչ վերաբերում է ընտրություններին, ապա, հաշվի առնելով գործող իշխանության, մեղմ ասած, իրենց գիծը տանելու համառությունը, երևի ընտրություններին այլընտրանք չունենք: Անպայման պետք է պայքարել այսօրվա ապաշնորհ կառավարությունից ազատվելու համար: Այս իշխանությունը երկիրը խոր անդունդի եզրին է հասցրել: Ժողովրդական խոսքով ասած՝ փոսի մեջ են գցել, բայց քարը դեռ չեն դրել: Եթե իրավիճակը մի քիչ էլ այսպես երկարի, քարն էլ կդնեն, ինչի հետևանքով մենք կկորցնենք մեր պետականությունը, նաև հավատը: Հիմա այն պահն է, երբ պետք է ուժ ու եռանդ ունենանք ու թույլ չտանք այդ քարը դնեն: Միգուցե դժվարությամբ, միգուցե դանդաղ, բայց մագլցելով այդ փոսից պետք է դուրս գանք»,-ասաց Հ. Հակոբյանը:

Նրա խոսքով, եթե այս իշխանությունը վերարտադրվի, շարունակելու է ավելի մեծ ոգևորությամբ երկիրը կործանման տանել :«Այդ դեպքում մեծ արտագաղթ կլինի՝ մեր ժողովրդի լուրջ ու գիտակից հատվածը իշխանության վերարտադրման դեպքում չի համաձայնի ապրել Հայաստանում: Այս իշխանության գործողությունները ազգայինի ոչնչացմանն են տանում: Սա վկայում են այն բոլոր գործողությունները, որոնք անում են մեր կրթական համակարգի, նաև մեր արժեքների հետ: Այլ ճանապարհ չկա. նրանց վերարտադրումը չպետք է թույլ տալ: Վերարտադրման դեպքում մեզ ավելի մեծ աղետներ են սպասվում: Մենք վերջերս եղանք Վարդենիսում: Ես իմ աչքերով եմ տեսել այն, ինչ հիմա կասեմ: Գյուղացին անզեն աչքով տեսնում է թուրքի զինվորին: Հրազենի կրակոցի համար հասանելի տարածքում մեր գյուղացին այսօր ստիպված է կարտոֆիլ ցանել: Այս տեսարանը հոգեպես կոտրում է, տանջում է: Պատկերացրեք մեր գյուղացիների վիճակը, որոնք ոչ թե մեր նման ուղղակի տեսնում են այդ իրավիճակը, այլ մշտապես են այդ սպառնալիքի տակ: Համայնքի ղեկավարներից մեկն ասաց՝ 15 տոննա կարտոֆիլի սերմ է մնացել: Մեկ շաբաթ առաջվա դրությամբ դեռ չէին ցանել, որովհետև չգիտեն՝ այդ բերքը իրե՞նք կհավաքեն, թե՞ ոչ: Շատ ցավալի է սա: Ես չեմ պատկերացնում՝ էլ ի՞նչ պետք է անեն այս իշխանությունները, որ մեր հասարակությունը համոզվի, որ սրանք ապաշնորհ, ապազգային ու ոչ պետականամետ են»,-ընդգծեց մեր զրուցակիցը:

Միևնույն ժամանակ Հ. Հակոբյանը նշեց, որ հասարակության մեջ մոլորված, խաբված շերտեր կան, որոնց հետ պետք է խոսել, բացատրել իրողությունը: «Հասկանալի է, քաղաքական ուժերն ունեն իրենց ծրագրերը, յուրաքանչյուրն ուզում է հասնել դրանց, բայց այդ ամենին հասնելուն զուգահեռ պետք է բացատրել ժողովրդին այս փորձանքի բնույթը, այն փորձանքի, որն այսօր պատել է մեր երկիրը: Ես շրջաններում, տարբեր տեղերում մարդկանց հետ զրուցելիս ասում եմ՝ անպայման չէ մեզ ընտրելը, ընտրեք նրան,այն ուժին, որը ձեր սրտին հարազատ է, ում ծրագրերը ձեր մտածելակերպին մոտ են, բայց հասկացեք, որ պետք է ընտրեք մտածելով ու վերլուծելով իրավիճակը, մասնավորապես՝ ինչի միջով անցանք նախորդ 30 տարիներին և ինչի միջով՝ վերջին 3 տարիներին»,-ասաց նա:

Մեր զրուցակցի դիտարկմամբ, կարևոր է վերահսկել նախընտրական շրջանը, այնպես անել, որ իշխանությունները վարչական ռեսուրս օգտագործելու քիչ հնարավորություն ունենան:«Իսկ ընտրություններից հետո պետք է ցած դնել միջկուսակցական ամբիցիաներն ու ստեղծել արհեստավարժ, գրագետ, խիստ մասնագիտացված կառավարություն: Լուրջ մենեջերներ պետք է լինեն իշխանության մեջ: Մեզ համար առաջնահերթ են բոլոր ոլորտները. եթե ամբողջ շղթայի միջից մի օղակը դուրս է գալիս, ամեն ինչ քանդվում է: Այսինքն, եթե չունենանք գյուղատնտեսություն, չենք ունենալու նաև անվտանգություն, չունենք անվտանգություն՝ չենք ունենալու տնտեսական աճ, ֆինանսական համակարգի կարգավորում:

Մեր փոքր և շատ ու շատ բնական ռեսուրսներից զրկված երկիրը պետք է նաև արժանապատիվ պայմանագրային հարաբերություններ ունենա մեր ռազմավարական գործընկերոջ հետ: Մեր ապագա կառավարությունը պետք է օրը 24 ժամ աշխատի, որ մենք այս անդունդից դուրս գանք, թեպետ անգամ այդ դեպքում հնարավոր չի լինելու կախարդական ֆիլմի պես փոսից միանգամից թռչելով դուրս գալ: Փոսից մենք մագլցելով, ձեռքերն արնոտելով և դժվարությամբ ենք դուրս գալու: Ամենակարևորն այն է, որ ապագա իշխանությունը ժողովրդին համոզի, որ իր ծրագրերն ու ձգտումները ճշմարիտ են: Մեր ժողովուրդը այնպիսի ծանր ժամանակներ է անցկացրել: Այդ դեպքում ևս համբերությամբ կսպասի»:

Աննա Բադալյան

Մանրամասները՝ «Փաստ» օրաթերթի այսօրվա համարում