«Ուրախ եմ, որ թագն ինձ մոտ է, բայց չէի ցանկանա՝ այս գնով». «Միսս աշխարհ Արմենիա 2019» Լիանա Ոսկերչյանը՝ բիզնես սկսելու և մոդելինգով չզբաղվելու մասին

LIFE 22 January, 2021 17:29

«Միսս աշխարհ Արմենիա 2019» Լիանա Ոսկերչյանը հիմա մոդելինգով չի զբաղվում: Tert.am Life-ի հետ զրույցում նա պատմել է մոդելինգով չզբաղվելու պատճառների, ներկայիս զբաղվածության և սեփական բիզնես հիմնելու մասին:

Լիանայի խոսքով՝ բացի այն, որ մոդելինգի ոլորտը հիմա պասիվ է, ինքն իր ուղղությունն է փոխել: «Մոդելինգն ի սկզբանե ինձ համար հոբբի է եղել, ես ապագա քաղաքագետ եմ, ստանում եմ բարձրագույն կրթություն: Հնարավոր է՝ կոպիտ հնչի, բայց ես երբևէ մոդելինգով շատ հետաքրքրված չեմ եղել: Ինչին ցանկանում էի հասնել այս ոլորտում, արդեն հասել եմ: Ամբողջ աշխարհում ընդունված է, որ գեղեցկուհիների և մոդելների միջև մեծ տարբերություն կա: Մոդելը ցույց է տալիս հագուստը, Գեղեցկուհին՝ իրեն: Գեղեցկության մրցույթներն այնքան էլ կապ չունեն մոդելային բիզնեսի հետ: Իհարկե, եթե աղջիկը ցանկություն ունի, շարունակում է իր գործունեությունն այդ ասպարեզում: Կարծում եմ՝ Գեղեցկուհիների նպատակն ամբողջ աշխարհին ժպիտներ պարգևելն է»,- ասաց նա:

Ըստ Գեղեցկուհու տիտղոսակրի՝ հիմա լրիվ այլ ոլորտում է, որը, կարծում է, իր տիտղոսի շարունակությունն է: «Գաղտնիք չէ, որ Գեղեցկուհու տիտղոսը նվաճելուց հետո ես բարձրաձայնեցի իմ վիտիլինգոյի մասին՝ փորձելով ապացուցել, որ ինչ-որ բանով տարբերվելը քեզ թերի չի դարձնում: Խոսեցի այդ մասին թե՛ Հայաստանում, թե՛ աշխարհում: Ինքս անցել եմ այդ հոգեբանական խնդիրների միջով, դրա համար մինչև օրս խոսում եմ վիտիլինգոյի մասին: Ինձ շատ նամակներ են գրում, որ վիտիլինգո ունեցող երեխաներին իմ տեսանյութերն են ցույց տալիս ոգեշնչելու համար: Վիտիլինգոն օգնեց, որ գտնեմ կյանքիս ուղին ու իմ տիտղոսը մինչև հիմա օգտագործում եմ ճիշտ ձևով» ,- նշեց նա

Լիանան նաև ասաց, որ ընկերների հետ բիզնես է հիմնել: «Որոշեցինք մեր բիզնեսն ունենալ, որը կապված է տան դեկորի պարագաների հետ: Ճիշտ է, նախորդ տարին ծանր էր, բայց ուժ տվեց ու փաստեց, որ պետք է հզորացնենք մեր երկիրը, ստեղծենք բիզնես, նոր աշխատատեղեր: Ուզում եմ, որ այն դառնա ոչ միայն իմ եկամտի աղբյուրը, այլև ծառայի բարեգործական նպատակով: Ուզում եմ օգնել բոլոր այն մարդկանց, ովքեր ինչ-որ բանով տարբերվում են մյուսներից և առաջին հերթին խոսքը վիտլինգո ունեցող մարդկանց մասին է» ,- պատմեց նա:

Ավելի վաղ Լիանան Tert.am Life-ի հետ զրույցում ասել էր, որ լսողական խնդիրներ ունեցող երեխաների մասնագիտական կրթություն ստանալու համար նախատեսված քոլեջ է ցանկանում բացել: Հետաքրքրվեցինք՝ գործընթացն ի՞նչ փուլում է: «Ես հասկանում եմ, թե քոլեջը որքան կարևոր է, եթե նույնիսկ այս կամ մյուս տարի ֆիզիկապես և ֆինանսապես չհասցնեմ կառուցել այն, մի օր ամեն գնով կհասնեմ դրան: Սրտանց գիտեմ, թե այդ երեխաները որքան տաղանդավոր են ու որքան բանից են զրկված» ,- ընդգծեց Լիանան:

«Միսս աշխարհ Արմենիա 2019»-ի թագը Լիանան դեռ չի փոխանցել հաջորդ Գեղեցկուհուն, քանի որ պարզ չէ, թե հաջորդ մրցույթը երբ կլինի: «Ուրախ եմ, որ թագն ինձ մոտ է, բայց չէի ցանկանա՝ այս գնով լիներ: Կարծում եմ, որ կարևոր չէ՝ թագն ինձ մոտ է, թե ոչ: Թագով, թե առանց թագի ես այդ տիտղոսն արդեն ունեմ: Հնարավոր է՝ թագն ամբողջ կյանքում ինձ մոտ լինի, բայց ժողովրդի կողմից ընդունված Գեղեցկուհի չլինեմ և հակառակը՝ ընդամենը մեկ տարի մնա, բայց ժողովուրդը սիրի ու ընդունի ինձ, ինչպես մեր մի քանի Գեղեցկուհիների դեպքում է եղել» ,- եզրափակեց նա: