Նորություն քարոզչության մեջ

Արմեն Հակոբյանը Ֆեյսբուքյան իր էջում գրում է.

Այսօր «Արմնյուզ» եւ «Ա1+» հեռուստաընկերությունների եթերում կմեկնարկի «Այո» եւ «ոչ» ռեալիթի շոուն: Հասկանալի է, խոսքը սահմանադրության փոփոխությունների հանրաքվեի, ներկայացված նախագծի կողմնակիցների ու հակառակորդների մոտեցումները հնարավորինս ամբողջական արտացոլելու նպատակ ունեցող հեռուստանախագծի մասին է: 
Քաղաքական տեխնոլոգ Կարեն Քոչարյանի մտահղացումը, որ համատեղ որոշել են իրագործել նշված հեռուստաընկերությունները, արդեն իսկ որոշակի հետաքրքրություն է հարուցել, եւ ոչ միայն քաղաքական շրջանակներում: Իսկապես հետաքրքիր է, թե ի՞նչ կստացվի այս ամենից: 
Ավելի ճիշտ, ըստ մտահղացածի, կհաջողվի՞ մնալ քաղաքակիրթ պայքարի ու բանավեճի շրջանակներում, առանց կռիվ-ղալմաղալի, վիրավորանքների եւ հայհոյախոսության: Այսօր եւ հաջորդող գրեթե երեք շաբաթվա ընթացքում կտեսնենք: 
Հաղորդման հեղինակ ԿԱՐԵՆ ՔՈՉԱՐՅԱՆԸ երեկվա ասուլիսում նման հույս հայտնեց՝ մասնավորապես նկատելով. «Սա այն ձեւաչափն է, որ մարդիկ կարող են մինչեւ վերջ պնդել իրենց գաղափարները, ավելին՝ տեղերում փորձել տարածել իրենց գաղափարները եւ ազգաբնակչությանը համոզել, մի մասն «այո», մյուս մասը `«ոչ», բայց միաժամանակ լինել նորմալ քաղաքական եւ մարդկային հարթության վրա: Այսինքն՝ դա չլինի ծեծ ու ջարդ, չլինեն վերջին հայհոյանքներ, չլինի անձնական թշնամանք»:
Ընդհանուր առմամբ, արդեն պարզ է, թե՝ ինչ, որտեղ, երբ եւ ովքեր: Ինչպես երեկ հայտնեցին «Արմնյուզ» հեռուստաընկերության տնօրեն Հրաչ Քեշիշյանն ու քաղտեխնոլոգ Կարեն Քոչարյանը, ինչպես «այո»-ի, այնպես էլ «ոչ»-ի քարոզչական խմբերը հստակեցված են եւ արդեն մեկնել են մեկնարկային կետեր: Ձեւավորվել է երկուական խումբ, որոնք ռեալիթի շոուի շրջանակներում մեկնարկելու են Ապարանից եւ Ագարակից: Այսինքն՝ «այո»-ի եւ «ոչ»-ի չորսական ներկայացուցիչ քարոզարշավը կսկսեն երկրի հարավից, իսկ եւս չորսական ներկայացուցիչ՝ հյուսիսից: 
Ըստ այդմ, «այո»-ի հյուսիսային խմբում ընդգրկված են ՀՀԿ խմբակցության անդամներ Սամվել Ֆարմանյանն ու Մարգարիտ Եսայանը, ԲՀԿ խմբակցության անդամ Միքայել Մելքումյանը եւ ՀՅԴ ներկայացուցիչ Արթուր Եղիազարյանը: 
«Ոչ»-ի հյուսիսային կազմը նույնպես պարզ է. «Ժողովրդավարական հայրենիքի» ղեկավար Պետրոս Մակեյան, Վարդան Խաչատրյան, Արմեն Մկրտչյան («Հայազն») եւ Նարեկ Այվազյան («Ազատ դեմոկրատներ»):
Հարավային ուղղությամբ «այո»-ի համար աշխատելու են ԱԺ աշխատակազմի ղեկավար Հրայր Թովմասյանը, ՀՀԿ խմբակցության անդամներ Վարդան Այվազյանը եւ Կարինե Աճեմյանը, ինչպես նաեւ նախագահի մամուլի նախկին քարտուղար Արման Սաղաթելյանը: 
Իսկ «ոչ»-ի քարոզչությունն իրականացնելու են ՀԱԿ խմբակցության անդամ, նախկին վարչապետ Հրանտ Բագրատյանը, ԳԽ պատգամավոր Ազատ Արշակյանը, ինչպես նաեւ Թամարա Գեւորգյանը եւ Վաղինակ Շուշանյանը, որի անունը հանրությանն առավել հայտնի դարձավ հոսանքի թանկացման դեմ ցույցերի ժամանակ: 
«Հարավցիները», մեկնարկելով Ագարակից, կլինեն Սյունիքի մարզի մի շարք քաղաքներում, գյուղերում, ապա կանցնեն Վայոց ձոր, այնուհետեւ՝ Արարատի, Արմավիրի եւ վերջում՝ Կոտայքի մարզեր: 
Իսկ «հյուսիսցիները» կսկսեն Ապարանից, կլինեն Աշտարակում, Թալինում, ապա՝ Շիրակի մարզում (Գյումրի, Ամասիա), կանցնեն Լոռի, այնտեղից՝ Տավուշի մարզ (Նոյեմբերյան, Իջեւան, Բերդ, Դիլիջան), վերջում Գեղարքունիքի մարզի բնակավայրերում կշրջեն:
Ըստ նախատեսվածի, դեկտեմբերի 2-ին քարոզչական երկու խմբերը կվերադառնան մայրաքաղաք, որտեղ էլ նախատեսված է, որ քարոզչության վերջին օրը՝ դեկտեմբերի 4-ին, տեղի կունենա երկու «թիմերի» միասնական բանավեճ: 
Հավելենք, որ ռեալիթի շոուն հեռարձակվելու է 12 ժամ, ուղիղ եթերում, «Յուքոմ» ցանցի «Արմնյուզ» հեռուստաալիքով եւ «Ա1+»-ի կայքով՝ նոյեմբերի 13-ից դեկտեմբերի 2-ը, ամեն օր՝ 11:00-23:00: Հասկանալի է, հընթացս կլինեն ամփոփումներ, հարցազրույցներ, ռեալիթի շոուն նաեւ հեռուստաօրագիր կունենա: 
Նշենք նաեւ, որ այստեղ հարցեր են ծագում, մասնավորապես, հեռուստանախագծին մասնակցել չցանկացածների դիրքավորման վերաբերյալ: Հարկ է ընդգծել, որ նախագծի հեղինակն ու կազմակերպիչները դիմել են սահմանադրական փոփոխությունների հանրաքվեին ակտիվորեն առնչվող բոլոր ուժերին: 
Սակայն ակնհայտ է, որ ինչպես առավել ագրեսիվ դիրքավորվող «Նոր Հայաստանի», ավելի պարզ ասած՝ «Ժառանգության» եւ Ժիրայր Սեֆիլյանի, այնպես էլ՝ բուն ՀԱԿ-ի կողմից այս յուրօրինակ քարոզչական հնարավորությունը, այսպես ասենք՝ համարժեք չի գնահատվել: Համենայն դեպս նրանց առավել նկատելի ներկայացուցիչները որոշել են չմասնակցել այս ծրագրին: 
Բնականաբար հարցեր են ծագում: Օրինակ, ըստ մամուլի հրապարակումների, ցանցային լրատվամիջոցների լրահոսի, ՀԱԿ խմբակցության ղեկավար Լեւոն Զուրաբյանը հայտարարել է, թե ռեալիթի շոուին չեն մասնակցի, քանի որ չեն ցանկանում այդպիսով լեգիտիմացնել սահմանադրական փոփոխությունների գործընթացը: 
Դա, ինչ խոսք անընկալելի ու հակասական հայտարարություն է, քանի որ «ոչ»-ի քարոզարշավի մեջ ակտիվորեն ընդգրկվելով՝ արդեն իսկ մասնակցում են մի գործընթացի, որն իբր չեն ցանկանում լեգիտիմացնել: Սկզբունքորեն, ի՞նչ տարբերություն՝ միայնա՞կ են շրջում երկրով մեկ ու իրենց ժխտողական մոտեցումը քարոզում, թե՞ դա անում են հեռուստատեսային ուղիղ եթերում հեռարձակման պայմաններում: 
Ի լրումն, լուրեր տարածվեցին, որ Լեւոն Զուրաբյանը հայտարարել է, թե՝ «ի՞նչ է, մենք տառակա՞ն ենք, որ բանկայի մեջ դնեն ու վերեւից նայեն»: Քաղտեխնոլոգ Կարեն Քոչարյանը երեկ հարկ չհամարեց մեկնաբանել նմանօրինակ հայտարարությունները: Փոխարենը նա մի դիպուկ դիտարկում ներկայացրեց, մասնավորապես, որ անբացատրելի է քաղաքական ուժի նման դիրքավորումը՝ հրաժարվել 20 օր շարունակ ուղիղ եթերում հեռարձակվող հաղորդմանը մասնակցելուց՝ անկախ այն բանից, թե տվյալ ուժը որ մոտեցման կողմնակիցն է: 
Ինչ վերաբերում է «Այո» եւ «ոչ» նախագծին, ապա հուսանք՝ այն բարեհաջող ընթացք կունենա, իսկ մասնակիցներն էլ, կրկին՝ անկախ կողմնորոշումից, իրենց կոռեկտ կդրսեւորեն եւ իրենք էլ դժգոհ չեն լինի: