Գյումրիում կմեկնարկեն ավտոմեքենաների մաքսազերծման կենտրոնի հիմնման աշխատանքները

ECONOMICS 31 July, 2019 22:34

Ավտոմեքենաների մաքսազերծման գործընթացը Գյումրի տեղափոխելու նպատակով կառավարությունը կքննարկի «Հայաստանի Հանրապետության 2019 թվականի պետական բյուջեի մասին» ՀՀ օրենքում փոփոխություններ կատարելու մասին հարցը՝ ավելացնելով եկամուտները և ծախսերը 181 մլն դրամով: Այդ մասին որոշման նախագիծն ընդգրկված է կառավարության օգոստոսի 1-ի նիստի օրակարգում:

Ըստ հիմնավորման, վերջին ժամանակահատվածում ԵԱՏՄ անդամ չհանդիսացող երրորդ երկրներից Հայաստան տրանսպորտային միջոցների ներմուծման աննախադեպ աճի արդյունքում Նորագավիթում տեղակայված Արարատյան մաքսատուն վարչության թիվ 2 բաժիններում (Ավտոտրանսպորտային միջոցների մաքսային ձևակերպման բաժանմունքում) գոյանում են մեծ հերթեր և տրանսպորտային միջոցների կուտակումներ:

«Նշված խնդիրը եղել է ՀՀ վարչապետի անմիջական ուշադրության ներքո և ս.թ ապրիլ ամսին Արարատյան մաքսատան-վարչության ավտոտրանսպորտային միջոցների մաքսային ձևակերպումների Նորագավիթի բաժանմունք այցից հետո Վարչապետի հրահանգով իրականացվել են համապատասխան ուսումնասիրություններ նշված խնդիրները լուծելու, ինչպես նաև ավտոմեքենաների մաքսազերծման գործընթացը Գյումրի քաղաք տեղափոխելու նպատակով:

Հաշվի առնելով այն հանգամանքը, որ ՀՀ ՊԵԿ 5 տարվա ռազմավարական ծրագրով նախատեսված է նոր Արտաքին Տնտեսական Գործունեության սպասարկման ժամանակակից կենտրոնի ստեղծումը Գյումրի քաղաքում, ինչպես նաև համատեղելով այդ հանգամանքը Վարչապետի կողմից տրված հանձնարարականի հետ, ՀՀ ՊԵԿ-ի կողմից կատարվել են նախնական ուսումնասիրություններ, որի արդյունքում պարզ է դարձել, որ տվյալ ԱՏԳ սպասարկման կենտրոնի ստեղծման համար անհրաժեշտ է մոտ 20 հեկտար հողատարածք, որից 4.5 հեկտար տարածքը բավարար է ավտոտրանսպորտային միջոցների մաքսային ձևակերպման համար համապատասխան սրահների և ավտոմեքենաների կայանման հրապարակի կառուցման համար:

ՀՀ անշարժ գույքի կադաստրի կոմիտեի և Գյումրու քաղաքապետարանի հետ համատեղ աշխատանքի արդյունքում ընտրվել է ՀՀ պաշտպանության նախարարությանը պատկանող Գյումրիում գտնվող 21,5 հեկտար զբաղեցնող տարածքը, որտեղ նախատեսվում է կառուցել ԱՏԳ սպասարկման կենտրոն:

Ի կատարում ՀՀ վարչապետի հանձնարարականի, այս նույն տարածքից 4,5 հեկտար հատկացվել է ավտոտրանսպորտային միջոցների ձևակերպման գործընթացներն իրականացնելու համար, որն իրենից ներկայացնում է մաքսային մարմինների և ՀՀ ոստիկանության համատեղ սպասարկման կենտրոն: Նախնական հաշվարկներով տվյալ սպասարկման կենտրոնի, ինչպես նաև համապատասխան ենթակառուցվածքների ստեղծմանն համար անհրաժեշտ է ներգրավել շուրջ 181 մլն դրամ:

Նշված տարածքի ընտրությունը, որպես ավտոտրանսպորտային միջոցների մաքսային ձևակերպումների միասնական վայր/սպասարկման կենտրոն, կարելի է դիտել որպես ԱՏԳ սպասարկման ժամանակակից կենտրոնի ստեղծման մեկնարկ»,- ասված է հիմնավորման մեջ: