ԱԺ կանոնակարգ–օրենքի քվեարկությանը չմասնակցելու համար էլ բացակայել եմ. Տաճատ Վարդապետյանը «ՀՀԿ» խմբակցությունից դուրս գալու դիմում է գրել

SOCIETY 9 October, 2018 18:37

«ՀՀԿ» խմբակցության՝ դեկտեմբերին ԱԺ արտահերթ ընտրություններ անցկացնելու պահանջով այսօր հանդես եկած պատգամավոր Տաճատ Վարդապետյանը խմբակցությունից դուրս գալու դիմում է գրել:

Այս մասին Tert.am –ին հայտնելով Tert.am-ին՝ պատգամավորը հավելեց, որ նախաձեռնությանը միանալու մասին նախապես տեղյակ է պահել խմբակցության ղեկավար Վահրամ Բաղդասարյանին:

Ներքաղաքական վերջին սրացումների պատճառ դարձած ԱԺ կանոնակարգ-օրենքի քվեարկությանը Տաճատ Վարդապետյանը չէր մասնակցել: Նա նշեց, որ բացակայել է հենց այդ քվեարկությանը չմասնակցելու համար:

Հարցին, թե ինչու, հասկանո՞ւմ էր արդյոք այդ քվեարկության վտանգավորությունը, նա ասաց.

«Ես հասկանում եմ, որ դեկտեմբերին պետք է խորհրդարանական ընտրություններ լինեն, և դրանով երկրի ապագան ավելի հուսալի առաջընթաց կունենա, և կլինի ճգնաժամի ավարտը՝ իմ դիտարկմամբ:

Եվ վերջապես, դա բազմահազարանոց զանգվածների պահանջն է, ես ընդամենը ականջալուր եմ եղել: Եվ նաև ինձ համար անչափ թանկ են վիրահայերը, որոնք իրենց ձայներն են տվել, որպեսզի ես դառնամ պատգամավոր»:

Տաճատ Վարդապետյանը հավելեց, որ չի պատրաստվում մանդատը վայր դնել (խմբակցության մեծամասնության քաղաքական գծին դեմ քվեարկելուց հետո նախկինում պահանջվում էր մանդատը վայր դնել)։

«Ես ընդամենը դիմում եմ ներկայացրել խմբակցությունից դուրս գալու համար»,- ասաց նա:

Հիշեցնենք, որ Ազգային ժողովի 16 պատգամավորներ դեկտեմբերին արտահերթ խորհրդարանական ընտրություններ անցկացնելու մասին հայտարարություն են ստորագրել՝ պաշտպանելով 2018 թվականի դեկտեմբերին ԱԺ արտահերթ ընտրություններ անցկացնելու՝ վարչապետ Նիկոլ Փաշինյանի դիրքորոշումը: Նրանց թվում՝ Աշոտ Արսենյան, Ալիկ Սարգսյան, Արտակ Սարգսյան, Արման Սահակյան, Տաճատ Վարդապետյան , Հակոբ Գառնիկի Հակոբյան, Շիրակ Թորոսյան, Կնյազ Հասանով, Արսեն Միխայլով, Հարություն Կարապողոսյան, Սամվել Ալեքսանյան, Նահապետ Գևորգյան, Արայիկ Գրիգորյան, Իշխան Զաքարյան։

Հիշեցնենք, որ երեկ «ՀՀԿ» խմբակցության անդամ Գևորգ Կոստանյանի հայտարարությունից հետո, երբ պարզ դարձավ, որ վերջինը նույնպես պաշտպանում է դեկտեմբերին ԱԺ արտահերթ ընտրություններ օրակարգը, վարչապետ Նիկոլ Փաշինյանը գրեց, որ մարդիկ պետք է քաջալերեն նրանց:

Tert.am –ը փորձեց կապ հաստատել հայտարարությանը չմիացած ՀՀԿ–ական պատգամավորների հետ: Սակայն խմբակցության գերակշիռ մասի հեռախոսները կա՛մ անջատված էին, կա՛մ չէին վերցնում. Կարինե Աճեմյան, Արամ Հարությունյան, Վահրամ Բաղդասարյան, Շուշան Պետրոսյան, Գագիկ Մելիքյան և այլք:

Միայն Արայիկ Հարությունյանը, վերցնելով հեռախոսը, ասաց, որ գերեզմանատանն է, Սամվել Նիկոյանն էլ՝ որ զբաղված է:

Միայն Մուրադ Մուրադյանը հայտնեց, որ ոչնչից տեղյակ չէ ու տեղեկանալով նման նախաձեռնության մասին՝ անկեղծորեն զարմացավ ու ասաց. «Բա ինչի՞ էին կանոնակարգ-օրենքին քվեարկում»։

Նշենք, որ այս 16 հոգուց կողմ քվեարկողների թվում են հանրապետական Ռաֆիկ Գրիգորյանը, Գևորգ Կոստանյանը և «Ծառուկյան» խմբակցությունից Իշխան Զաքարյանը. ինչ վերաբերում է Արման Սահակյանին, Արտակ Սարգսյանին և Գևորգ Կոստանյանին, ապա նրանք բացակայել էին քվեարկությունից:

Tert.am –ի հետ զրույցում «ՀՀԿ» խմբակցության անդամ Արմեն Աշոտյանը նշեց, որ այլ քաղաքական ուժերի հայտարարության մասով ոչինչ չի կարող ասել, չի մեկնաբանում, իրենց գործն է, բայց ինչ վերաբերում է ՀՀԿ-ական որոշ պատգամավորների՝ հայտարարությանը միանալուն, ասաց.

«Այդ հայտարարությունն արվել է մի մասը դեռևս ժամանակին ՀՀԿ-ն լքած պատգամավորների կողմից, կան նաև հայտարարություններ, որոնք արվել են գործող ԱԺ խմբակցության անդամների անունից, բայց այստեղ ուզում եմ հիշեցնել, որ 1 շաբաթ առաջ «ՀՀԿ» խմբակցությունը հայտարարություն էր քննարկել և ընդունել, և ես չեմ հիշում որևէ առարկություն 1 շաբաթ առաջ մեր քննարկման ժամանակ, տրված գնահատականների մասով»:

Արմեն Աշոտյանը, սա մեկնաբանելով, նշում է, թե «փաստորեն, Նիկոլ Փաշինյանը փորձում է ինդուլգենցիաներ բաժանել», ինչպես միջնադարում՝ կաթոլիկ եկեղեցին էր անում մեղքերի թողություն»:

Այս կապակցությամբ Արմեն Աշոտյանն ասում է, որ չի կարծում, թե Փաշինյանն է «վերջին արարը աշխարհի՝ մեղքերի թողության, սև ու սպիտակի, ճիշտն ու սխալի»:

ՀՀԿ փոխնախագահը հավելեց, որ ունի ահազանգեր, որ այս նախաձեռնությանը միացած որոշ պատգամավորների վրա ճնշումներ են գործադրվել: