«Քա­ղա­քա­պետ ընտր­վե­լու դեպ­քում չեմ շրջե­լու թիկ­նա­պահ­նե­րով և անո­ղոք եմ լի­նե­լու կո­ռուպ­ցի­ա­յի հան­դեպ». «Փաստ»

«Փաստ» օրաթերթը գրում է.

Երեկ մեկնարկեց Երևանի ավագանու ընտրության քարոզարշավը: ԲՀԿ-ն այն սկսեց Նուբարաշենից, որտեղ ամենահիմնական խնդիրը աղբանոցն է:

Քարոզարշավի մեկնարկի հանդիսավոր արարողության ժամանակ ԲՀԿ առաջնորդ Գագիկ Ծառուկյանը նշեց, որ իր ղեկավարած կուսակցությունը եկել է, որպեսզի կանգնի նուբարաշենցու կողքին ու թեթևացնի նրա հոգսը: Բայց եթե անգամ ԲՀԿ-ն ոչ մի ձայն էլ չհավաքի այս թաղամասում, նույնիսկ այդ դեպքում Ծառուկյանը ժողովրդից չի նեղանա:

«Չմտածեք, որ ձայն չտալով Ծառուկյանը նեղանալու է, պարզապես քանի որ կա հնարավորություն ձեր համայնքի խնդիրները լուծելու, օգտվեք այդ հնարավորությունից: Մենք հպարտանում ենք մեր ժողովրդով: Դուք գիտեք, որ մենք գործի մարդ ենք, և եթե ժողովուրդը մեզ վստահեց և հնարավորոթյուն տվեց, որ իր խնդիրները լուծվեն, ուրեմն իմացեք, որ հենց հաջորդ օրվանից սկսելու են ծրագրերը կյանքի կոչվել և գործել: Մենք մեր քարոզարշավի մեկնարկը սկսել ենք Երևանի ծայրամասից և հերթով հանդիպումներ ունենալով՝ գալու ենք Կենտրոն: Բայց ընտրության ժամանակ որոշողը ժողովուրդն է և ինքը պետք է որոշի, թե ում հետ է ցանկանում կապել իր և զավակների ապագան: Ով էլ որ ընտրվի, մենք մեր կողմից կաջակցենք, որպեսզի մեր մայրաքաղաքը զարգանա, բայց այդ դեպքում պատասխանատվությունը կկրի այն քաղաքական ուժը, ում դուք վստահել եք»,- ասաց Գագիկ Ծառուկյանը:

ԲՀԿ առաջնորդը նշեց նաև, որ իր երազանքն է, որ երկրում բոլորի դեմքին ժպիտ լինի ու բարօրություն տիրի ողջ երկրում: Բայց դա միայն հնարավոր կլինի, երբ երկրում տնտեսություն զարգանա: Միայն տնտեսության զարգացման դեպքում է, որ մարդիկ լավ կապրեն, տուն մտնելուց էլ ո՛չ իրենց ծնողներից, ո՛չ կնոջից չեն ամաչի ու երեխաների մոտ ամոթալի վիճակում չեն հայտնվի:

«Ես պետական պաշտոնյա չեմ եղել, չինովնիկ չեմ եղել, բայց իմ հնարավորությունների սահմաններում ամեն ինչ արել եմ, որ կառուցեմ ու իմ ժողովրդի սիրտը շահեմ: Երկիր զարգացնելու համար հարկավոր են ծրագրեր, պայմաններ, ներդրումներ. առանց դրանց չի կարող երկիրը զարգանալ: Ամեն դեպքում ինչպես կցանկանաք, այնպես էլ ընտրեք, այս համայնքում ապրողը դուք եք»,- ասաց Գ. Ծառուկյանը:

Երևանի քաղաքապետի թեկնածու Նաիրա Զոհրաբյանն էլ իր ելույթում նշեց, որ ԲՀԿ-ն իր քարոզարշավը մեկնարկում է Նուբարաշենից, քանի որ այն իրականում Երևանի աղետի գոտիներից մեկն է:

«Երևանը նույնպես ունի աղետի գոտիներ:

Դրանցից մեկը Նուբարաշենն է: Երբ 3 տարի առաջ Ազգային ժողովը վավերացրեց հերթական վարկը, որով այստեղ պետք է կառուցվեր աղբի վերամշակման գործարան, մտածում էինք, որ վերջապես այս հարցը կլուծվի: Հիմա, երբ փորձում ենք գտնել պատասխանատուներին՝ ստանալու համար այն հարցի պատասխանը, թե ինչու չի իրականացվել կառավարության պարտավորությունը, և ինչու ենք մենք ամեն ամիս տուգանք մուծում միջազգային բանկերից որևէ մեկին, ոչ մեկը չկա: Փաստորեն, ստացվում է, որ հերթական անգամ խաբել, քցել և շորթել են մեզ բոլորիս: Այս ամենի պատճառով մենք հիմա անհարմար ենք զգում, որ մեր սակավ քվեով մենք չենք կարողացել պաշտպանել ձեր շահերն ու իրավունքը: Այդպիսին է եղել իրավիճակը՝ մեկ ուժի քաղաքական մենաշնորհ: Եվ այս պայքարը նաև նրա համար էր, որպեսզի երկրում մեկ ուժի քաղաքականություն չլինի, որովհետև այդ դեպքում չի կարող իրական ժողովրդավարություն լինել»,-ասաց Ն. Զոհրաբյանը:

Նա նաև նշեց, որ լրագրողական տարիներից մինչ օրս իր ուժերն առավելագույնս ներդրել է երկրում ինչ-որ մի բան դեպի դրականը փոխելու համար: Նույն կերպ է աշխատել նաև ԱԺ պատգամավորության տարիներին, որի համար շնորհակալ է իր քաղաքական թիմին:

«Շնորհակալություն եմ հայտնում Գագիկ Ծառուկյանին և մեր ողջ թիմին: Մենք մեր քաղաքական թիմում շատ արժանի թեկնածուներ ունենք քաղաքապետի թեկնածու առաջադրվելու համար: Վստահ եղեք, որ նրանցից մի քանիսը կարող էին ստանձնել Երևան քաղաքի կառավարման պատասխանատվությունը, բայց եթե ես ընտրվեմ քաղաքապետ, չեմ լինելու կաբինետային գործիչ, Երևանում չեմ շրջելու թիկնապահներով: Դա բացառվում է: Չի կարելի սեփական ժողովրդի հետ բարիկադի այն կողմից շփվել: Անողոք եմ լինելու կոռուպցիայի հանդեպ, ավելին, քան ոստիկանությունն ու Ազգային անվտանգության ծառայությունն է»,-ասաց Ն. Զոհրաբյանը: