Լացելով գնացել հարեւանին ասել եմ աղաչում եմ, ի՞նչ ունեք եփած, տանեմ երեխես ուտի, չմեռնի. Քաղաքացին օգնության կարիք ունի

Past.am

Արդեն 11 օր է 2 անչափահաս երեխաներիս հետ սոված նստած ենք, որպես մայր՝ անզորությունից չգիտեմ ինչ անեմ։ Այս մասին այսօր՝ ապրիլի 4–ին, NEWS.am-ի հետ զրույցում ասաց Երեւանի բնակչուհին, ով ինչ–ինչ պատճառներից ելնելով, չցանկացավ ներկայանալ։

«Աշխատել եմ, որպես մաքրուհի, բայց ներկա պահին չեմ աշխատում, քանի որ երիկամների լուրջ խնդիր ունեմ, անհրաժեշտ է ստենդավորում անել, այդ ցավերի պատճառով աշխատանքից զրկվեցի։ Ֆինանսապես անապահով վիճակում եմ, վարձով եմ ապրում, այսօրվա դրությամբ, որ վարձի ու լույսի գումարը չեմ կարողացել տալ, վարձատերն իմ լույսն անջատել է, հիմա էլ ասում է՝ ամբողջ գումարը տուր, թե չէ տանից էլ եմ հանելու: Մոտ 240 հազար դրամ պարտք է կուտակվել 3 ամսում։ Երեխեքս ցամաք հաց էլ չունեն ուտելու, չգիտեմ էլ ում դիմեմ, ուր դիմեմ, ում խնդրեմ, որ ինձ օգնեն այս վիճակից դուրս գամ։ 16 տարեկան աղջիկս է, 13 տարեկան՝ տղաս։ Առանց հացի, առանց լույսի, երեխեն աչքիս առաջ վատացավ, մայր եմ, ի՞նչ ձեւ ամոթ կապրեմ իմ երեխու մոտ, ի՞նչ զգացողություն կունենա մայրը, որ անզորի պես նստած, չգիտի ինչ անի»:

Նրա խոսքով՝ գրանցված աշխատող է եղել, բայց երբ տարեսկզբի առողջական խնդիրների պատճառով հաճախ է բացակայել, 2 ամիս բուլետեն են տրամադրել, սակայն մարտի 16–ից ազատվել է աշխատանքից, այդ ընթացքում հայրն է օգնել, բայց հիմա՝ տեղաշարժվելու սահմանափակումներով պայմանավորված, դա էլ չկա. «2 ամիս բուլետենով պահեցին, բայց այդ ընթացքում այն գումարը չէի ստանում, որը աշխատանքի գնալիս էի ստանում. դեղեր գնելու պատճառով չհերիքեց, ոչ պարտք կարողացա տալ, ոչ էլ հոսանքի գումարը։ Պապաս օրը 2000 դրամով բանվոր է աշխատում, այն ժամանակ գոնե, որ ավտոբուսները աշխատում էին, օրը 1000 դրամ ավտոբուսի վարորդի հետ ուղարկում էր գոնե ցամաք հաց, մակարոն առնում, յոլա էինք գնում, հիմա դրա հնարավորություն էլ չկա։ Ստիպված լացելով գնացել եմ, հարեւանից խնդրել եմ, ասել եմ աղաչում եմ, ի՞նչ ունեք եփած, մի աման տվեք, տանեմ երեխես ճաշ ուտի, գոնե չմեռնի»:

Հարցին՝ արդյոք նպաստ ստանո՞ւմ են, քաղաքացին պատասխանեց. «Ոչ։ Դիմել եմ, սակայն իմ անունով մեքենա կար գրանցված, չստացվեց, չնայած, որ ես այդ մեքենայի հետ, որեւէ կապ չունեմ»։

Քաղաքացին խնդրում է, որպեսզի բոլոր նրանք, ովքեր որեւէ կերպ կարող են աջակցություն տրամադրել այս վատ վիճակից դուրս գալու համար, կապ հաստատեն իր հետ նշված հեռախոսահամարով՝ 094109440:

Թեմայի վերաբերյալ զրուցեցինք աշխատանքի եւ սոցիալական հարցերի նախարարի մամուլի խոսնակ Սոնա Մարտիրոսյանի հետ. «Ձեր նյութի հերոսն այս պահի դրությամբ համընկնում է բոլոր չափորոշիչներին, որոնք նշված են ՀՀ կառավարության կողմից կորոնավիրուսի տնտեսական հետեւանքների չեզոքացման 4–րդ ծրագրին։ Այս ծրագիրը նախատեսված է բոլոր այն քաղաքացիների համար, ում ընտանիքներում կան մինչեւ 14 տարեկան երեխաներ եւ որոնք փաստացի գրանցված աշխատողներ են եղել առնվազն 2020 թվականի հունվարի 1–ից սկսած եւ ով աշխատանքից ազատվել է 2020 թվակաի մարտի 13–25–ն ընկած ժամանակահատվածում։ Այս խմբի բոլոր քաղաքացիներին հատկացվելու է 100 հազարական դրամ գումար ընտանիքում առկա մինչեւ 14 տարեկան յուրաքանչկուր երեխայի համար»։

Սոնա Մարտիրոսյանի խոսքով՝ եթե քաղաքացին մի քանի ծրագրի կարող է հավակնել, ապա կառավարության որոշմամբ դրանց ընտրությունը, թե որ փաթեթեից աջակցություն ստանա՝ մնում է քաղաքացուն. «Ըստ էության ձեր կողմից նշված քաղաքացին համընկնում է 4–րդ եւ 7–րդ փաթեթներին, բայց քաղաքացուն շատ ավելի ձեռնատու է, որպեսզի նա դիմի եւ աջակցություն ստանա 4–րդ փաթեթից, որի արժեքը 100 հազար դրամ է։ Ինչպես դուք ասացիք երեխաներից մեկը 13 տարեկան է, մյուսը՝ 16 տարեկան, եթե 2 երեխաների համար, որպես անչափահաս դիմի եւ ստանա աջակցություն, կստանա 52 հազար դրամ, իսկ այս փաթեթով 1 երեխայի համար կստանա 100 հազար դրամ»։

Մարտիրոսյանի խոսքով՝ այդ աջակցության համար դիմելու կարիք չունի, քանի որ իր տվյալները, որպես աշխատող եւ աշխատանքից ազատված քաղաքացի ՊԵԿ–ը կներկայացնի Սոցապ նախարարություն. «Տվյալների ամբողջականացումից եւ նույնականացումից հետո՝ հնգօրյա ժամկետում, Սոցապ նախարարությունը քաղաքացու համար գումարը կփոխանցի պատահականության սկզբուքով ընտրված բանկերից մեկը եւ գումարի փոխանցման եւ բանկի վերաբերյալ ամբողջական տեղեկատվությունը կհայտեն քաղաքացուն։ հայտնելու ենք էլեկտրոնային փոստի հասցեով կամ կոնտակտային տվյալով, որը քաղաքացին թողել է ՊԵԿ–ում»։

Նրա խոսքով՝ այս գումարը 3 ամիս շարունակ կլինի քաղաքացու հաշվեհամարին այդ ընթացքում քաղաքացին կարող է դիմել եւ պահանջ ներկայացնել, ստանալ իր գումարը։ 3 ամիս հետո, եթե քաղաքացին պահանջ ներկայացրած չլինի, նրա հաշվեհամարին նստեցված գումարը հետ կփոխանցվի ՀՀ պետական բյուջե։