«Վար­չա­պե­տը բազ­միցս խո­սել է ձեռ­քեր տա­քաց­նե­լու մա­սին, սա էլ մի ձև է»

Հայաստանում արդեն մեկնարկել է «ՀՀ տավարաբուծության 2019-2024թթ. զարգացման» ծրագիր, որի շրջանակում մարդիկ հնարավորություն կունենան ձեռք բերել բարձր մթերատու տոհմային խոշոր եղջերավոր կենդանիներ՝ 2 % տարեկան տոկոսադրույքով։ Ընդ որում՝ շահառուները տոհմային կենդանիներ կարող են ձեռք բերել ինչպես տեղի անասնաբուծական ֆերմաներից, այնպես էլ ներկրել արտերկրից։

«Հայաստանի ագրարագյուղացիական միավորում» հասարակական կազմակերպության նախագահ Հրաչ Բերբերյանը «Փաստի» հետ զրույցում նշում է, որ նման ծրագրերը նոր չեն:

«Գյուղնախարարությունը վերջին տասը տարում հազարավոր գլուխ խոշոր եղջերավոր անասուններ՝ երինջներ է ներկրել Հայաստան՝ հիմնականում Ավստրիայից և Շվեյցարիայից: Կենդանիները մեծ մասամբ հղի են եղել: Վերջին չարաբաստիկ տարում ներկրվեց Մերձբալթյան հանրապետություններից, սակայն կային որակի հետ կապված խնդիրներ: Բավական մեծ գլխաքանակ ճանապարհին սատկեց, իսկ մի մասն էլ ընդհանրապես հղի չէր: Այդ ծրագիրը կարծես ձախողում էր», - ասում է Բերբերյանը: 

Վերջինս հիշեցնում է, որ Հայաստանում անասնաբուծության հարցում պետք է գնալ այլ ճանապարհով: «Ունենք կովկասյան գորշը, որը սովոր է բնակլիմայական մեր պայմաններին: Բայց գյուղնախարարությունը համառորեն սրան դեմ է: Դե, երևի ներկրման հետ կապված լավ պայմաններ ունեն, չինովնիկները բիզնեսի մեջ են մտնում, տենդերը մեկին կտան, մյուսին չեն տա, նախկին սինդրոմն է գուցե աշխատում. ինչ-որ բան վերցնեն, բաշխեն և իրենց ձեռքերն էլ տաքացնեն: Վարչապետը բազմիցս խոսել է ձեռքեր տաքացնելու մասին, սա էլ մի ձև է»: Զրուցակիցս ասում է, որ իր համար գոնե անհասկանալի է, թե ինչու է գյուղնախարարությունը անդրադառնում ծրագրերի, որոնք հաջողություն չեն գրանցել: «Նորից խոսում են ապահովագրության մասին, որը երկու անգամ գյուղնախարարությունը ձախողել է, ներկրումների մասին, որտեղ վերահսկիչ պալատը լուրջ խախտումներ, գումարային յուրացումներ գտավ, կարծեմ՝ գործերը դեռ դատախազությունում են: Հիմա ինչպես բացատրենք, որ մի կողմից կան վերահսկիչ պալատի հայտնաբերած խախտումները, մյուս կողմից նորից նույն գործարքներն են փորձում իրականացնել: 

Գյուղացին պետք է հաշվենկատ լինի, հաշվարկի՝ արդյո՞ք խոշոր եղջերավոր անասուններն իրեն ձեռնտու են անասնապահությամբ, կաթի արտադրությամբ զբաղվելու համար»: 

ՀԿ-ի նախագահը հիշեցնում է, որ հանրապետություն ներկրվող անասնագլխաքանակը պետք է մսուրային պահվածքում լինի, իսկ արոտավայրերի մասին առհասարակ խոսք չկա:

«Եթե ֆերմերները կստեղծեն իդեալական պայմաններ, եվրոպական տեսականին Հայաստանում կենսունակ կլինի, մենք էլ կողջունենք: Պրակտիկան, ցավոք, ցույց է տալիս, որ նրանք չեն դիմանում մեր կլիմայական պայմաններին, և արդյունքում ունենում ենք կենդանիների լուրջ անկում», - ասում է Բերբերյանը՝ շեշտելով, որ իրենց միավորումն ունի հարցի պատասխանը, թե ինչպես բարձրացնել կենդանիների միջին կաթնատվությունը և իջեցնել կաթի արժեքը: Բացի դա, մասնագետի խոսքով, հետագայում խնդիրներ չեն լինի նաև կաթի և մսի մթերման հարցում: «Թող բարի լինեն, դիմեն մեզ, կօգնենք: Ինչ վերաբերում է եվրոպական երկրներից անասունների ներկրմանը, դա համարում ենք ոչ նպատակահարմար: 

Անասնապահությունը վերջին երեք տարում հասել է այն վիճակին, որ բելառուսական կասկածելի որակի մսաքանակը «վխտում է» սուպերմարկետներում:

Կարող ենք զարգացնել մերը, բայց դրա համար հմտություններ են անհրաժեշտ, որոնք, ցավոք, այսօր կառավարությունը չունի: Եթե դու հմուտ մասնագետներ չունես, պարտությունը երաշխավորված է: Խոսելով չէ, այլ՝ աշխատելով: Կրկնում են նույն սխալները, ինչ նախկինում», - ամփոփում է Հրաչ Բերբերյանը: 

ԼՈՒՍԻՆԵ ԱՌԱՔԵԼՅԱՆ