«Դուրս չենք եկել ռեկ­տո­րի դեմ, պայ­քա­րում ենք մեր իրա­վունք­նե­րի հա­մար». ՀՊՏՀ դա­սա­խոս­ներ

Հայաստանի տնտեսագիտական համալսարանի ռեկտորի ժամանակավոր պաշտոնակատարը, նրա ատենախոսությունը և համալսարանում տեղի ունեցող փոփոխությունները շարունակում են մնալ հանրության ուշադրության կենտրոնում: Մինչ ռեկտորի ժ/պ Ռուբեն Հայրապետյանը նշում է, որ համալսարանում դասախոսների մրցույթը ֆանտաստիկ արդյունքներ է գրանցում, դասախոսները դժգոհում են՝ համալսարանում մշակված գիտամանկավարժական կազմի ընտրության և տեղակալման կանոնակարգը չի համապատասխանում «Կրթության մասին» օրենքին:

Լրագրողների հետ հանդիպմանը կառավարման ամբիոնի ասիստենտ, տնտեսագիտության թեկնածու Արմեն Կարախանյանն ասում է՝ ամեն ինչ սկսվեց նրանից, երբ 2018 թվականի դեկտեմբերին Հայաստանի պետական տնտեսագիտական համալսարանում նշանակվեց ռեկտորի պաշտոնակատար: «Բնականոն հունով աշխատում էինք, կային օրենքի որոշ խախտումներ, սակայն գագաթնակետին հասավ, երբ տնտեսագիտական համալսարանում մշակվեց գիտամանկավարժական կազմի ընտրության և տեղակալման կանոնակարգ, որը ոչ մի կապ չունի գործող օրենքի հետ:

Ուզում ենք հավատալ, որ մեր բազմաթիվ ահազանգերը, հրապարակումները, հանրայնացումը տեղ չի հասել պատկան մարմիններին, դրա համար այս ամբողջ ապօրինությունները շարունակվում են:

Համոզված ենք, որ մերօրյա Հայաստանում ապօրինությունն ու անօրինականությունը տեղ չունեն, ոչ մի պաշտոնատար անձ չի կարող իրեն վեր դասել օրենքից և օրինականությունից»,- ասում է Կարախանյանը՝ մանրամասնելով, թե ինչ է իրենից ներկայացնում 2019 թվականի ապրիլին ՀՊՏՀ-ում մշակված կարգը: 

«Դրա նախագիծը՝ մինչ ընդունումը, 1-2 օր առաջ բաժանվել է ամբիոններին, ոչ ոք տեղյակ չի եղել այդ նախագծից: 1-2 օր հետո համալսարանի գիտական խորհրդում եղել է քվեարկություն, որի ժամանակ կարգը չի ընդունվել, բազմաթիվ դիտողություններ են եղել և դրա հիման վրա մեկ ամիս անց մեր համալսարանի կայքից տեղեկացել ենք, որ կարգն ընդունվել է բազմաթիվ փոփոխություններով: Երևի փորձել են այն մոտեցնել օրենքի տառին, սակայն չի ստացվել:

Նախագծում նշված էր, որ կարգը մշակվել է ՀՀ մի շարք օրենքների հիման վրա, բայց ընդունված կանոնակարգի նախաբանում չեք տեսնի այդ մեջբերումը, իսկ դրա մասին նախաբանում նշելն, ըստ օրենքի, պարտադիր է:

Կարգի հրապարակումից հետո դրա մասին բացասական կարծիք են հայտնել բուհի մի շարք առանցքային ամբիոններ: Մի քանի դասախոսներ դիմել են պատկան մարմիններին՝ մարդու իրավունքների պաշտպանի գրասենյակին, ԿԳՄՍ նախարարությանը, բաց նամակով՝ ՀՀ վարչապետին:

Արձագանք չենք ստացել: Դիմել ենք նաև դատարան: Քաղաքացիական գործերով առաջին ատյանի դատարանը մեր հայցադիմումն ընդունել է վարույթ, տվյալ կարգի վրա արգելանք է դրվել, սակայն մի քանի օր անց՝ անհասկանալի պայմաններում, նույն դատավորը հանել է տվյալ արգելանքը: Չենք ուզում կասկածի տակ առնել դատարանի օբյեկտիվությունը, դատական գործը դեռ շարունակվում է, ժամանակը ցույց կտա»,-ընդգծում է դասախոսը:

Նա մտահոգություն է հայտնում՝ համալսարանում անցկացվող մրցույթի հետևանքով 100200 հոգի զրկվելու է աշխատանքից: Բացի դա, երբ շատերը սեպտեմբերի 1-ին գնան աշխատանքային պայմանագիր կնքելու, տեղեկանալու են, որ չունեն լրիվ ծանրաբեռնվածություն: «Ժամանակին սրա մասին խոսել եմ ռեկտորի պաշտոնակատարի հետ, ասել, որ սա հակաօրինական է: Ի պատասխան՝ Հայրապետյանն ասել է՝ անում եմ, որ բողոքեք, ուզում եմ, որ գնաք, ձեր շահերը պաշտպանեք»,-հավելում է Կարախանյանը՝ ընդգծելով. «Հանկարծ չմտածեք, որ այս մրցույթից վախեցել ենք: 

Չենք ցանկացել մասնակցել այդ անօրինական ակցիային, լեգիտիմացնել այն: Ուզում եմ փարատել այն սխալ կարծիքը, որ դասախոսները դուրս են եկել ռեկտորի դեմ:

Ընդամենը պաշտպանում ենք մեր իրավունքները: Կատարվող ապօրինությունների վկայությունն է այն, որ հիմա, երբ բոլորն արձակուրդում են, համալսարանում հրավիրվել է գիտխորհրդի 2 նիստ՝ փոփոխություններ կատարելու համար այս կանոնակարգում: Գուցե փաստաբաններն են հուշել, որ օրենքի խախտումները շատ են, և այսօր մրցույթն անցկացնելուց հետո պայմաններ են փոխում, ինչն իրենց էլ ավելի է գցելու անօրինականության մեջ»,-եզրափակում է Արմեն Կարախանյանը:

Համալսարանի դասախոս, տնտեսագիտության թեկնածու Գագիկ Ասլանյանն անդրադարձավ համալսարանի ռեկտորի ժ/պ Ռուբեն Հայրապետյանի դոկտորական ատենախոսությանը, որը նա պաշտպանել է 2015 թվականին: Նա նշում է՝ փորձագետները վեր են հանել գրագողության, զեղծարարությունների և կեղծիքների վերաբերյալ բացահայտ փաստեր: «300 էջ ատենախոսությունից 60 էջը թարգմանված արտագրություններ են, մի մասը՝ ուղիղ թարգմանություններ, իսկ մյուս մասը՝ խմբագրված, որոնք առկա են աշխատանքի 7 ենթագլուխներում»,-ասում է Ասլանյանը:

Սրա առնչությամբ նրանք մի շարք հարցադրումներ են կատարում: «Ինչպե՞ս է ստացվել, որ այսքան բացահայտ խախտումների պարագայում համալսարանի մասնագիտական խորհուրդն արագացված ռեժիմով ընդունել է Հայրապետյանի աշխատանքը և թույլատրել պաշտպանության: Արդյոք ԲՈՀ-ի գաղտնի ընդդիմախոսները հայտնե՞լ են դրական կարծիք, իսկ եթե դրանք բացասական են եղել, ապա աշխատանքն ինչո՞ւ չի բեկանվել»,-ասում է Ասլանյանը:

Լրագրողներից մեկը հարց է հնչեցնում՝ այս ամենում դասախոսները տեսնո՞ւմ են նաև մեղքի իրենց բաժինը: «Այո, այս ամենի սկիզբը դրել է բուհի նախկին ղեկավարությունը, որի անօրինականությունները և՛ կոռուպցիոն ռիսկերի, և՛ կոռուպցիոն չարաշահումների առումով այսօր էլ շարունակվում են»,- եզրափակում է Գագիկ Ասլանյանը:

ԼՈՒՍԻՆԵ ԱՌԱՔԵԼՅԱՆ