«Անհիմք տարածքում տուն չի կարող կառուցվել. տապալված իշխանությունը պետք է հեռանա»․ «Փաստ»

«Փաստ» օրաթերթը գրում է

Երկրի կառավարումը տապալած, ինչպես նաև պատերազմը պարտված երկրի իշխանությունը պարտադիր հրաժարական է տալիս: Չկա որևէ երկիր, որևէ նախադեպ, որտեղ տապալված իշխանությունը շարունակում է ոչ միայն երկիր ղեկավարել, այլ այն դեպի անդունդը տանել: Սա նոնսենս է: «Փաստի» հետ զրույցում նման կարծիք հայտնեց հանրային կառավարման փորձագետ Սիրանուշ Սերոբյանը: «Երկրի ղեկավարումը բոլոր մակարդակներում տապալված է. չակերտավոր իշխանություն կոչվածն անգամ գերիների հարցը չի կարողանում լուծել, պատշաճ կերպով չի կարողանում պատասխանել նաև անհետ կորածների ծնողներին: Անգամ չարվեցին այն տարրական քայլերը, որոնք այս ընթացքում արդեն պետք է արված լինեին:

Մենք տեսանք մի իշխանություն, որը ոչինչ չարեց իր քաղաքացիների ու զինվորների կյանքը պաշտպանելու համար: Որևէ քայլ չձեռնարկվեց պատերազմից քիչ թվով մարդկային ու տարածքային կորուստներով դուրս գալու համար: Հաշվի առնելով ու ամբողջության մեջ դիտարկելով թե՛ ստորագրված փաստաթուղթը, թե՛ իրականացրած գործողությունները՝ այս իշխանությունը տապալել է կառավարումը բոլոր իմաստներով: Այս իշխանությունն իրավունք չունի խոսել ժողովրդի անունից, շարունակել պաշտոնավարումն ու անգամ այցելել Եռաբլուր: Իշխանություն, որը մեր Շուշին ադրբեջանցիներով բնակեցված տարածք, դժգույն ու դժբախտ քաղաք է անվանում, գրչի մի հարվածով հանձնում է Արցախը, և շատ այլ տարածքներ ևս նման վտանգի տակ են»,-ընդգծեց Ս. Սերոբյանը: Նրա դիտարկմամբ, այսօր ձախողված կառավարում ենք տեսնում:

«ՀՀ կառավարման մոդելը ձախողված ու լճացած է, որովհետև մենք այսօր առաջընթացի մոտիվացիա չունենք: Ներկայիս իշխանության հետ չկա նաև ապագայի կառուցման որևէ եզր: Հիմա ժողովրդի աչքին թոզ փչելու համար որոշակի կադրային փոփոխություններ են արվում: Պետական ապարատում յուրաքանչյուր ոլորտ տապալած, թուլացրած ու նսեմացրած կադրերին տեղափոխում են այլ համակարգեր: Այդ կադրային փոփոխությունները ամենևին լրջագույն բարեփոխումներ չեն ենթադրում: Գումարելիների տեղերը փոխելիս՝ գումարը երբեք չի փոխվում: Համակարգը ձախողած կադրին ոչ թե այլ պաշտոնի պետք է նշանակել ու այլ լիազորություններ տալ, այլ պետք է դուրս մղել կառավարման համակարգից:

Այլ բան է, որ Նիկոլ Փաշինյանի թիմը համալրված է ոչ կոմպետենտ ու անգրագետ կադրերով, և այդ պարագայում մի կադրի փոփոխությունը մեկ այլ կադրով բովանդակային առումով ոչինչ չի փոխում: Ընդամենը ձևական առումով մի կադրին տեղափոխում են այլ համակարգ, ինչն իմաստազուրկ գործընթաց է: Իրական փոփոխություններ իրականացնելու համար ներկայիս իշխանությունն իր մանկլավիկներով, իր պետական աշխատողներով, պարգևավճար ստացողներով պետք է լքի իշխանությունը: Բացի այդ, այս իշխանությունը պետք է պատասխանատվություն կրի այս ընթացքում երկիրը տապալելու, կառավարման ոլորտում իրականացրած ոչ պետականամետ ծրագրերի համար: Նրանց փոխարինելու պետք է գան ավելի կոմպետենտ ու գրագետ կադրեր:

Իրականում որևէ բառ չի կարող նկարագրել ներկայիս իշխանության կադրերին ու իրենց քաղաքականությունը»,-ընդգծեց նա: Ս. Սերոբյանի խոսքով, իրական բարեփոխումների համար առաջին հերթին քաղաքական կամք է պետք: «Այս իշխանության կառավարման 3 տարին է լրանում: Բացի խոսքերի կույտից ու երևակայական «100 փաստերի» արձանագրումից, այս ընթացքում որևէ քաղաքական կամք չենք տեսել: Մեր երկրում կառավարման փոփոխություններ չենք տեսել թե՛ բովանդակային, թե՛ նաև գործառույթների առումով: Կադրերը փոխվում են, բայց արդյունք չեն տալիս: Ընդհանրապես, կառավարման համակարգի արդյունավետության ու դրա ֆիքսման համար կառավարման համակարգը պետք է թափանցիկ լինի, պահպանվի օրինականության սկզբունքը, օրենսդիր, գործադի, դատական մարմինների մեջ գործի հակակշիռների ու ճնշումների քաղաքականությունը:

Ընդհանրապես, մեկ անձի շուրջ չպետք է կառավարման համակարգ ձևավորվի: Այսօր ամեն ինչ ձևավորվել է մեկ անձի շուրջ: Մենք տեսնում ենք, որ այդ անձի անգամ սխալներն իր խմբակցությունը որպես դրական երևույթ է որակում ու ամեն ինչ բարդում է նախկինների վրա»,-ընդգծեց մեր զրուցակիցը՝ շեշտելով, որ իրականում պետք է առաջ շարժվել և բարեփոխումների իրականացման հիմք դնել: «Բայց այսօրվա իշխանությունները նման որևէ քայլ չեն իրականացնում: Պետք է հաշվի առնել, որ բարեփոխումներ է իրականացնում այն իշխանությունը, որն ունի լեգիտիմության աստիճան, իսկ այսօր տվյալ իշխանական ուժի թե՛ լեգիտիմության, թե՛ ընդունվածության աստիճանը շատ տարբեր հարցումներով տատանվում է 10-19 տոկոսի շրջանակներում: Ցածր է նաև վստահության աստիճանը:

Հետևաբար, նման իշխանությունն ի զորու չէ փոփոխություններ իրականացնել: Այս իշխանությունը երեք տարվա ընթացքում տապալեց բոլոր ոլորտները, և որևէ փոփոխություն իրականացնելու իրավունք չունի: Մեծ հաշվով, նրանց «բարեփոխումների» արդյունքն արդեն տեսել ենք: Այս ամենն ամբողջացնելով՝ մեկ եզրահանգում կարող ենք անել. երկիրը տապալած իշխանությունը չի կարող երկիրը բարեփոխումների տանել: Անհիմք տարածքում չի կարող տուն կառուցվել: Կառավարման ոլորտում այդ հիմքը իրագործող մարմինն է, որն այսօր մեզ մոտ բացակայում է: Այլընտրանք չկա՝ տապալված իշխանությունը պետք է հեռանա»,-եզրափակեց Ս. Սերոբյանը։

Աննա Բադալյան

Մանրամասները՝ «Փաստ» օրաթերթի այսօրվա համարում