Life.panorama.am-ը գրում է.
«Երեք կյանք» եւ «Անցյալի ստվերները» հեռուստասերիալներից հայտնի դերասանուհի Սոնա Վարդանյանը, ով այժմ նկարահանվում է «ATV»-ով հեռարձակվող «Վերջին հայրիկը» ֆիլմում, Life.panorama.am-ին պատմել է առաջիկա ծրագրերի եւ այս ոլորտի համար իր ամենամեծ երազանքի մասին:
«Շատ կարճ ժամանակ է, ինչ ընդգրկվել եմ «Վերջին հայրիկը» հեռուստասերիալի անձնակազմում: Աշխատում եմ շատ սիրով, եւ թեպետ դերս այստեղ մեծ չէ եւ դեռ պետք է զարգացումներ ունենա, միեւնույն է, աշխատում եմ մեծ պատասխանատվությամբ, քանի որ շատ լուրջ եմ վերաբերվում այս աշխատանքին,-պատմեց դերասանուհին ու հավելեց,- այստեղ հիանալի մթնոլորտ է տիրում, ինձ համար շատ կարեւոր է այն կոլեկտիվը, որտեղ գործում եմ, եթե ինձ համար լավ ու հարմար մթնոլորտ չլինի, առաջինը ես կասեմ հաջողություն»:
Այս շրջանում Սոնա Վարդանյանին կարելի է տեսնել նաեւ «Օսկար» ներկայացման մեջ. «Հիմա Ուսանողական թատրոնում խաղում եմ նաեւ Վարդգես Բարսեղյանի «Օսկար» կատագերկական ներկայացման մեջ: Այս ներկայացման պրեմիերան կայացել է ամռանը, դեկտեմեբրի 20-ից հետո այն կրկին կխաղանք՝ փորձելով մինչ Ամանորը գոնե երեք օր ներկայանալ մեր հանդիսատեսին»:
Սոնան փորձում է այս ոլորտում փոքրիկ քայլերի արվեստով առաջ շարժվել. «Հուսամ՝ այն պատկերացումները, որ ունեմ այս մասնագիտության նկատմամբ, կիրականանան. հույսերս մեծ են, եռանդն էլ միշտ կա: Մի բան հաստատ է՝ սա իմն է, ես ինձ այլ ոլորտում չեմ պատկերացնում»,- նկատեց նա:
Սոնա Վարդանյանը շատ դերասանների նման տխրում է միայն մի առիթով. «Մեր երկրում մարդիկ դերասանին ընկալում են ըստ իրենց դերերի, ինչն, իհարկե, սխալ է, նաեւ վատ է, որ ռեժիսորները դերասանին բազմաժանրության մեջ չեն տեսնում, սովորաբար դերասաններին վստահում են միեւնույն ոճի դերեր, ինչ նախկինում նրանք ունեցել են»:
Դեռեւս դրական դերերով ներկայացող Սոնան չի վախենում բացասական դերեր մարմնավորելուց. «Այսքան ժամանակ հեռուստասերիալներում կերպարներս դրական են եղել, բայց շատ կցանկանամ, որ կերտեմ նաեւ բացասական դերեր, որպեսզի դերասանական բոլոր ունակություններս ցույց տամ»,- նշեց նա:
Սոնա Վարդանյանը ունի մի մեծ երազանք. «Շատ եմ երազում իմ փոքրիկ թատրոնի մասին, երազում եմ ունենալ իմ խումբը, որտեղ մի բառից կհականանք իրար: Հուսամ, իմ այս երազանքը մի օր իրականություն կդառնա. ես հավատում եմ, որ կունենամ այդ թատրոնը, այս քաղաքում իմ արվեստի բույնը, որտեղ կլինեն ներկայացումներ եւ համերգային կատարումներ»,- պատմեց դերասանաուհին:
Ի դեպ, Սոնան նաեւ երգում է. «Թե իմ ընտանիքում, թե ընկերներիս շրջապատում ինձ անընդհատ հորդորում են լրջորեն զբաղվել երգով, բայց դեռ չգիտեմ՝ ինչպես կընթանա կյանքս, եւ ի վերջո այդ ոլորտում ինձ կգտնե՞մ, թե ոչ»,- նշեց նա:
Սոնա Վարդանյանը սովորել է Նիկոլայ Ծատուրյանի արվեստանոցում եւ իր հաջողությունների մեծ մասը վերագրում է հենց նրան. «Ես չորս տարի սովորել եմ Նիկոլայ Ծատուրյանի արվեստանոցում, իրենից շատ բան եմ սովորել: Նաեւ իմ՝ դերասան դառնալու հարցում մեծ ներդրում ունի դերասանուհի Նարինե Գրիգորյանը: Ինչպես նաեւ շատ բան եմ սովորել Սերժ Մելիք-Հովսեփյանից, երբ ինստիտուտն ավարտելուց հետո աշխատեցի «Ագորա» թատերախմբում: Նշված մարդիկ ինձ եւ իրենց ուսանողներին շատ բան են սովորեցրել, ամենակարեւորը փոխանցել են ճիշտ ճաշակ, որը արվեստագետի համար առաջնային է համարվում: Ես շատ երջանիկ եմ, որ իրենց հետ թեկուզեւ ուղղակի շփվել եմ եւ հասցրել եմ շատ բան սովորել»,- նկատեց նա:
Սոնա Վարդանյանը որեւէ թատրոնի աշխատակից չէ, բայց մեզ հետ զրույցում նշեց, որ շատ կցանկանար դառնալ Հ. Մալյանի անվան կինոդերասանի թատրոնի կամ Գոյ թատրոնի դերասանուհի:
Մեզ հետ զրույցում Սոնան նշեց, որ դերասանուհի դառնալու համար շատ է պայքարել. «Ես մեր ընտանիքի միակ արվեստագետն եմ: Պետք է ասեմ, որ ընտանիքս շատ դեմ էր, որ ես ընտրեմ այս մասնագիտությունը, բայց ես կյանքում առաջին անգամ համարձակ եղա, անցա կոնֆլիկտների միջով եւ որոշեցի մինչեւ վերջ գնալ: Ամեն դեպքում, շնորհակալ եմ ընտանիքիս, որ գոնե վերջում զիջեցին եւ ինձ թույլ տվեցին գնալ երազանքիս հետեւից»,- պատմեց նա:
Դերասանուհին դեռ չի գտել իր կեսին, բայց այդ առումով եւս ունի իր հստակ որոշումը. «Հրաշքների չեմ սպասում, իդեալներ էլ չունեմ, պարզապես կցանկանամ գտնել հենց իմ մարդուն»,- նկատեց նա:
Իսկ վերջում երիտասարդ դերասանուհին նախապես շնորհավորեց բոլորի Ամանորն ու Սուրբ Ծնունդը. «Ուզում եմ բոլորին շնորհավորել առաջիկա տոների կապակցությամբ, ուզում եմ բոլորս երջանիկ լինենք եւ գիշերն էլ խաղաղ քնենք»:
