Բա­քուն հայտն­վեց իր լա­րած ծու­ղա­կում

Նիկոլ Փաշինյան-Իլհամ Ալիև հանդիպման ժամկետներն ու օրակարգը դեռևս հստակեցված չեն։ Ըստ ամենայնի, կողմերն ու միջնորդները տակավին հստակեցումների անհրաժեշտություն ունեն, սակայն հանդիպմանն ընդառաջ կարծես փոխվում է հայ-ադրբեջանական վերջին ամիսների հարաբերությունների համատեքստը։

Այսպես կոչված՝ «վերելակային» դիվանագիտությունն, ամենայն հավանականությամբ, այլևս չի գործում։ Այն բանից հետո, երբ հայկական կողմը հստակեցրեց իր դիրքորոշումը ԼՂ խնդրում, ինչն արտահայտվեց Ստեփանակերտում Նիկոլ Փաշինյանի ծրագրային ելույթով, Բաքուն առաջնագծում իրավիճակը սրելու փորձեր ձեռնարկեց։ Մարտի 13-ին արցախաադրբեջանական հակամարտ զորքերի շփման գծի արևել յան ուղղությամբ՝ Ակնայի հատվածում, ադրբեջանական զինված ուժերը խախտել են հրադադարը։ Իլհամ Ալիևն, ըստ ամենայնի, վերադարձել է ելման կետ ու որդեգրել է նույն մարտավարությունը, ինչը բնորոշ է ադրբեջանական քաղաքականությանը՝ միջնորդների այցերից կամ երկու երկրների ղեկավարների հանդիպումից առաջ առաջնագծում սրել իրավիճակը՝ Հայաստանի ու համանախագահության վրա ճշում գործադրելու նպատակով։ Պաշտոնական Երևանը, սակայն, հավատարիմ է մնում իր քաղաքականությանը՝ տուրք չտալով Բաքվի սադրանքներին։

Մյուս կողմից՝ անցած շաբաթավերջին տեղի է ունեցել մի իրադարձություն, որը նոր ինտրիգ է հաղորդում հայ-ադրբեջանական հարաբերություններին՝ հատկապես Փաշինյան-Ալիև հանդիպումից առաջ։

Շաբաթ օրվա գիշերը՝ ժամը 01։30 սահմաններում, ՀՀ հյուսիսարևել յան սահմանագոտում, N զորամասի պահպանության տեղամասում, հայ դիրքապահների կողմից հայտնաբերվել, նախազգուշացվել և նախազգուշացմանը չենթարկվելուց հետո վնասազերծվել է ՀՀ պետական սահմանը խախտած անհայտ անձ։ 

Ստորին վերջույթի հրազենային վիրավորումից հետո նրան ցուցաբերվել է առաջին բուժօգնություն, հետո տեղափոխվել է բուժհաստատություն։ Նրա կյանքին վտանգ չի սպառնում։ Նրա մոտ հայտնաբերված փաստաթղթերի համաձայն՝ անձը հանդիսանում է Ադրբեջանի Հանրապետության Ղազախի շրջանի բնակիչ, 1986թ. ծնված Էլվին Արիֆ Օղլու Հիբրագիմովը։ 

Լրագրողների հարցին, թե արդյոք հայտնաբերված անձը դիվերսանտ է, ՊՆ խոսնակ Արծրուն Հովհաննիսյանն ասել է .«Ոչինչ չեմ կարող բացառել, ցույց կտա քննությունը, գիտենք, որ քննությամբ էլ զբաղվում է ԱԱԾ-ն»: Ադրբեջանի պետական սահմանապահ ծառայությունն էլ հաստատել է, որ իր բնակիչներից մեկը մտել է ՀՀ տարածք։

Ադրբեջանը հաստատում է նաև, որ սահմանախախտը Ղազախի շրջանի գյուղերից մեկի բնակիչ Էլվին Հիբրագիմովն է։ Ադրբեջանական կողմը, սակայն, հայտարարում է, որ նա հոգեկան հիվանդ է, երկրորդ կարգի հաշմանդամ։

Հիբրագիմովը դիվերսա՞նտ է, թե՞ հոգեկան հիվանդ՝ ցույց կտա քննությունը, սակայն ուշագրավ է, որ այս միջադեպից հետո Բաքուն հայտնվել է իր իսկ լարած ծուղակում։

Փետրվարի 28-ին Գյանջայի ծանր հանցագործությունների դատարանը 20 տարվա ազատազրկման է դատապարտել անցած տարվա ամռանը Ադրբեջանում գերեվարված Կարեն Ղազարյանին: Համաձայն դատավճռի՝ Ղազարյանը պետք է պատիժը կրի խիստ ռեժիմով հաստատությունում: Ադրբեջանը պնդում է, թե 35-ամյա Կարեն Ղազարյանը հայ հետախույզ է, որին գերեվարել են դիվերսիոն ներթափանցման փորձի ժամանակ: Հայկական կողմը հայտարարում է, որ այդ պնդումն ապատեղեկատվություն է և բացարձակապես չի համապատասխանում իրականությանը, Ղազարյանը երբեք չի ծառայել հայկական զինված ուժերում, քանի որ ունի հոգեկան խնդիրներ:

Ամիսներ շարունակ Բաքուն ցուցադրական ցինիզմով անտեսում էր հայկական կողմի ու միջազգային հանրության հորդորներն ու ի վերջո՝ դատավճիռ կայացրեց մի մարդու հանդեպ, որն ակնհայտորեն ուներ առողջական խնդիրներ։ Այս համատեքստում առնվազն տարակուսելի է, որ Ալիևի իշխանությունը հումանիստական մոտեցումներ է ակնկալում հայկական կողմից, երբ նույն իրավիճակում է հայտնվել իր քաղաքացին։ Իհարկե, խորապես համոզված ենք, որ, ի տարբերություն Բաքվի, Երևանը ոչ միայն խոշտանգումների չի ենթարկի Ադրբեջանի քաղաքացուն, այլ իրական քննությամբ կպարզի նրա սահմանախախտության բուն պատճառը։

Ինչևէ, հիմա գնդակը գտնվում է Բաքվի դաշտում, ու կարծում ենք՝ առաջինը հենց Բաքուն պետք է հանդես գա Կարեն Ղազարյանին Էլվին Հիբրագիմովի հետ փոխանակելու նախաձեռնությամբ։ Համենայն դեպս, հայկական կողմն իրավական հարթության վրա չի կատարել որևէ քայլ՝ իրավիճակը փակուղային դարձնելու համար։

Ադրբեջանական քաղաքականությունը բնորոշ է ստեղծել ծուղակներ, որոնց որոգայթում, որպես կանոն, հայտնվում է հենց ինքը։

ՍՈՒՐԵՆ ՍՈՒՐԵՆՅԱՆՑ