Ադրբեջանի խռովարար Նարդարանում չհայտարարված արտակարգ դրություն է գործում. 20 մարդ ձերբակալվել է

Բաքվից 25 կմ հեռավորության վրա գտնվող Նարդարան ավանում, որը համարվում է Ադրբեջանի բնակչության 61 տոկոսը կազմող շիաների ոչ պաշտոնական հոգեւոր կենտրոնը, ուժայինների կողմից դեկտեմբերի 1-ին անցկացված հատուկ գործողությունների ընթացքում 20 մարդ է ձերբակալվել:

Այս մասին, «Թուրան»-ին հայտնել է Նարդարանի ավագանու խորհրդի նախագահ Նաթիգ Քերիմովը:

Նրա խոսքով` ոստիկանական գործողության նպատակը զենքի հավաքումն է:

Նա հույս է հայտնել, որ ձերբակալվածներն ազատ կարձակվեն, քանի որ, նրանց ազգականների խոսքով, նրանցից շատերը հակաիրավական գործողութուններ չեն կատարել:

Իր հերթին, Ադրբեջանի ներքին զորքերի հրամանատար Շահին Մամեդովը AzTV-ին տված հարցազրույցում հայտարարել է, որ «հատուկ օպերատիվ միջոցառումները Նարդարանում շարունակվելու են մինչեւ ավանում հասարակական կարգի ապահովման գծով դրված խնդիրների ամբողջական կատարումը»:

Նրա խոսքով` «ավանի տարածքում խստորեն պահպանվում է անցագրային ռեժիմը»: Դրա հետ միասին Մամեդովը չի հստակեցրել հատուկ գործողության ավարտի ժամկետը: AzTV-ին ցուցադրել է Նարդարանում կրոնական բովանդակությամբ պաստառների եւ դրոշների ապամոնտաժումը եւ դրանց փոխարեն ուժայինների կողմից Ադրբեջանի պետական դրոշների տեղադրումը:

Ընդսմին, ավանում նախկինի պես էլեկտրականություն չկա, չի աշխատում հեռախոսակապը, բազմաթիվ խանութներ մնում են փակ: Ոստիկանության ուժերը բնակչությունից պահանջում է մնալ տներում:

«Փաստորեն իրագործվում են արտակարգ դրության համար բնութագրական միջոցառումներ, սակայն պաշտոնապես այդ մասին չի հայտարարվել», -հաղորդում է գործակալությունը:

Նոյեմբերի 27-ի կեսօրին նամազի ժամանակ իրավապահները ներխուժել են Նարդարանի շիական «Իմամ Հուսեին» մզկիթ, հայհոյանքներ տեղացել այնտեղ գտնվողների հասցեին, բռնություններ գործադրելով ձերբակալել Ադրբեջանի շիաների առաջնորդ Թալե Բաղըրզդեին եւ եւս 14 հավատացյալների: Ոստիկանների գործողությունները զայրացրել են Նարդարանի բնակիչներին: Նրանց եւ ոստիկանության միջեւ բախումներ են սկսվել: Փոխհրաձգությունների հետեւանքով երկու ոստիկան եւ 5 բնակիչներ սպանվել են: Հաջորդ օրերին իսլամիստների եւ ոստիկանության միջեւ բախումներ են սկսվել նաեւ այլ շր ջաններում` Գյանջայում, Լենքորանում եւ այլ քաղաքներում:

Ադրբեջանի ՆԳՆ-ն եւ գլխավոր դատախազությունը միջադեպի առնչությամբ հայտարարություն է տարածել, որում ասվում է, որ ավանի շիա առաջնորդները ծրագում են բռնությամբ փոխել սահմանադրական կարգը եւ երկրում շարիաթի նոր օրենքներ մտցնել, ինչի նպատակով նրանք ստեղծել են «Մուսուլմանական միասնություն» անվամբ շարժում, սկսել են իրենց կողմնակիցներ հավաքագրել Բաքվում եւ երկրի շրջաններում եւ մատակարարել նրանց զենքով եւ պայթուցիկ նյութերով:

«Բացի այդ խումբը Նարդարան ավանում անօրինական հավաք է անցկացրել` քննարկելով իշխանությանն անհնազանդության ակցիայի կազմակերպում եւ թռուցիկներ բաժանել բնակչությանը եւ որոշել է պետական չինովնիկների ցուցակը, որոնց դեմ ահաբեկչական գործողություներ էր նախապատրաստվում», -նշվել էր հայտարարության մեջ:

Ադրբեջանում իրադրությունը բարդանում է նրանով, որ դեկտեմբերի 2-ին շիաները, որոնք կազմում են Ադրբեջանի բնակչության 60 տոկոսից ավելին, նշում են Իմամ Հուսեյնի սուգի 40-րդ օրը:

Նարդարանի Իմամ Հուսեյնի մզկիթը գլխավոր կենտրոնն է, որտեղ Աբշերոնի բնակիչներն ավանդաբար նշում են այդ օրը: Ամեն տարի արարողությանը հավաքվում է 20-30 հազար մարդ: Այս տարի այդ սուգը համընկնում է Նարդարանում ոստիկանության հետ օրորդ տեղի ունեցած բախումներում զոհված քաղաքացիների հուղարկավորության հետ:

Ոստիկանության հետ բախումները հատուկ իմաստ են ձեռք բերում այն առումով, որ տեղացիները պատմական զուգահեռներ են անցկացնում` համեմատելով 1400 տարի առաջ Իմամ Հուսեյնի ստոր սպանությունն այսօրվա իրադարձությունների հետ: