Վարչապետի խորհրդական. «Անցնցում գործընթացը ՀՀԿ–ին է ձեռնտու, ոչ թե իշխող ուժին». «Փաստ»

«Փաստ» օրաթերթը գրում է.

Երևանի ավագանու ընտրություններից հետո օրակարգում է Ազգային ժողովը լուծարելու և հնարավորինս շուտ խորհրդարանական արտահերթ ընտրություններ անցկացնելու հարցը: Վարչապետ Նիկոլ Փաշինյանը հայտարարել է այդ թեմայով առաջիկայում սպասվող բանակցությունների մասին: Այդոհանդերձ՝ հաշվի առնելով ԱԺ ՀՀԿ խմբակցության ղեկավարի, ՀՀԿ–ական մի շարք պատգամավորների հայտարարությունները, կարելի է արձանագրել, որ այդ կուսակցությունն այս պահին արտահերթ խորհրդարանական ընտրությունների անհրաժեշտություն չի տեսնում:

ԱԺ–ն ցրելու, ինչպես նաև սպասվելիք արտահերթ ընտրությունների շուրջ զրուցել ենք վարչապետի խորհրդական Նիկոլայ Բաղդասարյանի հետ: Անդրադառնալով նախ ՀՀԿ– ականների դիրքորոշմանը՝ «Փաստ»–ի հետ զրույցում վարչապետի խոհրդականը նշեց.

«Ես այսպես եմ ընկալում ՀՀԿ ներկայացուցիչների հայտարարությունները. իրենք չեն տիրապետում իրավիճակին և չեն ընկալում պահի կարևորությունը: Նաև չեն հասկանում, թե որն խնդիրը: Իրականում խնդիրն այն չէ, թե ինչ–որ մեկը գնացել և իրենց խնդրում է իքնալուծարվել, ազատվել պաշտոնից: Խնդիրը հետևյալն է. գոյություն ունի Սահմանադրություն, որով հաստատվել է, որ մեր պետությունը խորհրդարանական երկիր է: Իսկ ի՞նչ է նշանակում խորհրդարանական երկիր. պառլամենտարիզմը ենթադրում է նաև հասարակության բացարձակ վստահությունը: Այսինքն՝ պառլամենտական երկրի դեպքում Ազգային ժողովը, որպես ներկայացուցչական մարմին, պետք է ներկայացնի հասարակության շահերն ըստ համամասնության ստացած ձայների: Եթե ակնառու է, որ ՀՀԿ–ն չի ներկայացնում բնակչության մեծամասնության շահերը, բայց խորհրդարանում ունի մեծամասնություն, ապա այդ դեպքում սահմանադրական կարգը պահպանելու համար պետք է գնալ ինքնալուծարման: Սա ոչ թե իրենց ցանկությունն է, այլ դե յուրե և դե ֆակտո ամրագրված փաստ: Իսկ ինքնալուծարման չգնալու պարագայում իրենք խախտում են Սահմանադրության այն պահանջը, ըստ որի՝ պառլամենտարիզմի դեպքում մեծամասնությունը պետք է ներկայացնի ժողովրդի մեծամասնության շահերը»:

Նիկոլայ Բաղդասարյանը շեշտեց, որ գործ ունենք ոչ թե ցանկությունների դաշտի, այլ իրավական ռեժիմի հետ:

Նրա խոսքով՝ Ազգային ժողովը ցրելու մեխանիզմները բազմաթիվ են. «Մեխանիզմները հստակեցվում են քաղաքական կոնսուլտացիաների միջոցով: Իսկ մեխանիզմները տարբեր են. օրինակ՝ հանրաքվե, ԱԺ 2/3–ի որոշում: Թե ինչ մեխանիզմով են առաջ գնալու՝ քաղաքական որոշման, քաղաքական ուժերի համաձայնության խնդիր է»:

Վարչապետի խորհրդականը շեշտեց՝ կարևոր է, որ բանակցությունները փակուղի չտարվեն: «Այսինքն՝ քաղաքական կոնսուլտացիաները փակուղի են գնում, երբ քաղաքական ուժերը հրաժարվում են բանակցություններից: Երբ քաղաքական ուժերը հրաժարվում են բանակցություններից, կոնսուլտացիաներ տեղի չեն ունենում, ժողովրդավարական երկրում Սահմանադրության իրավունքի վերականգնման անհրաժեշտություն է ծագում: Ժողովրդի կողմից Սահմանադրության վերականգնման համար նախընտրած քայլերը պահի համար ոչ ցանկալի սցենար են: Բայց դա նույնպես սցենար է, որը կարող է տեղի ունենալ, եթե ՀՀԿ–ն կոնսուլտացիաների գործընթացը փակուղի տանի: Ցանկացած դեպքում բոլորի համար պետք է պարզ լինի, որ Ազգային ժողովը լուծարվելու է, և տեղի են ունենալու նոր ընտրություններ: Թե այդ արդյունքին ինչ ճանապարհով կհասնեն, արդեն քաղաքական ուժերի որոշելիք խնդիրն է»,–ասաց նա՝ մատնանշելով ու կարևորելով կոնսուլտացիաների միջոցով փոխզիջման գալու տարբերակը:

«Այս իրավիճակում գործընթացը որքան անցնցում իրականացվի, այնքան ձեռնտու կլինի բացարձակապես ՀՀԿ–ին: Անցնցում գործընթացը ՀՀԿ–ին է ձեռնտու, ոչ թե իշխող ուժին: Իրենց շահերից է բխում, որ այդ գործընթացը շատ արագ ու անցնցում տեղի ունենա»,–նշեց մեր զրուցակիցը՝ ընդգծելով, որ հակառակ դեպքում ՀՀԿ–ականները վտանգում են իրենց քաղաքական ուժը, վտանգի տակ են դնում նաև այն զանգվածին, որը կարող է իրենց ձայն տալ:

Ինչ վերաբերում է արտահերթ ընտրությունների անցկացման հնարավոր ժամկետներին ու հնարավորություններին, Ն. Բաղդասարյանը նշեց.«ՀՀ վարչապետը հայտարարեց, որ ԱՄՆ–ից վերադառնալուց հետո անմիջապես ձեռնամուխ կլինի բանակցույուններ իրականացնելուն: Դա նշանակում է, որ քաղաքական ուժերը միանգամից կարող են արտահայտել իրենց դիրքորոշումը, վերջնական որոշումներ կայացնել: Եթե քաղաքական իրավիճակի վերաբերյալ քաղաքական ուժերի ընկալումը ճիշտ լինի, ապա այս տարի անպայման գոնե կսկսենք ԱԺ–ն լուծարելու և ընտրություններ անցկացնելու գործընթացը: Եթե խոչընդոտ լինի՝ հնարավոր է, որ մի փոքր ձգձգվի գործընթացը, ժամկետները թեթևակի կարող են շեղվել: Բայց բոլոր դեպքերում արդյունքը մեկն է լինելու՝ ԱԺ լուծարում և ԱԺ արտահերթ ընտրությունների անցկացում»:

Հաշվի առնելով, որ ամեն դեպքում ընտրություններ լինելու են, Նիկոլայ Բաղդասարյանը շեշտեց, որ այս գործընթացի անցնցում իրականացումը բխում է թե՛ ՀՀ շահերից և թե՛ բոլոր քաղաքական ուժերի շահերից. «Մենք դրանում համոզվեցինք Երևանի ավագանու ընտրություններին: Ինչքանով այն անցնցում լինի, այնքան մեր տնտեսական, սոցիալական կայունությունից բխող գործընթաց կլինի»: