Պատ­գա­մա­վոր­նե­րը խոս­տա­նում են հե­տա­մուտ լի­նել տու­ժած քա­ղա­քա­ցի­նե­րի իրա­վունք­նե­րի վե­րա­կանգն­մա­նը

Օրերս գրել էինք, որ Երևանի փոքր կենտրոնում գերակա հանրային շահ ճանաչված շենքերի բնակիչները պահանջում են անվավեր ճանաչել կառավարության 2007 թվականի որոշումները:

Բելյակովի փողոցի բնակիչներից Արմինե Գյուլգյուլ յանը մեզ հետ զրույցում նշել էր, որ իրենց խնդրին ծանոթ են ԱԺ փոխնախագահ Վահե Էնֆիաջյանը, ԱԺ «Իմ քայլը» խմբակցության պատգամավոր Արուսյակ Ջուլհակյանը: Երկուսն էլ խոստացել են հետևողական լինել քաղաքացիների ոտնահարված իրավունքների վերականգնման հարցում:

«Փաստը» զրուցեց պատգամավորների հետ՝ հասկանալու, թե ինչ լուծումներ են փորձելու առաջիկայում առաջարկել քաղաքացիներին:

ԱԺ փոխնախագահ, «Բարգավաճ Հայաստան» խմբակցության պատգամավոր Վահե Էնֆիաջյանը «Փաստի» հետ զրույցում նշեց, որ իր համար այս թեման շատ կարևոր է, միևնույն ժամանակ բավական բազմաշերտ:

«Իմ ցանկությունը և պատրաստակամությունը հայտնել եմ բնակիչներին օգնելու, ընդ որում, կան որոշակի օրենսդրական լուծումներ, որոնց շրջանակում պատկերացնում եմ հարցի լուծումը, սակայն չեմ ուզում շտապել:

Ցանկանում եմ նրանց հետ մանրակրկիտ քննարկել, ավելի խորն ուսումնասիրել պատճառահետևանքային շղթայական կապը, որ կառուցապատողների գրավչությանն էլ չխոչընդոտենք: Բայց միանշանակ բնակիչների հարցը գերակայում է, և ոչ մի բնակիչ չպետք է տուժած, իրավունքները խախտված դուրս գա ստեղծված իրավիճակից:

Օրինակ, Բել յակովի փողոցի խնդիրը մի փոքր այլ է: Դրան զուգահեռ գտնվում է Պուշկինի փողոցը: Սա ընկալվում է որպես մեկ տարածք, այդտեղ պատմամշակութային շենք ու շինություններ կան:

Այնտեղ եղել է Հայաստանի առաջին հանրապետության առաջին վարչապետ Հովհաննես Քաջազնունու տունը, այլ անվանի մարդիկ են ապրել:

Այնպես որ, այդ խնդիրը մի փոքր այլ է: Ծանոթացել եմ բնակիչների գրություններին, և արդեն ինքս գրություններ եմ ուղարկել թե՛ դատախազությանը, թե՛ վարչապետին և թե՛ քաղաքապետին»,- ասում է ԱԺ փոխնախագահը: Նա նաև ընդգծում է, որ Ազգային ժողովի աշնանային նստաշրջանից հետո խնդրի հետ կապված խորհրդարանում նախաձեռնելու է աշխատանքային հանդիպումներ, քննարկումներ և խորհրդակցություններ:

«Իմ քայլը» խմբակցության պատգամավոր Արուսյակ Ջուլհակյանը նշում է՝ վերը նշված խնդիրն իր ուշադրության կենտրոնում եղել է վաղուց:

«Հարցը, սակայն, խորությամբ սկսել եմ ուսումնասիրել վերջերս: Վերջին շրջանում հանդիպել եմ քաղաքացիների հետ, որոնք 2004 թվականից սկսած՝ «պետական կարիք» կոչվածի զոհն են դարձել:

Շատ բարդ իրավիճակ է, բայց, կարծում եմ, լուծելի է: Այս կոնտեքստում ուզում եմ անդրադառնալ մեր խմբակցության նախընտրական ծրագրին, որի ամենակարևոր կետերից մեկը եղել է անցումային արդարադատությունը, որը երեք հիմնական ուղղություններով պետք է իրականացնենք:

Դրանցից մեկը 2004 թվականից սկսած զանգվածային ունեզրկումների դեպքերին անդրադարձը և քաղաքացիներին արդարացի և արժանապատիվ փոխհատուցմամբ ապահովելն է: 

Պատահական չէ, որ օրերս էլ արդարադատության նախարարությունը հրապարակեց դատաիրավական բարեփոխումների ռազմավարության նախագիծը, որտեղ իր տեղն ունեն անցումային արդարադատությունը և ունեզրկումների դեպքերը:

Դրանով նախատեսվում է փաստահավաք հանձնաժողով ստեղծել, որը, այդ թվում՝ նաև ունեզրկումների դեպքերով, կլսի քաղաքացիներին, կհավաքի բոլոր փաստերը, թե կոնկրետ որ դեպքում ինչ ապօրինություններ են տեղի ունեցել, ովքեր են ներգրավված եղել դրանց մեջ, քաղաքացիներից յուրաքանչյուրն ինչ նյութական վնաս է կրել»,-«Փաստի» հետ զրույցում ասում է Ջուլհակյանը:

Նա նշում է, որ հանդիպել է Բել յակովի փողոցի և հարակից տների ու հողատարածքների սեփականատերերի փաստաբանին, մանրամասն ծանոթացել այն գործընթացներին, որոնք կատարվել են թե՛ տարածքի կառուցապատող Սամվել Մայրապետյանի կողմից, թե՛ նախկինում պետական մակարդակով իրականացված բոլոր ապօրինություններին:

«Գերակա հանրային շահը» կոչել հանրային կարիք առնվազն զավեշտալի է: Քաղաքացիների սեփականությունը խլվել է՝ կոնկրետ անձանց բիզնես շահերը սպասարկելու համար»,-եզրափակում է պատգամավորը:

ԼՈՒՍԻՆԵ ԱՌԱՔԵԼՅԱՆ