«Կհաս­կա­նանք՝ իշ­խա­նու­թյու­նը որ­քա­նո՞վ է պատ­րաս­տա­կամ լսել այն, ինչ պետք է, և ոչ թե այն, ինչն իրենց է անհ­րա­ժեշտ»

Երեկ 117 կողմ ձայնով Ազգային ժողովը երկրորդ ընթերցմամբ ընդունեց «ՀՀ քրեական օրենսգրքում լրացում կատարելու մասին» և «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին» օրենքների նախագծերի փաթեթը: Այն լրամշակվել էր, ընդունվել էին նաև ընդդիմության՝ ավելի վաղ արված առաջարկները: Նշենք, որ փաթեթն արտակարգ դրության պայմանների խստացմանն է վերաբերում:

ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը «Փաստի» հետ զրույցում նշեց՝ ի սկզբանե փաթեթի շուրջ իրենց տեսլականն ունեին: «Բայց այս պարագայում խնդիրը ոչ թե սեփական մոտեցումները շարադրելը, այլ իրավիճակին օպերատիվ լուծում տալն էր: Դեռ առաջին ընթերցմամբ ընդունված վիճակով նախագիծը բավականին հում էր, խոցելի էր, շատ կասկածահարույց ու վիճելի դրույթներ էր պարունակում: Բայց, ամեն դեպքում, անցկացրեցինք այն՝ այդպիսով փորձելով օրենքի ուժ տալ ավելի կենսունակ նախագծի: 

Այնպես չէ, որ այս վիճակով նախագիծը լիարժեք բավարարում է, բայց քանի որ հրատապ էր, և հապաղումը կարող էր ավելի բացասական հետևանքներ ունենալ, դրա համար մեր խմբակցությունը որոշեց կողմ քվեարկել: Մեր երեկվա ելույթների ժամանակ էլ շեշտեցինք, որ այնպես չէ, որ նախագիծը կատարյալ է: Այն ունի թերություններ, կան բազմաթիվ հարցադրումներ , որոնք ճշգրտման կարիք ունեն՝ հետագայում իրավական որոշակիության սկզբունքը պահելու համար: Հիմա էլ որոշակի նկատառումներ ունենք, օրինակ՝ տուգանքների չափի հետ կապված: Ինչպես արդեն ասել էինք, պետությունն առաջինը շեշտը պետք է դնի կազմակերպչական միջոցառումների վրա, իսկ պատժողական քաղաքականությունը պետք է երկրորդ, երրորդ կամ միգուցե չորրորդ քայլը լինի: Բայց այս պահին խնդրին պետք էր արագ լուծում տալ: Հատկապես արտակարգ դեպքերում ժամանակ չկա մտածելու բյուրեղյա, անխոցելի ու կատարյալ օրենք ունենալու մասին»,-ասաց Գ. Պետրոսյանը՝ շեշտելով, որ նման դեպքերում երբեմն կարելի է կողմ քվեարկել՝ թեպետ կան թերություններ:

Անդրադառնալով ընդդիմության առաջարկություններին, որոնց մեծ մասն իշխանությունը հաշվի էր առել, Գևորգ Պետրոսյանը նշեց.

«Եթե մենք որևէ դիտողություն կամ առաջարկություն չանեինք, և այդ նախագիծն ընդունվեր այնպես, ինչպես առաջին ընթերցման ժամանակ էր, մենք կշարժեինք արտախորհրդարանական ուժերի ու հասարակության դժգոհությունը: Կասեին՝ անլուրջ եք վերաբերվում ձեր առաջ դրված խնդիրներին: Հիմա վա՞տ է, որ այս ամենը եղավ փոխադարձ ըմբռնման, քննարկումների, ինչ-որ տեղ նաև զիջումների մթնոլորտում»: Անդրադառնալով ընդդիմության առաջարկներն ու քննադատությունները հետագայում ևս հաշվի առնելու անհրաժեշտությանը, ինչպես նաև իշխանության՝ անսխալականության բարդույթից ձերբազատվելու արևորությանը, պատգամավորն ընդգծեց.

«Այս առումով պետք է իշխանություններին հարցնել՝ բոլոր այն դեպքերում, երբ ձեր նախաձեռնությունները հանդիպում են խելամիտ դիմադրությունների, կկարողանա՞ք, պատրա՞ստ եք ընդառաջել այդ դիմադրություններին: Իրենք պետք է որոշեն, որովհետև մենք իշխանությանը հակադրվելու հատուկ նպատակ չունենք: Ընդդիմությունը նրա համար չէ, որ իշխանությանն աննպատակ հակադրվի, ընդդիմությունը նրա համար է, որ իր պատկերացմամբ առավել նպատակահարմար, առավել կենսունակ տեսակետ, նախաձեռնություն կամ նախագիծ ներկայացնի՝ փորձելով հուշել կամ ճիշտ ուղու վրա դնել իշխանությանը: Իսկապես կցանկանայի, որ սա նախադեպ լիներ այդ առումով»:

Մեր զրուցակիցը շեշտեց՝ թեպետ այդ առումով թերահավատ է, բայց չի ցանկանում վատատես լինել. «Այնուամենայնիվ, կտեսնենք, կհասկանանք, թե իշխանությունը որքանո՞վ է պատրաստակամ նույն ոճով վարվել, այսինքն, իսկապես լսել այն, ինչ պետք է, և ոչ թե լսել այն, ինչն իրենց է անհրաժեշտ: Համենայն դեպս, հույս ունենանք, որ իշխանությունը սրանից դասեր կքաղի և իսկապես կհասկանա, որ ընդդիմությունն իրեն պետք է: Ասում էին՝ ով չի ընդունում իշխանության տեսակետը, պետական դավաճան է: Իրականում իշխանությունը իր այդ մոտեցումից պետք է վեր կանգնի: Հուսանք, որ այս վերջին դեպքը կդառնա նախադեպ, ու իշխանությունը ընդդիմության ձայնը ոչ թե պարզապես ավելորդություն կհամարի, այլ հաճույքով հաշվի կնստի այդ ձայնի հետ»:

Ամփոփելով՝ Գևորգ Պետրոսյանը նշեց՝ հույս ունի, որ ներկա իրավիճակը երկար չի շարունակվի, և ընդունված օրինագիծը երկար չի ծառայի մեր ժողովրդին:

«Իրականում փորձել ենք արձագանքել իրավիճակին: Ամեն դեպքում կարծում ենք, որ նախագիծը, համենայն դեպս, առկա վիճակով բավարարում է առաջադրվող գոնե նվազագույն պահանջներին: Տա Աստված, որ այն երկար չծառայի, քանի որ օպերատիվ անհրաժեշտությամբ պայմանավորված նախագիծ է: Իրականում ոչ ոք չի կարող խոստանալ, որ այս իրավանորմը չի փոխվելու կամ չի վերանայվելու: Օրենքներն ընդունվում են կյանքի մարտահրավերները հաղթահարելու համար: Եթե, Աստված չանի, նոր հանգամանքներ ի հայտ գան, ընդունված նախագծերը կարող են փոխվել»,-եզրափակեց մեր զրուցակիցը:

ԱՆՆԱ ԲԱԴԱԼՅԱՆ